Šmatdzietnaja rasijanka chacieła pazbavicca sužyciela-biełarusa, tamu zajaviła ŭ palicyi, što jon piedafił

Kiemlivaja rasijanka prydumała biasprojhryšnuju — jak joj zdavałasia — schiemu, kab sapsavać žyćcio svajmu sužycielu. Šmatdzietnaja maci Śviatłana Somava z horada Chołm Naŭharodskaj vobłaści Rasii pryjšła ŭ adździeł palicyi i zajaviła, što jaje sužyciel-biełarus raździavaŭ ich troch małych dačok i demanstravaŭ im pałavyja orhany.

Kali b mužčynu pasadzili, to jon mała taho što atrymaŭ by kaśmičny termin i nievynosnyja ŭmovy žyćcia ŭ turmie, dyk paśla jaho b jašče i departavali z Rasii. U pryncypie, usio toje, što jana i chacieła.

Supracoŭniki palicyi pabačyli, što Śviatłana ściele svaju lehiendu nie nadta hładka, tamu papiaredzili jaje ab kryminalnaj adkaznaści za iłžyvy danos, adnak jana nastojvała na svaich słovach.

Daviałosia pačynać pravierku. 

Kali dziaciej apytali ŭ prysutnaści śpiecyjalista orhanaŭ apieki, usie try dziaŭčynki paviedamili, što baćka nikoli ich nie čapaŭ i hołym pierad imi nie chadziŭ, a havaryć pra «damahańni» ich paprasiła sama maci.

Tolki paśla hetaha žančyna pryznałasia śledčym, što abvinavačańnie vydumała, kab nazaŭždy pazbavicca ad sužyciela: jana bajałasia, što pry zvyčajnaj departacyi za nielehalnaje znachodžańnie ŭ Rasii jon potym prosta vierniecca.

Śviatłanie nie padabałasia, što apošnim časam staŭ złoŭžyvać ałkaholem i nie pracavaŭ — žyŭ pa sutnaści na dziciačuju dapamohu. Kali ćviarozy, to da dziaciej staviŭsia narmalna — nie biŭ, nie kryŭdziŭ. A voś kali pjany, to pravakavaŭ kanflikty, skandaliŭ. Raniej jana ŭžo niekalki razoŭ sychodziła ad jaho da maci, ale viartałasia. U vyniku vyrašyła, što jon nie źmienicca, i zachacieła pazbavicca ad jaho kančatkova.

Jak vynikaje z pakazańniaŭ śviedak, ideju źviarnucca ŭ palicyju žančynie padała znajomaja, jakaja raiła napisać zajavu mienavita na departacyju praz toje, što mužčyna — hramadzianin Biełarusi. Ale sama Somava vyrašyła pajści jašče dalej.

U vyniku spravu zaviali na samu Somavu — pa častcy 2 artykuła 306 KK Rasii za iłžyvy danos z abvinavačvańniem u asabliva ciažkim złačynstvie. U sakaviku 2024 hoda joj pryznačyli pakarańnie, ale nižej za nižniuju miažu — štraf u pamiery prykładna $300 z raźbiŭkaj na paŭhoda.

Los biełarusa, jakoha biespadstaŭna abvinavacili ŭ piedafilii, u pryhavory asobna nie apisany. Što dakładna viadoma, dyk heta toje, što jaho ŭsio ž źbiralisia departavać z Rasii za nielehalnaje znachodžańnie. Mužčynu zakinuli ŭ centr časovaha ŭtrymańnia zamiežnikaŭ.

• 0
• 0
• 0
• 6
• 0
• 0
• 2
• 0