Frydman: Vašynhton dazvoliŭ Iranu zachavać tvar, Rasija ničoha nie vyjhrała
Padvojny cisk — varjackija pahrozy Donalda Trampa z adnaho boku i nastojlivyja parady Kitaja z Pakistanam z druhoha — prymusiŭ iranski režym pajści na sastupki. Časovaje zacišša ŭ rehijonie — heta nie kaniec vajny. A ad pieramirja vyjhrali ŭsie, akramia Rasii, ličyć palityčny analityk Alaksandr Frydman.
Praŭradavyja demanstranty skandujuć łozunhi, trymajučy iranskija ściahi i płakat Viarchoŭnaha lidara ajatały Madžtaby Chamieniei paśla abviaščeńnia dvuchtydniovaha spynieńnia ahniu ŭ vajnie sa Złučanymi Štatami i Izrailem, Tehieran, 8 krasavika 2026 h. Fota: AP Photo / Vahid Salemi
Kali adkinuć iranskuju prapahandysckuju mišuru ab «biezahavoračnaj pieramozie», to vidać, što Tehieran, nie na žart spałochaŭšysia pahroz Trampa, jakija miežavali z varjactvam, pad ciskam Pakistana i jaho zastupnika Kitaja pryniaŭ dva pryncypovyja patrabavańni Vašynhtona, jakija raniej adchilaŭ:
-
abmiežavanaje pa terminach pieramirje;
-
adkryćcio Armuzskaha praliva.
Za heta bajavyja dziejańni ŭ Iranie buduć spynieny na dva tydni.
Toje, što asnovaj dla pieramoŭ abvieščany prapanovy Irana, a iranskaja prapahanda ŭžo trubić ab ich pryniaćci, nie pavinna biantežyć: heta ŭsiaho tolki «łokšyna na vušy» publicy i nie bolš čym revierans z boku Vašynhtona, jaki dazvolić Iranu zachavać tvar i ŭstupić u pieramovy.
U partyi Izraila i ZŠA pačynajecca novy etap, a pieramovy całkam mohuć pajści pa scenaryi vajny ŭ Hazie, a bajavyja dziejańni mohuć praciahnucca.
U hetym supraćborstvie pakul rana nazyvać imia pieramožcy.
U vyjhryšy na hety momant krainy Piersidskaha zaliva, jakija atrymlivajuć pieradyšku; Pakistan, jaki atrymlivaje asałodu ad łaŭraŭ miratvorcy, što vyratavaŭ rehijon ad žudasnaj eskałacyi; jeŭrapiejskija spažyŭcy, jakija vyjhrajuć ad padzieńnia cen na naftu, a taksama (i asabliva) Kitaj, jaki ŭmacoŭvaje svajo rename hłabalnaj supierdziaržavy.
U lik tych, chto vyjhraŭ, nie ŭvachodzić Rasija, jakaja dapamahała režymu ŭ Iranie, ale tak i nie zdoleła — i ŭ hetym vialiki pośpiech Ukrainy — skarystacca aknom mahčymaściaŭ dla dasiahnieńnia surjoznych pośpiechaŭ na froncie.