Vialikabrytanija dałučyłasia da krain, dzie abmiarkoŭvajuć zabaronu abo strohija abmiežavańni dostupu dla padletkaŭ da sacsietak. Padobnyja miery abmiarkoŭvajuć u Francyi, Ispanii, Aŭstryi, Hrecyi i Danii. Siarod arhumientaŭ — niebiaśpieka kibierbulinhu, zaciahvalny dyzajn płatformaŭ i navat ryzyka samahubstvaŭ, piša Euronews.
Pavodle danych daśledavańnia Health Behaviour in School-aged Children, jakoje pravodzicca pry padtrymcy SAAZ, dola padletkaŭ, u jakich jość prablemy z sacyjalnymi sietkami, vyrasła z 7% u 2018 hodzie da 11% u 2022‑m.
Prablemnaje vykarystańnie sacyjalnych sietak vyznačałasia z dapamohaj pavodnickaj škały, jakaja vymiaraje takija simptomy, jak niemahčymaść skaracić čas u sietcy, ihnaravańnie inšych zaniatkaŭ i ŭźniknieńnie kanfliktaŭ abo niehatyŭnych nastupstvaŭ praz čas, praviedzieny anłajn.
Pavodle słoŭ apytanych 15‑hadovych, bolš za ŭsio prablem z sacsietkami — u padletkaŭ u Rumynii, Irłandyi i na Malcie. Mienš za ŭsio — u Niderłandach, Danii i Estonii.
Va ŭsich krainach, jakija ŭdzielničali ŭ daśledavańni, u dziaŭčat uźnikaje bolš ryzyk pry vykarystańni sacsietak, čym u chłopčykaŭ.
Hety razryŭ asabliva zaŭvažny ŭ Rumynii, dzie 28% 15‑hadovych dziaŭčat paviedamili pra prablemnaje vykarystańnie, u paraŭnańni z 18% chłopčykaŭ. U Irłandyi hetyja pakazčyki skłali 25% i 13% adpaviedna.
Dziaŭčaty taksama čaściej kazali, što kruhłasutačna kamunikujuć ź siabrami anłajn: pra heta paviedamili 44% 15‑hadovych dziaŭčatak suprać 29% chłopčykaŭ.
Šerah daśledavańniaŭ pakazaŭ, što padletki-dziaŭčaty adčuvajuć u sacyjalnych sietkach bolš mocny cisk, źviazany sa źniešnaściu i niezadavolenaściu svaim ciełam, čym chłopčyki, a taksama krychu čaściej raspaviadajuć pra sutyknieńni z kibierbulinham.
Pakul urady abmiarkoŭvajuć mahčymyja abmiežavańni, palityčnaja padtrymka mier pa abmiežavańni dostupu dziaciej da prahram znachodzicca na vysokim uzroŭni.
Zhodna z apytańniem YouGov, apublikavanym u krasaviku, 79% žycharoŭ Francyi padtrymali zabaronu sacyjalnych sietak dla niepaŭnaletnich da 16 hadoŭ. U Vialikabrytanii takich 76%, u Hiermanii — 74%, u Italii — 70%. Bolšaść taksama vykazałasia za abmiežavańni ŭ Ispanii (68%) i Polščy (53%).
Asabliva aktyŭna zabarony i abmiežavańni padtrymlivali baćki ŭ Vialikabrytanii, Italii i Ispanii: 79% respandentaŭ, jakija majuć dziaciej, vystupili za takija miery.
Ułady prysłuchoŭvajucca da hetaha palityčnaha zapytu. Nacyjanalny schod Francyi ŭžo ŭchvaliŭ zakon, jaki abmiažoŭvaje dostup da sacyjalnych sietak dla dziaciej da 15 hadoŭ, a ŭ Ispanii prapanavali pavysić minimalny ŭzrost dostupu da sacsietak da 16 hadoŭ.
Mnohija inicyjatyvy, jakija abmiarkoŭvajucca pa ŭsioj Jeŭropie, praduhledžvajuć ukaranieńnie efiektyŭnych sistem pravierki ŭzrostu i mohuć sutyknucca ź jurydyčnymi i praktyčnymi pieraškodami ŭ miežach ahulnajeŭrapiejskich pravił, zhodna ź jakimi nacyjanalnyja ŭrady nie mohuć u adzin momant abaviazać takija prahramy, jak TikTok, Instagram i Snapchat, błakiravać usich karystalnikaŭ da 16 hadoŭ.
I choć padtrymka zabaron vysokaja, dokazaŭ ich efiektyŭnaści vielmi mała — pierš za ŭsio tamu, što pakul isnuje vielmi mała doŭhaterminovych kiejsaŭ, jakija dazvalajuć daśledčykam paŭnavartasna acanić upłyŭ takich mier na dabrabyt dziaciej.
Ciapier čytajuć
Pasažyry aŭtobusa Minsk — Anapa, u jaki trapiŭ dron pad Branskam, raskazali, što adbyvałasia3
Kamientary
Pakul što ŭsie hetaje zachodniaje zakanadaŭstva vyhladaje jak sproba pad tarčaj "abarony dziaciej" uvieści sitemu tatalnaha kantrolu nad internet karystalnikami na kitajski ci rasiejski manier.