Pamior movaznaŭca i dypłamat Piotra Sadoŭski

Pra śmierć Piatra Sadoŭskaha paviedamiła ŭ sacsietkach jaho dačka Alina.

«Siabry, pozna ŭviečary ŭ chośpisie pamior moj baćka, aŭtar knihi «Moj Šybalet» Piotra Sadoŭski. Raźvitańnie zaŭtra, paviedamlu dadatkova», — napisała jana.

87‑hadovy Piotra Sadoŭski — vybitny biełaruski movaznaviec, jaki ŭ 1990‑ia staŭ deputatam Viarchoŭnaha Savieta, a paźniej — pieršym pasłom Biełarusi ŭ Niamieččynie.

Uradženiec Połaččyny, dzicia vajny, jon straciŭ na toj vajnie tatu-partyzana, jaki pamior u jaho na vačach. Vyvučyŭšysia ŭ Suvoraŭskaj vučelni, jon paźniej z vajskovaj darohi pierajšoŭ u linhvistyku — bałazie, u Suvoraŭskaj jamu vykładaŭ vybitny pierakładčyk i aficer-frantavik Jazep Siemiažon.

Piotra Sadoŭski vyvučaŭ i vykładaŭ zamiežnyja movy, pracavaŭ u Instytucie zamiežnych moŭ, Akademii navuk i, pierakładčykam, u roznych pradpryjemstvach Minska.

Luboŭ jaho žyćcia — heta biełaruskaja mova, a jahony asabisty raj — paŭnočnabiełaruskija havorki, jakija jaho ŭskałychali i jakija jon viedaŭ najlepš siarod usich va ŭsim śviecie.

«Moj šlach u movaznaŭstva pačaŭsia ź Piotry Sadoŭskaha, ź viekapomnaj dyskusii pra tłumačalny słoŭnik, jaki zapačatkavała jahonaja recenzija «Čas odumu» (časopis «Połymia» 1986, № 5). Heta jak kod DNK, jaki zakładvajecca ŭ čałavieka pry začaćci», — pisaŭ vybitny movaznaviec Jury Paciupa.

Sadoŭski byŭ adnym z padpisantaŭ pieršych listoŭ u abaronu biełaruskaj movy i kultury — chadajnictvaŭ, jakija dasyłalisia jašče ŭ Maskvu. Paźniej jon byŭ adnym z zasnavalnikaŭ Narodnaha Frontu i tryumfalna pieramoh u adnoj ź minskich akruh na svabodnych vybarach 1990 hoda. Sadoŭski byŭ nastolki aŭtarytetnym čałaviekam, što ŭ parłamiencie, dzie BNF byŭ u mienšaści, byŭ abrany staršyniom kamisii pa zamiežnych spravach.

Paśla zdabyćcia Biełaruśsiu niezaležnaści jon u 1992 hodzie byŭ pryznačany pieršym u historyi pasłom našaj krainy ŭ Niamieččynie. Ambasadu tam stvaraŭ z nula.

U 2019 hodzie Sadoŭskaha, 80-hadovaha, sudzili i aštrafavali za vystup suprać intehracyi z Rasijaj, u abaronu niezaležnaści, na Kastryčnickaj płoščy Minska.

Jaho časam praniźlivyja, a časam analityčnyja ŭspaminy «Moj šybalet» vyjšli ŭ 2008 hodzie. Heta adna z najcikaviejšych knih pra toje, što pieražyvaje ŭ sercy čałaviek, jaki «robić siabie sam» — pra siratu z-pad Vietryna, jaki ŭłasnym rozumam daros da vialikaj navuki i dypłamatyčnych viaršyń. Jana adnačasova pra patajemna asabistaje, jak dziacinstva ŭ paślavajennaj vioscy, siarod adnych žančyn, bo ŭsich mužčyn vykasiła vajna. 

• 0
• 0
• 0
• 0
• 0
• 49
• 0
• 3