70‑hadovy piensijanier vydaŭ svoj pieršy raman sam. «Tea z Hołdena» staŭ biestseleram

Alen Levi (Allen Levi) da vychadu ramana nie byŭ prafiesijnym piśmieńnikam. Za svajo žyćcio jon paśpieŭ papracavać advakatam i sudździoj, a taksama zajmaŭsia muzykaj, vystupajučy jak aŭtar piesień. Raman «Tea z Hołdena» (Theo of Golden) staŭ jaho debiutnaj mastackaj knihaj.

Hetaja amal 400‑staronkavaja kniha raspaviadaje pra pažyłoha čałavieka, jaki pryjazdžaje ŭ vydumany horad na poŭdni ZŠA i šmat času pravodzić na łaŭcy ŭ parku. Adnojčy mužčyna źviartaje ŭvahu na partrety, jakija visiać u miascovaj kaviarni, i ŭ jaho naradžajecca ideja vykupić hetyja partrety i viarnuć ich tym, chto na ich namalavany. Kniha šmat uvahi nadaje naziralnaści, razmovam pamiž ludźmi, dabryni i asabistym sustrečam zamiest znosin u internecie.

Letam 2022 hoda Levi paprasiŭ dapamahčy z vydańniem rukapisu svaju plamieńnicu Aron Ryčy. Žančyna nie mieła vopytu ŭ knižnaj śfiery, tamu pačała vyvučać płatformy dla samvydatu, sistemy raspaŭsiudu knih i sajty viadomych piśmieńnikaŭ, kab zrazumieć, jak prasoŭvać raman. Taksama jana całkam pierarabiła asabisty sajt Levi.

11 kastryčnika 2023 hoda kniha vyjšła praz servis samastojnaha vydańnia na płatformie Amazon. Ryčy razumieła, što siaredni nakład bolšaści samvydataŭskich knih składaje kala 250 asobnikaŭ, tamu pastaviła pierad saboj bolš ścipłuju, ale realistyčnuju metu — pradać značna bolš.

Pavialičyć

Jana paprasiła dziadźku skłaści śpis ludziej, ź jakimi jon paznajomiŭsia za dziesiacihodździ pracy, i razasłała im elektronnyja listy z prośbaj raskazać pra knihu siabram, knižnym kłubam, biblijatekam, cerkvam (u Amierycy heta važnyja centry miascovych supolnaściej) i miascovym kniharniam.

Adzin z prychilnikaŭ prapanavaŭ nabyć i biaspłatna razdać 99 asobnikaŭ. Paśla hetaha Ryčy źviazałasia z knižnymi kłubami i prapanavała im biaspłatnyja knihi dla čytańnia. Adhuknulisia kala 70 kłubaŭ.

Jana taksama asabista adkazvała kožnamu čytaču, jaki pisaŭ praz sajt Levi, spadziejučysia, što hetyja ludzi pakinuć vodhuki na Goodreads abo Amazon i paradziać knihu inšym.

Da kanca 2023 hoda jany pradali kala troch tysiač asobnikaŭ. Na praciahu nastupnaha hoda štodzionnyja prodažy vyraśli prykładna z 20 da 100 knih, a ahulny nakład da kanca 2024 hoda dasiahnuŭ 25 tysiač.

Ale ni Ryčy, ni Levi nie byli hatovyja da taho, što adbyłosia dalej. Zamiest paślaśviatočnaha zacišša prodažy «Tea z Hołdena» ŭ pieršaj pałovie 2025 hoda rezka ŭźlacieli, dasiahnuŭšy 125 000 asobnikaŭ. Raman pastupova nabiraŭ aŭdytoryju praz samy niaŭłoŭny miechanizm prasoŭvańnia — «sarafannaje radyjo».

U mai pradstaŭniki Simon & Schuster prapanavali nabyć pravy na aŭdyjaknihu, adnak Levi i Ryčy admovilisia. Na toj momant jany nie chacieli pieradavać kantrol nad prajektam, pośpiech jakoha staŭ dla ich niečakanaściu.

