Byłaja supracoŭnica pratakoła Łukašenki Darja Šmanaj stała kiraŭnicaj tajamničaj biełaruskaj arhanizacyi ŭ Maskvie
Rasijskuju «dačku» zahadkavaha biełaruskaha «Fondu pieršaha» ŭznačaliła Darja Šmanaj, zaŭvažyła «Lusterka». Raniej jana była daradcaj-pasłańnicaj biełaruskaha pasolstva ŭ Rasii, a da hetaha ŭvachodziła ŭ słužbu pratakoła Alaksandra Łukašenki. Za hod hetaja struktura pryciahnuła «achviaravańniaŭ» bolš jak na 44 młn rubloŭ.
U stvoranaha pa inicyjatyvie Alaksandra Łukašenki «Fondu pieršaha» jość daččynaja arhanizacyja ŭ Rasii pad nazvaj «Krynica». Jak daviedałasia «Lusterka» z dadzienych resursu audit-it.ru, z 8 maja hetaha hoda jaje dyrektaram pryznačana Šmanaj Darja Michajłaŭna.
Žančyna da 2014 hoda pracavała ŭ Nacyjanalnaj škole pryhažości, paźniej stała načalnicaj śpiecadździeła Administracyi Łukašenki. U 2022 hodzie jaje pryznačyli daradcaj-pasłańnicaj biełaruskaha pasolstva ŭ Maskvie.
Raniej kiraŭnikom «Krynicy» byŭ Mikałaj Leanidavič Łatyšonak. Heta poŭny ciozka vajskoŭca i byłoha kiraŭnika ŭpraŭleńnia asabistaj achovy Łukašenki, a ciapier — pamočnika palityka. Jon vierna słužyć Łukašenku z 1995 hoda. Łatyšonak zapomniŭsia ŭ tym liku tym, što 30 žniŭnia 2020 hoda, kali byŭ čarhovy niadzielny marš, vychodziŭ z Pałaca niezaležnaści da ludziej, kali amal usie syšli.
U adroźnieńnie ad svajoj biełaruskaj «mamy», rasijski fond, jaki ŭznačalvaje Šmanaj, daŭ spravazdaču ab svaim finansavym stanie za 2025 hod.
Sudziačy z dakumientaŭ, u jaho pastupiła «dobraachvotnych majomasnych unioskaŭ i achviaravańniaŭ» na 1,14 młrd rasijskich rubloŭ (kala 15 młn dalaraŭ).
Ź ich na ŭtrymańnie arhanizacyi patracili kala 85 tysiač biełaruskich rubloŭ. Arhanizacyja zarehistravanaja ŭ Maskvie pa tym ža adrasie, pa jakim znachodzicca pasolstva Biełarusi (vulica Marasiejka, 17/6).
Što viadoma pra arhanizacyju
U kastryčniku 2022 hoda pa inicyjatyvie Alaksandra Łukašenki byŭ zasnavany «Fond pieršaha».
Pa słovach palityka, jon pavinien byŭ zamianić zakrytyja z-za represij dabračynnyja arhanizacyi. «My zmožam akumulavać hrošy tych, chto nieabyjakavy. I z majho boku — harantyja taho, što hetyja hrošy raskradzieny nie buduć», — havaryŭ jon u kastryčniku 2023‑ha — praz hod paśla stvareńnia fondu. A biełarusam abiacali poŭnuju prazrystaść pracy struktury — maŭlaŭ, «kožny achvočy moža pahladzieć, kudy nakiravany jaho hrošy».
Adnak struktura albo naohuł nie viadzie nijakaj dziejnaści, albo jaje staranna chavaje.
Ciapier čytajuć
Siarhiej Cichanoŭski pierabraŭsia žyć u Łos-Andželes63
Kamientary
Čakańnie - AI
Rečaisnaść - shmanAI