«Skazali maci, što zastreliŭsia». U vojsku ŭ Dzień Niezaležnaści zahinuŭ małady sałdat

Trahičnaje zdareńnie adbyłosia ŭ Dzień Niezaležnaści ŭ 19-j asobnaj hvardziejskaj miechanizavanaj bryhadzie, što dysłakujecca ŭ vioscy Zasłonava Lepielskaha rajona Viciebskaj vobłaści. Pry pakul niavyśvietlenych abstavinach zahinuŭ 19-hadovy Maćviej Kanavałaŭ z Chojnikaŭ.

«Jon byŭ u naradzie. Mahčyma, zdaryŭsia niaščasny vypadak, ale, chutčej, jon sam zastreliŭsia, bo heta adbyłosia nočču», — raskazała «Našaj Nivie» abaznanaja krynica.

Pa słovach surazmoŭcy, trahiedyja adbyłasia 3 lipienia ŭ 2:45, ale nie ŭ Zasłonavie, a ŭ Mačuliščach, kudy na Dzień Niezaležnaści dysłacyravali Kanavałava.

Pry dapamozie BELPOL my daviedalisia, što ŭ Biełarusi jość tolki adzin Maćviej z takim proźviščam i takoha ŭzrostu. Infarmacyju pra jaho śmierć nam paźniej paćvierdzili znajomyja chłopca:

«Jon parazmaŭlaŭ z maci ŭviečary, a zranku joj patelili z armii i skazali, što Maćvieja bolš niama. Što jon zastreliŭsia nibyta. Ale nichto ŭ heta nie vieryć».

Maćviej Kanavałaŭ. Fota: vk.com

My taksama patelefanavali ŭ Horski sielsaviet, da jakoha adnosicca Zasłonava. Tam uskosna paćvierdzili zdareńnie: «A, vy pa tym chłopcu, ź jakim raźbirajucca». Ale pa padrabiaznaści nakiravali da namieśnika kamandzira pa ideałahičnaj pracy pałkoŭnika Viačasłava Akavickaha.

U razmovie z nami Viačasłaŭ Akavicki ŭsio admaŭlaŭ: «Ničoha ŭ nas nie zdaryłasia. Vy ŭvohule pamylilisia numaram», — i kinuŭ słuchaŭku.

Maćviej z paśviedčańniem pryzyŭnika jašče ŭ dziaviatym kłasie. Fota: vk.com

Pa słovach znajomych ź situacyjaj, Maćvieja Kanavałava ŭžo paśpieli pachavać.

Kamientary da artykuła