Tramp zarabiŭ bolš za miljard dalaraŭ na krypcie za hod paśla viartańnia na pasadu prezidenta

Zhodna ź jaho abaviazkovaj finansavaj dekłaracyjaj za 2025 hod, prezident ZŠA Donald Tramp zarabiŭ letaś bolš za 1 miljard dalaraŭ na apieracyjach z kryptavalutaj, piša Bi-bi-si.

U spravazdačy abjomam 927 staronak jon ukazaŭ 635 miljonaŭ dalaraŭ rojałci ad kryptavaluty, stvoranaj na asnovie miema pra Trampa (miemkojn TRUMP), košt jakoj rezka źniziŭsia paśla zapusku za niekalki dzion da jaho ŭstupleńnia na pasadu prezidenta ZŠA.

Taksama jon zadekłaravaŭ bolš za 500 miljonaŭ dalaraŭ dachodu ad kampanii World Liberty Financial, jakaja pracuje ŭ śfiery kryptavalut i była zasnavana jaho synami razam ź dziećmi śpiecyjalnaha pradstaŭnika prezidenta Styva Uitkafa.

Jašče miljony dalaraŭ Tramp atrymaŭ ad apieracyj ź nieruchomaściu i prodažu tavaraŭ ź jaho simvolikaj. Adnak Bieły dom admaŭlaje, što jon atrymlivaje prybytak dziakujučy prezidenckaj pasadzie.

Dachody, paznačanyja ŭ apošniaj finansavaj spravazdačy, značna pieravyšajuć pakazčyki za 2024 hod, kali Tramp zadekłaravaŭ bolš za 600 miljonaŭ.

Bieły dom nieadnarazova padkreślivaŭ, što Tramp pieradaŭ svoj biźnies u trast, jakim kirujuć jaho syny, i admaŭlaje najaŭnaść jakoha-niebudź kanfliktu intaresaŭ.

Namieśnik pres-sakratara Biełaha doma Hanna Kieli zajaviła, što prezident zrabiŭ Złučanyja Štaty «kryptastalicaj śvietu».

«Ni prezident, ni jaho siamja nikoli nie mieli i nikoli nie buduć mieć kanfliktu intaresaŭ», — havorycca ŭ jaje zajavie.

«Usie dziejańni prezidenta Trampa i jaho administracyi ździajśniajucca vyklučna ŭ najlepšych intaresach amierykanskaha naroda, a ŭsie tak zvanyja «žurnalisty», jakija śćviardžajuć advarotnaje, paŭtarajuć adzin i toj ža stary iłžyvy naratyŭ, jaki demakraty i tradycyjnyja ŚMI prasoŭvajuć užo dziesiać hadoŭ», — zajaviła Kieli.

Sam Tramp taksama padkreśliŭ, što na jaho nie raspaŭsiudžvajucca fiederalnyja zakony ab kanflikcie intaresaŭ.

Apublikavanaja spravazdača pakazvaje, što jaho dachody ad kryptavalut značna pieravyšajuć prybytak ad biźniesu ŭ śfiery nieruchomaści, jaki pieršapačatkova prynios jamu viadomaść.

Jon zarabiŭ kala 77 miljonaŭ dalaraŭ ad svajho kłuba Mar-a-Lago i 122 miljony ad holf-kłuba ŭ Dorale (štat Fłaryda).

Bolš za 30 miljonaŭ prynieśli taksama holf-kłuby ŭ Biedminstery (štat Ńju-Džersi), Džupitery (štat Fłaryda) i Ternbiery (Šatłandyja).

Pavodle finansavaj dekłaracyi, Tramp taksama atrymaŭ miljony dołaraŭ ad inšych biźnies-prajektaŭ.

U pryvatnaści, jon atrymaŭ 4,7 miljona dalaraŭ u vyhladzie rojałci ad prodažu hadzińnikaŭ pad brendam Trump, a taksama Biblij, krasovak, parfumy i hitar z toj ža handlovaj markaj.

Pieršaja łedzi Miełanija Tramp taksama zadekłaravała svaje dachody za 2025 hod. Jana zarabiła 10,7 miljona dołaraŭ pa «licenzijnym pahadnieńni», źviazanym z dakumientalnym filmam pra jaje, jaki vyjšaŭ letaś.

Jašče 6 miljonaŭ dołaraŭ jana atrymała ad prodažu NFT (niezamiennych tokienaŭ) — ličbavych malunkaŭ, jakija pradajucca praź internet.

Prezident taksama ŭkazaŭ miljonnyja pastupleńni ŭ vyhladzie kampiensacyj pa roznych sudovych pazovach.

Siarod ich — 16 miljonaŭ dołaraŭ pa pazovie suprać ABC, jašče 16 miljonaŭ ad CBS Broadcasting i CBS Interactive, 24,5 miljona ad Meta, 22 miljony ad YouTube i 8 miljonaŭ ad X.

Adnak Bieły dom zajaviŭ, što bolšaja častka hetych srodkaŭ budzie nakiravana na stvareńnie budučaj prezidenckaj biblijateki Trampa abo pieraličana niekamiercyjnaj arhanizacyi, jakaja zajmajecca ŭtrymańniem parkavych terytoryj u rajonie Vašynhtona.

Pavodle rejtynhu samych bahatych ludziej śvietu časopisa Forbes, majomaść Trampa aceńvajecca ŭ 6 miljardaŭ dołaraŭ suprać 2,3 miljarda dołaraŭ u 2024 hodzie. Indeks miljarderaŭ Bloomberg aceńvaje jaho stan u 7,6 miljarda dołaraŭ.

Paśla viartańnia ŭ Bieły dom Tramp, jaki niekali nazyvaŭ bitkojn machlarstvam, pačaŭ vykonvać svajo pieradvybarnaje abiacańnie pieratvaryć ZŠA ŭ suśvietnuju kryptavalutnuju zvyšdziaržavu.

U lipieni minułaha hoda Kanhres ZŠA pryniaŭ šerah zakonaŭ, jakija faktyčna lehalizavali kryptavalutu. Bieły dom nazvaŭ heta zakanadaŭstva «histaryčnym aktam, jaki dazvolić Złučanym Štatam uznačalić suśvietnuju revalucyju ŭ śfiery ličbavych valut, umacuje nacyjanalnuju biaśpieku i status dołara ZŠA jak suśvietnaj reziervovaj valuty».

Pryznačany Trampam kiraŭnik Kamisii pa kaštoŭnych papierach i biržach (SEC) Poł Atkins taksama ličycca sajuźnikam kryptaindustryi.

Z momantu ŭstupleńnia na pasadu ŭ krasaviku 2025 hoda Atkins źmianiŭ padychod viedamstva, admoviŭšysia ad žorstkaha rehulavańnia praz prymusovaje pravaprymianieńnie, charakternaha dla jaho papiarednika.

• 0
• 1
• 0
• 3
• 2
• 0
• 1
• 0