Трамп зарабіў больш за мільярд даляраў на крыпце за год пасля вяртання на пасаду прэзідэнта

Згодна з яго абавязковай фінансавай дэкларацыяй за 2025 год, прэзідэнт ЗША Дональд Трамп зарабіў летась больш за 1 мільярд даляраў на аперацыях з крыптавалютай, піша Бі-бі-сі.

У справаздачы аб'ёмам 927 старонак ён указаў 635 мільёнаў даляраў роялці ад крыптавалюты, створанай на аснове мема пра Трампа (мемкойн TRUMP), кошт якой рэзка знізіўся пасля запуску за некалькі дзён да яго ўступлення на пасаду прэзідэнта ЗША.

Таксама ён задэклараваў больш за 500 мільёнаў даляраў даходу ад кампаніі World Liberty Financial, якая працуе ў сферы крыптавалют і была заснавана яго сынамі разам з дзецьмі спецыяльнага прадстаўніка прэзідэнта Стыва Уіткафа.

Яшчэ мільёны даляраў Трамп атрымаў ад аперацый з нерухомасцю і продажу тавараў з яго сімволікай. Аднак Белы дом адмаўляе, што ён атрымлівае прыбытак дзякуючы прэзідэнцкай пасадзе.

Даходы, пазначаныя ў апошняй фінансавай справаздачы, значна перавышаюць паказчыкі за 2024 год, калі Трамп задэклараваў больш за 600 мільёнаў.

Белы дом неаднаразова падкрэсліваў, што Трамп перадаў свой бізнес у траст, якім кіруюць яго сыны, і адмаўляе наяўнасць якога-небудзь канфлікту інтарэсаў.

Намеснік прэс-сакратара Белага дома Ганна Келі заявіла, што прэзідэнт зрабіў Злучаныя Штаты «крыптасталіцай свету».

«Ні прэзідэнт, ні яго сям'я ніколі не мелі і ніколі не будуць мець канфлікту інтарэсаў», — гаворыцца ў яе заяве.

«Усе дзеянні прэзідэнта Трампа і яго адміністрацыі здзяйсняюцца выключна ў найлепшых інтарэсах амерыканскага народа, а ўсе так званыя «журналісты», якія сцвярджаюць адваротнае, паўтараюць адзін і той жа стары ілжывы наратыў, які дэмакраты і традыцыйныя СМІ прасоўваюць ужо дзесяць гадоў», — заявіла Келі.

Сам Трамп таксама падкрэсліў, што на яго не распаўсюджваюцца федэральныя законы аб канфлікце інтарэсаў.

Апублікаваная справаздача паказвае, што яго даходы ад крыптавалют значна перавышаюць прыбытак ад бізнесу ў сферы нерухомасці, які першапачаткова прынёс яму вядомасць.

Ён зарабіў каля 77 мільёнаў даляраў ад свайго клуба Mar-a-Lago і 122 мільёны ад гольф-клуба ў Дорале (штат Фларыда).

Больш за 30 мільёнаў прынеслі таксама гольф-клубы ў Бедмінстэры (штат Нью-Джэрсі), Джупітэры (штат Фларыда) і Тэрнберы (Шатландыя).

Паводле фінансавай дэкларацыі, Трамп таксама атрымаў мільёны долараў ад іншых бізнес-праектаў.

У прыватнасці, ён атрымаў 4,7 мільёна даляраў у выглядзе роялці ад продажу гадзіннікаў пад брэндам Trump, а таксама Біблій, красовак, парфумы і гітар з той жа гандлёвай маркай.

Першая лэдзі Меланія Трамп таксама задэкларавала свае даходы за 2025 год. Яна зарабіла 10,7 мільёна долараў па «ліцэнзійным пагадненні», звязаным з дакументальным фільмам пра яе, які выйшаў летась.

Яшчэ 6 мільёнаў долараў яна атрымала ад продажу NFT (незаменных токенаў) — лічбавых малюнкаў, якія прадаюцца праз інтэрнэт.

Прэзідэнт таксама ўказаў мільённыя паступленні ў выглядзе кампенсацый па розных судовых пазовах.

Сярод іх — 16 мільёнаў долараў па пазове супраць ABC, яшчэ 16 мільёнаў ад CBS Broadcasting і CBS Interactive, 24,5 мільёна ад Meta, 22 мільёны ад YouTube і 8 мільёнаў ад X.

Аднак Белы дом заявіў, што большая частка гэтых сродкаў будзе накіравана на стварэнне будучай прэзідэнцкай бібліятэкі Трампа або пералічана некамерцыйнай арганізацыі, якая займаецца ўтрыманнем паркавых тэрыторый у раёне Вашынгтона.

Паводле рэйтынгу самых багатых людзей свету часопіса Forbes, маёмасць Трампа ацэньваецца ў 6 мільярдаў долараў супраць 2,3 мільярда долараў у 2024 годзе. Індэкс мільярдэраў Bloomberg ацэньвае яго стан у 7,6 мільярда долараў.

Пасля вяртання ў Белы дом Трамп, які некалі называў біткойн махлярствам, пачаў выконваць сваё перадвыбарнае абяцанне ператварыць ЗША ў сусветную крыптавалютную звышдзяржаву.

У ліпені мінулага года Кангрэс ЗША прыняў шэраг законаў, якія фактычна легалізавалі крыптавалюту. Белы дом назваў гэта заканадаўства «гістарычным актам, які дазволіць Злучаным Штатам узначаліць сусветную рэвалюцыю ў сферы лічбавых валют, умацуе нацыянальную бяспеку і статус долара ЗША як сусветнай рэзервовай валюты».

Прызначаны Трампам кіраўнік Камісіі па каштоўных паперах і біржах (SEC) Пол Аткінс таксама лічыцца саюзнікам крыптаіндустрыі.

З моманту ўступлення на пасаду ў красавіку 2025 года Аткінс змяніў падыход ведамства, адмовіўшыся ад жорсткага рэгулявання праз прымусовае правапрымяненне, характэрнага для яго папярэдніка.

• 0
• 1
• 0
• 3
• 2
• 0
• 1
• 0