Nieŭzabavie na knihu źviarnuła ŭvahu litaraturny ahient Siuzan Hluk (Suzanne Gluck) z ahienctva WME (William Morris Endeavor), jakaja pradstaŭlaje dziasiatki viadomych aŭtaraŭ. Pra raman joj raskazała siabroŭka — redaktarka na piensii, što pračytała knihu ŭ svaim knižnym kłubie. Ahient była nastolki ŭražanaja, što napisała Levi «ŭślapuju» praź jaho veb-sajt. Na toj momant «Tea z Hołdena» ŭžo pradaŭsia nakładam bolš za 100 tysiač asobnikaŭ i zajmaŭ 38‑ie miesca ŭ ahulnym rejtynhu Amazon.

Kali ŭ lipieni praz formu zvarotnaj suviazi na sajcie aŭtara pryjšoŭ list ad Siuzan Hluk z temaj «List ad prychilnicy z WME», Ryčy i Levi zrazumieli, što im patrebny litaraturny ahient. Paśla hetaha Hluk arhanizavała aŭkcyjon pamiž vydaviectvami. Pavodle amierykanskich ŚMI, pamier prapanavanych avansaŭ dasiahaŭ siamiznačnych sum. U vyniku pravy atrymała Atria — adno z vydaviectvaŭ Simon & Schuster.

Novaje vydańnie vyjšła 3 kastryčnika 2025 hoda, pierad kaladnym siezonam prodažaŭ. U śniežni źjaviłasia aŭdyjakniha, jakuju ahučyŭ akcior Devid Mors, viadomy pa filmach «Zialonaja mila» i «Skała». Paśla hetaha nakłady pačali raści jašče chutčej.

Posmotrieť etu publikaciju v Instagram

Publikacija ot Civilization Coffee Co. (@civilcoffeecompany)

Pavodle redakcyjnaha dyrektara vydaviectva Atria Ketryn Nintcel (Katherine Nintzel), «Tea» adroźnivaŭsia ad usiaho, što kampanija bačyła na knižnym rynku. Na jaje dumku, kniha pierakonvaje čytača, što navat prostaja razmova z susiedam moža niešta źmianić, i mienavita ŭ hetym zaklučajecca jaje hałoŭny pasył.

Jak adznačaje Nincel, za 23 hady pracy ŭ knihavydańni joj jašče nie davodziłasia bačyć ničoha padobnaha. Najbližejšym prykładam jana ličyć mižnarodny biestseler šviedskaha piśmieńnika Fredryka Bakmana «Čałaviek pa imieni Uve», jaki taksama vydała Atria. Pravy na «Tea z Hołdena» ŭžo pradadzienyja ŭ 42 krainy.

Paśla pieravydańnia ramana bujnym vydaviectvam pra jaho pačali pisać i havaryć viadomyja amierykanskija žurnalisty i knižnyja ahladalniki. Knihu vybrała dla svajho knižnaha kłuba i amierykanskaja televiadučaja Keci Kuryk. U miežach hetaha prajekta jana štomiesiac abmiarkoŭvaje novuju knihu i biare intervju ŭ jaje aŭtara. «Tea z Hołdena» staŭ vybaram lutaha. Pavodle słoŭ televiadučaj, pra knihu jana daviedałasia ad siabroŭ, jakija paraili ŭklučyć jaje ŭ prajekt.

Pavodle vydaviectva, praz 32 miesiacy paśla pieršaj publikacyi «Tea z Hołdena» pa-raniejšamu pradajecca prykładna pa 100 tysiač asobnikaŭ na tydzień va ŭsich farmatach. Amal praz try hady paśla vychadu kniha taksama zastajecca ŭ piaciorcy samych papularnych knih na Amazon.

U ZŠA takich prodažaŭ mnohija aŭtary dasiahajuć tolki paśla ŭdziełu ŭ prajektach Opry Ŭinfry (Oprah Winfrey), jakaja ličycca adnoj z samych upłyvovych papularyzatarak knih u krainie. U vypadku Levi intervju dla jaje padkastu było zapisana jašče viasnoj, ale vyjdzie tolki paźniej hetym letam.

Ciapier Ałan Levi žyvie ŭ svaim majontku ŭ Džordžyi i pracuje nad praciaham historyi, jakaja dakazała, što ščyry apovied pra čałaviečuju dabryniu ŭsio jašče moža być zapatrabavany miljonami.

• 10
• 0
• 1
• 0
• 1
• 0
• 0
• 1