Śvieckaje žyćcio Darji Šmanaj: dni naradžeńnia dziaciej Kirkorava i Comedy Club

Pracujučy ŭ biełaruskim pasolstvie ŭ Maskvie, Darja Šmanaj dapamahała Łukašenku padčas jaho vizitaŭ u Rasiju. A volny čas baviła ŭ kampanii rasijskaj bahiemy.

U centry fota Andrej Małachaŭ i Viktoryja Šelahava. Darja Šmanaj pieršaja sprava. Fota: myweekend.ru

U 2022 hodzie Darja Šmanaj — byłaja supracoŭnica słužby pratakołu Łukašenki — pajechała ŭ Rasiju jak daradca-pasłańnica biełaruskaha pasolstva ŭ Maskvie.

Sioleta pryhažunia stała kiraŭnicaj tajamničaj biełaruskaj arhanizacyi. U stvoranaha pa inicyjatyvie Alaksandra Łukašenki «Fondu pieršaha» jość daččynaja arhanizacyja ŭ Rasii pad nazvaj «Krynica». Mienavita jaje z 8 maja 2026 hoda ŭznačaliła Darja Šmanaj.

A ŭ volny čas Šmanaj viadzie davoli nasyčanaje śvieckaje žyćcio.

Sioleta Maślenicu Darja śviatkavała ŭ maskoŭskim restaranie Savoy na brančy žonki rasijskaha «karala pachavańniaŭ» Viktoryi Šelahavaj (jaje muž Aleh maje biznes u śfiery rytualnych pasłuh).

Sama ž Viktoryja viadomaja svaim aktyŭnym śvieckim žyćciom, a taksama imknieńniem da adradžeńnia ruskich tradycyj.

Na jaje Maślenicy ŭ adzin kadr z haspadyniaj mierapryjemstva trapili šoŭmien Dźmitryj Małachaŭ i Darja Šmanaj.

Letaś u śniežni Darja baviła čas na elitnym śvieckim ivencie — pieradnavahodnim viečary juvielirnaha brenda Flawless u hateli Stella di Mosca. Tusiła tam biełaruska ŭ kampanii televiadučych Andreja Małachava i Julii Baranoŭskaj, śpiavački Zary dy inšaj rasijskaj bahiemy.

Kab nie vyhladać šeraj myškaj na fonie zorak, u śviet Šmanaj vyhulała sumačku Chanel (novaja takaja kaštuje ad 3000 da 4500 jeŭra).

Fota: anazarovphoto.ru

Darečy, juvielirnyja brendy Darja lubić. Letaś na zdymkach Comedy Club jana vyhulała kalje ad Van Cleef & Arpels — padobnaje da Vintage Alhambra 10 motifs z žoŭtaha zołata 18 karat i čornaha oniksu (jaho košt na aficyjnym sajcie dachodzić da 10 tysiač jeŭra).

U 2024 hodzie Šmanaj źlatała ŭ Sočy na adkryćcio jubilejnaha XX fiestyvalu «Novaja chvala». Miesca joj dastałasia pasiarod VIP-haściej — prosta pierad Darjaj siadzieŭ Aleh Hazmanaŭ z žonkaj Marynaj.

Darja Šmanaj (u druhim šerahu sprava) na adkryćci jubilejnaha XX fiestyvalu «Novaja chvala». Fota: kp.ru

Da hetaha, u 2023 hodzie, Darja zaśviaciłasia na niezvyčajnym modnym pakazie — tady rasijskaja dyzajnierka Anika Kierymava zrabiła kałabaracyju razam z synam Filipa Kirkorava. Tata-śpiavak padaryŭ Marcinu na 11‑hodździe kala $115 tysiač — kab školnik moh vypuścić luksavuju kalekcyju adzieńnia.

Taksama na pakazie hości ŭbačyli kalekcyju adzieńnia ŭ styli casual pa matyvach malunkaŭ dački Filipa — Ały-Viktoryi.

Šmanaj siadzieła ŭ kampanii z Andrejem Małachavym i Siarhiejem Łazaravym.

Darja Šmanaj na pakazie syna Kirkorava. Fota: stiletto.blog

A ŭ 2022 hodzie Filip Kirkoraŭ arhanizoŭvaŭ šykoŭnuju viečarynu z nahody adzinaccacihodździa svajoj dački Ały-Viktoryi. Baćka ŭračysta padaryŭ imianińnicy kalekcyjnyja zavušnicy Louis Vuitton.

Kaniečnie, hości śviata taksama byli nie prostymi ludźmi. Taja viečaryna bolš nahadvała čyrvonuju darožku pierad «Pieśniaj hoda», čym dzień naradžeńnia školnicy.

Darja Šmanaj na dni naradžeńnia dački Kirkorava. Fota: pitaniemalysha.ru

Zavitali, naprykład, Jana Rudkoŭskaja, Valeryja i Iosif Pryhožyny, Jahor Kryd — dy šmat chto jašče. Na adnym sa zdymkaŭ možna pabačyć i Darju Šmanaj, jakaja viesieła ŭśmichajecca pobač z Kirkoravym (toj, zdajecca, navat krychu pryabdymaje jaje).

Imavierna, z karalom rasijskaj estrady Darja pasiabravała jašče da svajho aficyjnaha pierajezdu ŭ Maskvu. Jaje možna pabačyć na fota ź viečaryny 2021 hoda — tady Kirkoraŭ rychtavaŭ da «Jeŭrabačańnia» śpiavačku Natallu Hardzijenka, jakaja pavinna była pradstaŭlać Małdovu na konkursie.

Fota: kp.ru

U honar artystki Kirkoraŭ arhanizavaŭ maštabnuju prezientacyju jaje pieśni ŭ Maskvie — paklikaŭ uvieś bamond. Na adnym z kadraŭ bačna, jak Darja Šmanaj, Filip Kirkoraŭ (jaki abdymaje dziaŭčynu za taliju) i Ihar Krutoj robiać ahulnaje sełfi.

Kamientary da artykuła