U Kanadzie małady biełarus kiravaŭ suteniorskaj sietkaj, siedziačy ŭ miascovym SIZA

Sud pravincyi Kviebiek (Kanada) vynies prysud u dačynieńni da ŭradženca Biełarusi Siarhieja Klanoŭskaha, jaki, znachodziačysia ŭ miascovym SIZA, kiravaŭ sietkaj suteniorstva praz kantrabandny mabilny telefon.

Klanoŭski — adzinaje dzicia ŭ siamji. U Kanadu jon pryjechaŭ z baćkami va ŭzroście 4 hadoŭ, nieŭzabavie jany razyšlisia. Baćka pracavaŭ u śfiery dalokich aŭtapieravozak, bolšuju častku času jaho nie było doma. Maci pracavała prybiralščycaj.

U pačatkovaj škole ciažkaściej u jaho nie było, adnak u siaredniaj škole jon sutyknuŭsia z prablemami praz prahuły. Atestat ab siaredniaj adukacyi jon atrymaŭ užo va ŭzroście 21 hoda praź sistemu adukacyi dla darosłych.

U padletkavym uzroście ŭ jaho pačalisia kanflikty z zakonam — pavodle jaho słoŭ, častka siabroŭ «drenna na jaho ŭpłyvali», dałučyŭšy da ałkaholu i narkotykaŭ. Marychuanu, darečy, jon praciahvaŭ užyvać i ŭ źniavoleńni.

U padletkavyja hady Klanoŭski dapamahaŭ ajčymu zahružać hruzaviki na składzie, dzie toj pracavaŭ, a taksama vykonvaŭ rabotu dvornika ŭ domie, dzie žyŭ, niekalki miesiacaŭ pracavaŭ u piakarni-kafe. U 16 hadoŭ jaho nakiravali ŭ centr dla niepaŭnaletnich, dzie jon prabyŭ da 18 hadoŭ z-za parušeńniaŭ umoŭ utrymańnia. Pastajannaj pracy na poŭny dzień jon nikoli nie mieŭ, adnak za niekalki miesiacaŭ da aryštu kupiŭ aŭtamabil, jaki zdavaŭ u arendu asobam z drennaj kredytnaj historyjaj.

Pavodle materyjałaŭ spravy, Klanoŭski paznajomiŭsia z žančynaj pad inicyjałami M.Ch. jašče budučy pad vartaj u śledčym izalatary Manreala. Jana pačała zajmacca prastytucyjaj, a prybytak pieradavaŭsia Klanoŭskamu. Kantakt pamiž imi padtrymlivaŭsia štodnia praz telefon, jaki jon zdoleŭ zajmieć u źniavoleńni.

U lutym 2020 hoda, z dazvołu Klanoŭskaha, M.Ch. zavierbavała jašče adnu žančynu — 21‑hadovuju A.A., jakaja na toj momant apynułasia ŭ składanym finansavym stanoviščy paśla taho, jak maci vyhnała jaje z domu.

Dźvie žančyny vypravilisia ŭ Vankuvier, dzie, pavodle pačatkovaj damoŭlenaści, A.A. pavinna była addavać 50% zarobku. U vyniku ź jaje patrabavali ŭžo 100% i poŭnaściu kantralavali jaje pieramiaščeńni, kantakty i hrafik pracy.

Analiz telefona Klanoŭskaha paśla aryštu pakazaŭ bolš za 12 tysiač tekstavych paviedamleńniaŭ pamiž im i M.Ch. U paviedamleńniach jon kantralavaŭ raźmierkavańnie zaroblenych hrošaj pa roznych bankaŭskich rachunkach i cisnuŭ na M.Ch., kab taja trymała ŭ rukach A.A.

Kali A.A. zakachałasia ŭ klijenta i pasprabavała spynić zaniatki prastytucyjaj, Klanoŭski i M.Ch. pačali joj pahražać. U vyniku A.A. zastałasia adna, biez hrošaj i žylla, u nieznajomym horadzie — paśla čaho źviarnułasia ŭ palicyju.

Sud pryznaŭ Klanoŭskaha vinavatym u handli ludźmi, atrymańni materyjalnaj vyhady ad hetaha handlu, zapałochvańni ŭ dačynieńni da A.A., a taksama ŭ atrymańni vyhady ad seksualnych pasłuh i suteniorstvie ŭ dačynieńni da M.Ch.

Ahułam kryminalny rejestr Klanoŭskaha naličvaje dziasiatki zalotaŭ — za kradziažy, šantaž, udzieł u seksualnym hvałcie, machlarstva i šmatlikija parušeńni ŭmoŭ dahladu. Znachodziačysia pad vartaj, jon taksama atrymaŭ 17 dyscyplinarnych pratakołaŭ, u tym liku za zachavańnie zbroi i ŭdzieł u žorstkim napadzie na surazmoŭcu pa kamiery.

Sudździa pryznačyła Klanoŭskamu 7 hadoŭ źniavoleńnia za handal ludźmi, 4 hady — za atrymańnie vyhady ad handlu ludźmi, 2 hady — za zapałochvańnie (usie terminy — paralelna), a taksama 4 i 3 hady adpaviedna pa punktach suteniorstva i atrymańnia vyhady ad suteniorstva ŭ spravie M.Ch. Uličvajučy, što biełarus pravioŭ pad vartaj jašče da prysudu amal siem hadoŭ, bolšaść terminaŭ užo ličacca adbytymi — akramia 54 dzion pa hałoŭnym punkcie handlu ludźmi.

Tak što praz dva miesiacy paśla suda jaho adpuścili.

Akramia taho, sud pryznaŭ Klanoŭskaha «daŭhaterminovym złačyncam» (long-term offender) i pryznačyŭ jamu 10 hadoŭ nahladu paśla vyzvaleńnia — z ulikam taho, što jon płanuje adnavić adnosiny z M.Ch. paśla vyzvaleńnia, a jaho matyvacyja da reabilitacyi, pavodle ekśpierta, «vyklikaje sumnievy».

• 0
• 0
• 2
• 9
• 3
• 0
• 3
• 0