Narviehija stvaraje «Tinder dla navukoŭcaŭ i biznesu». Urad budzie apłačvać «pieršaje spatkańnie»
Narviehija vyrašyła niezvyčajnym sposabam zblizić navuku i biznes. Novaja dziaržaŭnaja płatforma pavinna dapamahčy kampanijam znachodzić daśledčykaŭ jašče da taho, jak u ich źjavicca hatovy daśledčy prajekt. Ministr daśledavańniaŭ i vyšejšaj adukacyi paraŭnała jaje z papularnym dadatkaŭ dla znajomstvaŭ i zajaviła, što dziaržava voźmie na siabie vydatki na hetaje «pieršaje spatkańnie».
Narviehija ŭžo niekalki hadoŭ sprabuje naładzić bolš ščylnaje supracoŭnictva pamiž navukaj i biznesam, kab daśledavańni čaściej stanavilisia asnovaj dla novych praduktaŭ, pasłuh i kampanij.
Pavodle źviestak dziaržaŭnaha partała ŭrada Narviehii, siońnia tolki dźvie z 50 najbujniejšych kampanij Paŭnočnaj Jeŭropy, jakija zajmajucca daśledavańniami i raspracoŭkami, źjaŭlajucca narviežskimi. Narviežski biznes inviestuje ŭ daśledavańni i raspracoŭki mienš za 1% vałavoha ŭnutranaha praduktu, tady jak u inšych paŭnočnych krainach i ŭ siarednim pa dziaržavach Arhanizacyi ekanamičnaha supracoŭnictva i raźvićcia hety pakazčyk składaje kala 2% VUP.
«My raspracoŭvajem zamała novych patentaŭ, praduktaŭ, pasłuh i kampanij, zasnavanych na narviežskich daśledavańniach. Narviežski biznes niedastatkova inviestuje ŭ navuku, a vyniki daśledavańniaŭ zanadta redka znachodziać praktyčnaje prymianieńnie. Tamu my vyrašyli heta źmianić», — zajaviła ministr daśledavańniaŭ i vyšejšaj adukacyi Sihrun Osłan.
Pieršym krokam pavinna stać Koblingsboks — novaja dziaržaŭnaja prahrama, zapusk jakoj zapłanavany na vosień 2026 hoda. Jaje zadača — dapamahčy kampanijam i navukovym ustanovam znajści adna adnu jašče da taho, jak źjavicca hatovy daśledčy prajekt abo budzie sfarmulavanaja kankretnaja daśledčaja zadača.
Apisvajučy novuju inicyjatyvu, ministr vykarystała niezvyčajnaje paraŭnańnie.
«Heta budzie novy Tinder dla biznesu i navukoŭcaŭ. My budziem źviazvać kampanii i daśledčyja ŭstanovy, a dziaržava apłacić hetaje spatkańnie», — skazała Osłan.
Pavodle ŭrada, siońnia mnohija kampanii chacieli b skarystacca navukovaj ekśpiertyzaj, ale nie viedajuć, da kaho źviarnucca, abo ličać, što dla supracoŭnictva nieabchodna adrazu rychtavać paŭnavartasny daśledčy prajekt. Novaja prahrama pavinna likvidavać hety barjer.
U miežach Koblingsboks kampanii zmohuć atrymać dziaržaŭnaje finansavańnie, jakoje pakryje da 150 hadzin pracy daśledčykaŭ. Pry hetym ad biznesu nie buduć patrabavać ni hatovaha prajekta, ni dakładna sfarmulavanaj daśledčaj zadačy. Dastatkova mieć ideju, prablemu abo pytańnie, jakija možna abmierkavać z navukoŭcami.
Kampanija zmoža samastojna źviarnucca ŭ patrebny ŭniviersitet abo daśledčy instytut albo paprasić Narviežskuju daśledčuju radu dapamahčy znajści adpaviednych śpiecyjalistaŭ. Paśla padačy sproščanaj zajaŭki adkaz abiacajuć dać ciaham dvuch tydniaŭ.
Ideja prahramy zaklučajecca ŭ tym, kab baki mahli bieź lišnich biurakratyčnych pieraškod paznajomicca, abmierkavać mahčymaści supracoŭnictva i zrazumieć, ci varta raźvivać sumiesny prajekt. Urad spadziajecca, što takoje «pieršaje spatkańnie» stanie pačatkam doŭhaterminovaha partniorstva pamiž biznesam i navukaj.
Koblingsboks stanie tolki pieršym etapam prahramy. U 2027 hodzie płanujuć zapuścić jaje praciah: kampanii zmohuć atrymać da 500 tysiač narviežskich kron (prykładna 45 tysiač jeŭra) na ŭžo paŭnavartasny sumiesny daśledčy prajekt z navukova-daśledčaj ustanovaj. U svaju čarhu daśledčyki zmohuć pretendavać na hranty, jakija dazvolać im da troch miesiacaŭ pracavać niepasredna ŭ kampanijach.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam3030
Kamientary