Dzie ŭ Jeŭropie samaja čystaja vada dla kupańnia? Apublikavany novy rejtynh plažaŭ
Bolšaść jeŭrapiejskich plažaŭ maje čystuju i biaśpiečnuju dla kupańnia vadu, adnak pamiž krainami nazirajucca istotnyja adroźnieńni. Novaja spravazdača Jeŭrapiejskaha ahienctva pa navakolnym asiarodździ pakazała, dzie vada adpaviadaje samym vysokim standartam, a dzie turystam varta być bolš aściarožnymi.
Jeŭrapiejskaje ahienctva pa navakolnym asiarodździ apublikavała spravazdaču ab stanie vady ŭ papularnych miescach dla kupańnia. Manitorynh achapiŭ bolš za 22 tysiačy prybiarežnych i ŭnutranych zon adpačynku ŭ krainach Jeŭrasajuza, Ałbanii i Šviejcaryi.
Mietodyka acenki hruntujecca na Dyrektyvie ab vadzie dla kupańnia. Jana praduhledžvaje zabor i analiz prob vady na najaŭnaść bakteryj, što śviedčać ab traplańni ŭ vadajomy kanalizacyjnych ściokaŭ. Vysokaja kancentracyja takich mikraarhanizmaŭ moža vyklikać straŭnikava-kišačnyja zachvorvańni ŭ čałavieka. Testavańnie pravodzicca rehularna na praciahu ŭsiaho kupalnaha siezona, paśla čaho abjektu prysvojvajecca adpaviedny rejtynh: ad niezdavalniajučaha da vydatnaha.
Vyniki za 2025 hod pakazvajuć, što ŭ cełym jeŭrapiejskija vody zastajucca biaśpiečnymi: 87,4% prybiarežnych marskich vod Jeŭropy atrymali najvyšejšuju adznaku — «vydatna». Drennaja jakaść vady była zafiksavanaja tolki na nievialikaj kolkaści plažaŭ.
Absalutnymi lidarami stali Kipr, Litva i Słavienija. U hetych krainach usie biez vyklučeńnia prybiarežnyja miescy dla kupańnia atrymali acenku «vydatna». Taksama nivodnaha plaža z drennaj jakaściu vady nie vyjavili ŭ Bielhii, Bałharyi, Łatvii, Malcie i Rumynii.
Z druhoha boku rejtynhu apynułasia Ałbanija. Amal čverć jaje prybiarežnych miescaŭ dla kupańnia — 23% — atrymali acenku «kiepska». Dla paraŭnańnia, u Estonii, jakaja zaniała druhoje miesca pa hetym pakazčyku, prablemnymi pryznali tolki 6,7% plažaŭ, u Finlandyi — 2,6%.
A što z rekami i aziorami?
Jašče adnoj asablivaściu daśledavańnia staŭ vialiki razryŭ pamiž marskimi plažami i ŭnutranymi vadajomami. Kali na ŭźbiarežžach najvyšejšuju acenku atrymali amal dzieviać ź dziesiaci miescaŭ dla kupańnia, to na aziorach i rekach situacyja značna horšaja.
U siarednim tolki 78,3% unutranych vadajomaŭ byli pryznanyja «vydatnymi». Asabliva prablemnymi akazalisia reki: takuju acenku atrymali tolki 47% račnych miescaŭ dla kupańnia.
Najlepšyja pakazčyki ŭnutranych vod dla kupańnia (90%) u minułym hodzie byli zafiksavanyja ŭ Aŭstryi, Finlandyi, Danii, Luksiemburhu i Hiermanii. A voś u Słavienii, Partuhalii, Polščy, Charvatyi i Ispanii hety pakazčyk skłaŭ mienš za 60%.
Pry hetym najbolšaja dola ŭnutranych vadajomaŭ z drennaj jakaściu vady była zafiksavanaja ŭ Ispanii — 11%. Dalej iduć Charvatyja (7,1%) i Francyja (6%).
Daśledčyki adznačajuć, što padtrymlivać čyściniu marskoj vady praściej dziakujučy płyniam, jakija vynosiać zabrudžvańni ad bieraha. U aziorach i rekach škodnyja rečyvy zatrymlivajucca značna daŭžej, tamu kantrol za ich jakaściu patrabuje bolšych namahańniaŭ.
Dla turystaŭ spravazdača aznačaje adno: pierad pajezdkaj na papularnyja kurorty varta źviartać uvahu nie tolki na ceny i nadvorje, ale i na jakaść vady. Choć u bolšaści jeŭrapiejskich krain kupańnie zastajecca biaśpiečnym, asobnyja rehijony ŭsio jašče majuć prablemy z zabrudžvańniem.
Biełaruś daśledavańniem nie była achoplenaja.
Kamientary