Biełaruska pieraviezła ŭ Jehipiet 84‑hadovuju maci: Navat cisk jak u kasmanaŭtki staŭ

Niebanalnuju historyju svajho žyćcia Natalla raspaviała ŭ kamientarach, kali pabačyła pytańnie, ci pierajazdžaŭ niechta ŭ Jehipiet pa ŭłasnaj voli.

Šmat chto adrazu padumaŭ, što biełaruska, imavierna, vyjšła zamuž za jehipcianina — i tamu šmat hadoŭ žyvie na radzimie muža. Ale nie: Natalla nie maje muža. A źjechać u Biełarusi ŭ svoj čas vyrašyła praź źmienu relihii. Va ŭniviersitecie jana vyvučała relihijaznaŭstva — i šmat daviedałasia pra isłam. Dvaccać šeść hadoŭ tamu jana vyrašyła pierajści ŭ hetuju relihiju.

Natalla piša, što suajčyńniki nie ŭsprymali jaje jak musulmanku i ŭvieś čas hnabili: «Navat ciapier, kali treba prylacieć pa spravach, prablemy pačynajucca ŭžo ŭ aeraporcie».

Heta ździŭlaje Natallu. Maŭlaŭ, u Biełarusi 80% ludziej — ateisty. Zdavałasia b, čamu ich chvaluje, jakoj relihii prytrymlivajucca inšyja suajčyńniki. Ale rečaisnaść była niepryjemnaj.

Dva hady biełaruska pražyła ŭ Dubai. Tam joj nie vielmi spadabaŭsia klimat — kaža, što pakutavała ad śpiakoty. A paśla zhadała svaju školnuju maru. Jašče ŭ piatym kłasie, kali prachodzili historyju Staražytnaha Jehipta, Natalla zaharełasia idejaj žyć tam. Kali ŭpieršyniu pryjechała ŭ Jehipiet, adrazu zrazumieła: heta jaje kraina.

Pavialičyć

Ciapier žančyna pracuje nastaŭnicaj fizkultury ŭ škole, trenierkaj u trenažorcy i reabilitołaham, a taksama atrymoŭvaje prybytak ad zdačy ŭłasnaj nieruchomaści ŭ arendu.

Niekalki hadoŭ tamu Natalla pieraviezła da siabie ŭ Jehipiet svaju 84‑hadovuju maci. Taja ŭsiu maładość aktyŭna vandravała i da 55 hadoŭ kožny hod jeździła na mora. Niablizki pieralot da dački maci pieraniesła davoli lohka i potym jašče nie adnojčy lotała ŭ Biełaruś, kali treba było vyrašać niejkija pytańni.

Biełaruska dzielicca ŭłasnym dośviedam. Raspaviadaje, što viedaje: ludziam stałaha ŭzrostu vielmi važna, kab u emihracyi była zvykłaja ježa. Ale joj i ŭ hetym pašancavała.

Jašče tady, kali maci i dačka žyli ŭ roznych krainach, Natalla, pryjazdžajučy na radzimu, hatavała tradycyjnyja jehipieckija stravy. Maci jany padabalisia. A ŭ samim Jehipcie jana acaniła bahaćcie sadaviny i harodniny, a taksama miascovyja desierty.

Pry hetym, zdaroŭje maci ŭ novaj krainie tolki palepšyłasia: «U Biełarusi ŭ jaje cisk zaškalvaŭ, a ŭ Jehipcie 130 na 80 było. Jana vieteran pracy, 65 hadoŭ bieśpierapynnaha stažu. U 80 hadoŭ tolki pierastała pracavać».

Na pytańni pra śpiakotu Natalla tłumačyć, što jaje maci naadvarot było kamfortna ŭ bolš ciopłym klimacie. Reč u tym, što z uzrostam paharšajecca termarehulacyja i ludzi pačynajuć mierznuć: «Jana ŭletku nie chacieła kandycyjanier uklučać, joj dobra było bieź jaho».

Pavialičyć

Bolš za ŭsio maci Natalli padabałasia, jak jehipcianie staviacca da ludziej stałaha ŭzrostu: «Susiedzi prychodzili da jaje z roznymi prysmakami. Razmaŭlali praź mianie, ja pierakładała».

Ad nastalhii ž nie pakutavała. U apošni svoj pryjezd u Biełaruś, kali treba było razabracca ź piensijaj, stałaja žančyna nie mahła dačakacca viartańnia ŭ Jehipiet.

Jana ž zahadała dačce i pachavać jaje ŭ Jehipcie, kali pryjdzie čas. Žančyna pamierła za 4 dni da svajho 88 dnia naradžeńnia, pachavali jaje na chryścijanskich mohiłkach.

Historyja Natalli nabrała amal 7 tysiač łajkaŭ za sutki. Ludzi dziakujuć za toje, što jana padzialiłasia dośviedam — bo šmat chto ź mihrantaŭ dumaje pra toje, jak zabrać baćkoŭ da siabie, ale bajacca hetaha.

Radujucca i tamu, što maci Natalli paśpieła pažyć u inšaj krainie i pabačyć jaje pryhažość.

• 24
• 0
• 1
• 3
• 1
• 1
• 0
• 6