U Rasii biełarus fasavaŭ narkotyki ŭ karobki ad piačeńnia i adpraŭlaŭ pakupnikam praz taksi. Taksist nie pavieryŭ i pavioz piačeńnie ŭ palicyju
Vynik dla Dźmitryja Padłoznaha — 10 hadoŭ strohaha režymu.
Hramadzianin Biełarusi Dźmitryj Padłozny naładziŭ u Padmaskoŭi zbyt miefiedronu, rasfasoŭvajučy narkotyk va ŭpakoŭki ad šakaładnaha piačeńnia «Choco Pie» i adpraŭlajučy jaho pakupnikam pad vyhladam padarunkaŭ praz słužby dastaŭki taksi. Pra heta śviedčyć tekst prysudu Lubierackaha haradskoha suda Maskoŭskaj vobłaści.
Adnojčy Padłozny zamoviŭ dastaŭku praz «Jandeks» i pieradaŭ kiroŭcu taksi karobku, abhornutuju ŭ padarunkavuju papieru ź sinimi sercajkami. Mužčyna paprasiŭ advieźci «pasyłku» na patrebny adras, a na prapanovu pravieryć źmieściva adkazaŭ, što ŭnutry — padarunak dla dziaŭčyny, i na ŭsialaki vypadak pakinuŭ svoj numar telefona.
Ale pavodziny adpraŭnika padalisia taksistu padazronymi. Adjechaŭšy, jon akuratna ŭskryŭ pasyłku i znajšoŭ u joj karobku piačeńnia «Choco Pie», unutry jakoj byli płastykavy stakančyk z vadkaściu i pakiecik sa śvietłym paraškom. Kiroŭca spałochaŭsia, što heta narkotyk, i zamiest dastaŭki pajechaŭ u adździaleńnie palicyi. Ekśpiertyza paćvierdziła: u pakieciku byŭ miefiedron masaj 0,98 hrama.
Handal narkotykami biełarus naładziŭ nie adzin. Jon źniaŭ kvateru ŭ Lubiercach, kudy razam z dvuma pamahatymi zvoziŭ miefiedron, fasavaŭ jaho na razovyja dozy i pakavaŭ u tyja samyja ŭpakoŭki ad «Choco Pie».
Usich troch aryštavali.
Padłoznaha sud pryznaŭ vinavatym u niezakonnaj pierasyłcy narkotykaŭ hrupaj asob u značnym pamiery i ŭ zamachu na zbyt narkotykaŭ u bujnym pamiery. Svaju vinu padčas pracesu jon pryznaŭ całkam. Kančatkovy prysud — 10 hadoŭ kałonii strohaha režymu.
Ciapier čytajuć
Zornaja biełaruskaja intelektuałka pajšła na realici ad TNT — budzie plaści intryhi, kab atrymać 100 tysiač jeŭra2
Kamientary