NASA šukaje dobraachvotnikaŭ dla prahramy teściravańnia žyćcia na Miesiacy i Marsie

Kaśmičnaje ahienctva ZŠA płanuje nabrać čatyroch udzielnikaŭ dla prahramy daśledavańniaŭ Miesiaca i Marsa (MMEA) — hadavoha simulacyjnaha prajekta, raspracavanaha dla prajhravańnia ŭmoŭ palotu i žyćcia na Miesiacy i Marsie, piša CNN. 

Choć heta i nie sapraŭdny palot, vałanciory buduć znachodzicca ŭ kaśmičnych umovach, žyć u zamknionych prastorach i vykonvać zadańni, jak astranaŭty: vyroščvać uradžaj, sačyć za svaim zdaroŭjem i imitavać vychady ŭ adkryty kosmas.

12‑miesiačnaja prahrama pačniecca nie raniej za žnivień 2027 hoda i budzie bazavacca ŭ Kaśmičnym centry imia Džonsana ŭ Chjustanie. Pradstaŭnik NASA paviedamiŭ CNN, što daśledčaja prahrama dapamoža źnizić ryzyki, ź jakimi astranaŭty mohuć sutyknucca padčas palotaŭ u kosmas i vysadki na Mars.

Kandydaty pavinny być hramadzianami ZŠA abo ŭładalnikami hryn-karty va ŭzroście ad 30 da 55 hadoŭ (choć mohuć razhladacca i ludzi pa-za hetym uzrostavym dyjapazonam). Jany taksama pavinny mieć rost nie vyšej za 1,88 mietra i svabodna vałodać anhlijskaj movaj.

Patencyjnyja ŭdzielniki pavinny być hatovyja pryśviacić 14 miesiacaŭ prahramie ŭ Kaśmičnym centry, što ŭklučaje 12 miesiacaŭ unutry dźviuch zamknionych prastor, a taksama jašče dva miesiacy na padrychtoŭku da misii i treniroŭki paśla jaje.

Jany pavinny prajści fizičnyja i psichałahičnyja testy.

Kandydaty pavinny mieć kvalifikacyju, «padobnuju da astranaŭtaŭ», naprykład, stupień bakałaŭra ŭ halinie inžynieryi, bijałahičnych navuk, fizičnych navuk abo matematyki. Vajenny vopyt taksama budzie ŭličvacca.

Dva žyłyja moduli

Pradstaŭnik NASA paviedamiŭ CNN, što prajekt budzie padzieleny na try siehmienty z vykarystańniem dvuch roznych žyłych modulaŭ.

«Pieršy budzie prachodzić unutry makieta kaśmičnaha karabla płoščaj 60 kvadratnych mietraŭ, dzie vałanciory buduć žyć tak, byccam jany laciać ź Ziamli na Miesiac abo Mars», — raspaviała CNN pradstaŭnik Kełsi Spajvi.

Čatyry členy ekipaža buduć mieć ułasnyja nievialikija kajuty, uklučajučy prastoru dla žyćcia, pracy i snu, a taksama maleńkuju prybiralniu.

Druhi etap pieravodzić vałancioraŭ ad palotu da žyćcia na pavierchni inšaj płaniety.

Členy ekipaža pierajeduć u adnapaviarchovy kompleks płoščaj 84 kvadratnyja mietry, dzie buduć vyroščvać uradžaj, kłapacicca pra svajo zdaroŭje i dabrabyt, a taksama praktykavacca ŭ vychadach u kosmas.

Treciaja faza budzie viartańniem na Ziamlu ŭ tym ža kaśmičnym karabli.

Choć NASA praviało 28 simulacyj palotu i dźvie simulacyi pavierchnievaha pražyvańnia, heta budzie pieršy prajekt, jaki abjadnaje abodva elemienty.

«Novaja acenka rečaŭ»

Siarod udzielnikaŭ papiaredniaj padobnaj misii byŭ Nejtan Džons, doktar ź Ilinojsa, jaki natknuŭsia na artykuł pra nabor vałancioraŭ padčas načnych dziažurstvaŭ u 2021 hodzie.

Pavialičyć

Praz dva hady jon słužyŭ miedycynskim aficeram ekipaža ŭnutry Mars Alpha Dune — simulatara marsijanskaha asiarodździa ad NASA.

Jon raspavioŭ CNN, što hety vopyt uzmacniŭ jaho ambicyi stać astranaŭtam.

Adnak hadavoje daśledavańnie było źviazana z emacyjnymi vyprabavańniami dla 43‑hadovaha Džonsa, hałoŭnym ź jakich była tuha pa žoncy i dzieciach.

«Było ciažka prapuskać takija vialikija padziei, jak dni naradžeńnia, śviaty, vypusknyja, pachavańni i viasielli», — skazaŭ jon.

Džons adznačyŭ, što paśla misii pačaŭ pa-novamu canić prostyja rečy ŭ žyćci: «Ježa NASA była dobraj, ale mieniu abaviazkova abmiežavanaje, i ničoha nie było śviežaha, akramia niekalkich harodnin, jakija my vyroščvali. U misii nie było soniečnaha śviatła ci vietru. Tamu ja pa-novamu acaniŭ takija rečy, kali misija zaviaršyłasia».

• 1
• 0
• 0
• 0
• 0
• 0
• 0
• 0