Jak Iłan Mask zrabiŭ chitom skandalny film pra baraćbu ź mihrantami
Tryler «Hramadzianin-mściŭca», jaki raspaviadaje pra biznesmiena, što žorstka pomścić złačyncam-mihrantam, imkliva ŭźlacieŭ u rejtynhach anłajn-servisaŭ paśla taho, jak Iłan Mask na 48 hadzin biaspłatna vykłaŭ jaho ŭ X. Što heta za film?
Film Citizen Vigilante («Hramadzianin-mściŭca») z Armi Chamieram u hałoŭnaj roli vyjšaŭ u kinateatrach ZŠA 19 červienia. Jaho režysioram i aŭtaram scenaryja staŭ niamiecki kiniematahrafist Uve Boł, jakoha časta nazyvajuć adnym z samych supiarečlivych režysioraŭ sučasnaści.
Pra što film
Pavodle siužeta, amierykanski biznesmien Sanders (jaho rolu vykonvaje Armi Chamier) biare pravasudździe ŭ svaje ruki i pačynaje palavać na złačyncaŭ-mihrantaŭ u nienazvanaj jeŭrapiejskaj krainie. Pastupova jon stanovicca hierojem dla častki hramadstva, adnak kiraŭnik Interpoła ličyć jaho pahrozaj i pastupova vychodzić na śled samoha mściŭcy.
Režysior pačynaje film scenaj, u jakoj čarnaskury mužčyna ŭ kapiušonie siarod biełaha dnia zabivaje maci na vačach u jaje maleńkaha syna. Paźniej pakazvajuć jašče adzin epizod: baćki hvałtaŭnika nastojvajuć, što vychoŭvajuć syna ŭ adpaviednaści z kaštoŭnaściami Karana.
Sam Boł nazyvaje stužku «žorstkim palityčnym filmam» i śćviardžaje, što natchniŭsia rezanansnaj spravaj u Hamburhu ŭ 2016 hodzie, kali troje padletkaŭ, pryznanych vinavatymi ŭ hrupavym zhvałtavańni, atrymali ŭmoŭnyja terminy.
Pavodle słoŭ režysiora, niamieckaja sistema ŭzrostavaj kłasifikacyi FSK (Freiwillige Selbstkontrolle der Filmwirtschaft) admoviłasia vydavać filmu siertyfikat, bo paličyła, što jon «padbuchtorvaje da hvałtu suprać mihrantaŭ». Boł sprabavaŭ asprečyć hetaje rašeńnie praz sud, ale biezvynikova.
Krytyki sustreli stužku vielmi surova. Recenzient Variety Tod Hiłkryst nazvaŭ film «hvałtoŭnaj, biazładnaj i maralna bankruckaj pravakacyjnaj stužkaj, raźličanaj na ekspłuatacyju samych nizkich instynktaŭ hledača», dadaŭšy, što karcina «nastolki ašałamlalna kiepskaja, što zdajecca, niby Boł naŭmysna sabatuje viartańnie svajoj hałoŭnaj zorki».
Dla Chamiera heta sapraŭdy stała pieršaj bujnoj rolaj paśla hučnych abvinavačvańniaŭ u zhvałtavańni i seksualnym hvałcie. U 2023 hodzie prakuratura Łos-Andželesa admoviłasia vystaŭlać jamu kryminalnyja abvinavačvańni, a sam akcior admaŭlaje ŭsie abvinavačvańni.
Šlach da pośpiechu
Niečakany pavarot u losie karciny adbyŭsia paśla taho, jak Iłan Mask paprasiŭ dazvoł biaspłatna apublikavać jaje na svajoj staroncy ŭ X. Pavodle słoŭ režysiora, Mask źviazaŭsia nie ź im asabista, a z kamandaj jaho padkasta Uwe Boll Raw. Spačatku Boł vyrašyŭ, što paviedamleńnie čyjści žart. Adnak, pierakanaŭšysia, što zapyt sapraŭdy pastupiŭ ad Maska, jon pahadziŭsia.
«Ja nie razmaŭlaŭ ź im asabista. Heta adbyłosia vielmi chutka. Ja nie viedaju, čym jon zajmajecca štodnia, ale jaho ŭvaha pieraklučajecca imhnienna. Kali b my nie pahadzilisia, jon by prosta pajšoŭ dalej», — cytuje Variety režysiora.
Jak piša The Guardian, umiašańnie Maska nadało filmu asablivy status u «kulturnaj vajnie», u jakoj miljarder rehularna padtrymlivaje pravaradykalnyja antymihranckija nastroi.
U čaćvier, 25 červienia, Mask biaspłatna apublikavaŭ film na svajoj staroncy ŭ X, dzie ŭ jaho kala 240 miljonaŭ padpisčykaŭ. Na praciahu nastupnych 48 hadzin tryler byŭ dastupny ŭsim karystalnikam płatformy.
Paśla hetaha karcina rezka nabrała papularnaść: jana padniałasia na druhoje miesca ŭ rejtynhu Apple TV u ZŠA i na pieršaje miesca pa kolkaści prakataŭ na Amazon.
Nieŭzabavie kampanija Quiver Distribution, jakaja zajmałasia prakatam filma ŭ ZŠA, nabyła pravy na jaho suśvietnuju dystrybucyju (za vyklučeńniem Vialikabrytanii, niamieckamoŭnych krain, Paŭdniovaj Karei i Tajvania). U Paŭnočnaj Amierycy film užo dastupny ŭ iTunes, Amazon, Fandango i Google Play.
Režysior pryznaje, što rašeńnie biaspłatna vykłaści film u X maje jak plusy, tak i minusy: «Vy atrymlivajecie šmat pijaru, ale nie šmat hrošaj. Praz čatyry—šeść tydniaŭ my zrazumiejem, ci pryniesła heta prybytak u vyniku».
Na hety momant pry biudžecie ŭ 2 miljony dalaraŭ film zarabiŭ kala 600 tysiač dalaraŭ na ličbavych płatformach.
Paśla niečakanaha pośpiechu Boł užo anansavaŭ praciah, dziejańnie jakoha budzie razhortvacca ŭ ZŠA abo Vialikabrytanii. Jon pryznaŭsia, što scenar jašče nie napisany, ale vykazaŭ upeŭnienaść, što Armi Chamier achvotna vierniecca da hałoŭnaj roli.
Keep watching Citizen Vigilante and we can start shooting Part 2 soon pic.twitter.com/wmf5MHMCwk
Cikavy fakt: pieršapačatkova Boł chacieŭ nazvać film The Dark Knight («Ciomny rycar»), ale paśla, jak jon sam vykazaŭsia, «siabroŭskaj razmovy» sa studyjaj Warner Bros., jakaja vałodaje pravami na Betmiena, byŭ vymušany źmianić nazvu na Citizen Vigilante.
Ciapier čytajuć
«U mianie tolki adna mara — viarnuć svajho Dzimku». Maci byłoha palitviaźnia Dźmitryja Hopty raskazvaje pra novuju biadu syna. I prosić zamaŭlać u jaje bolš tortaŭ, kab spravicca4
Kamientary