Niečakany bienieficyjar represij i masavaj emihracyi biełarusaŭ — vyručka hetaha rasijskaha biznesu ŭ Minsku vyrasła na 4000%

Manapalist u śfiery abviestak ab pracy ŭ Biełarusi — sajt rabota.by, jaki naležyć TAA «Usia rabota».

Pa dynamicy vyručki hetaj kampanii možna ŭbačyć, nakolki ŭsio ciapier składana dla najmalnikaŭ. 

Vyručka kampanii vybuchova raście pačynajučy z 2021 hoda. Na siońnia nievialikaje pradpryjemstva ź nizkim sabiekoštam i prościeńkaj biznes-madellu hienieruje i vyručku, i čysty prybytak na ŭzroŭni darosłaj biełaruskaj IT-kampanii. 

Rentabielnaść rabota.by — fantastyčnyja 78%, čysty prybytak za 2025 hod — 16,5 miljona biełaruskich rubloŭ. Asnoŭnyja hrošy prychodziać ad taryfikavańnia pracadaŭcaŭ, jakija raźmiaščajuć abviestki ab vakansijach. 

Prybytki kampanii stabilna vyvodziacca dyvidendami. Kamu? Rasijanam. 

Sama kampanija «Usia rabota» źjaviłasia ŭ lipieni 2020‑ha jak vynik źlićcia rabota.tut.by i hh.by — filijała rasijskaha Chedchantara ŭ Biełarusi. «Tutbaj miedyja» naležała 40%, jašče 10% — biełaruskamu mieniedžaru Alaksandru Čakanu, astatnija 50% — ruskim. 

Paśla razhromu Tut.by biełaruskaje TAA «Usia rabota» stała na 100% naležać rasijskaj jurydyčnaj asobie «Chedchantar». 

Rasijski «Chedchantar» heta publičnaja rasijskaja kampanija, struktura jaje vałodańnia nieviadomaja — tam šmat akcyjanieraŭ, a zasnavalnikam-rasijanam (Levan Nazaraŭ, Adysiej Haŭryłaŭ i inšyja), jak ličycca, naležać vialikija minarytarnyja doli. Kala pałovy akcyj kampanii znachodziacca ŭ svabodnym abaračeńni na rasijskaj biržy i naležać rasijskim inviestfondam i roźničnym inviestaram. 

Pavialičyć

Masavy adtok ludziej ź Biełarusi pačaŭsia z kanca 2020 hoda i praciahvajecca dahetul. 

Častka pracazdolnaha nasielnictva pakidaje krainu z ekanamičnych pryčyn, tamu što ŭ Biełarusi samyja nizkija ŭ rehijonie zarobki. 

Inšaja častka pracazdolnaha nasielnica ratujecca za miažoj ad represij. 

I navat tyja vysokakvalifikavanyja rabotniki, jakija majuć dobryja zarobki i nie adčuvajuć ryzyki pieraśledu, usio roŭna časta vymušany źjazdžać pa karparatyŭnych pryčynach — zamiežnyja kontrahienty biełaruskich technałahičnych firm patrabujuć pieravodu jurydyčnych asob i štataŭ u inšyja jurysdykcyi ź mierkavańniaŭ marali abo bankaŭskich standartaŭ. 

Takim čynam, z krainy vymyvajecca jak nizkakvalifikavanaja, tak i vysokakvalifikavanaja pracoŭnaja siła.

Zamianić nizkakvalifikavanych rabotnikaŭ ułady sprabujuć praz pryciahvańnie ekanamičnych mihrantaŭ z adstałych rehijonaŭ Azii: Banhładeš, Pakistana, Indyi.

Pracadaŭcy, sutyknuŭšysia z tym, što raźmiaščeńnie vakansii na ŭłasnym sajcie ŭžo nie daje nijakaha vyniku, vymušanyja źviartacca da pasiarednikaŭ i šukać rabotnikaŭ na profilnych resursach.

• 2
• 0
• 3
• 6
• 1
• 1
• 4
• 0