Dziaŭčyna ŭ Homieli schadziła da stamatołaha i była ŭražanaja canoj. Paśla publičnaha skandału canu źnizili
Žycharka Homiela raskazała ŭ sacyjalnaj sietcy Threads, što zapłaciła ažno 410 rubloŭ za prafiesijnuju čystku zuboŭ u pryvatnaj stamatałahičnaj klinicy «Ju-Klinik». Pa jaje słovach, takaja cana stała dla jaje niečakanaściu, tamu dziaŭčyna vyrašyła spytać, što nakont hetaha dumajuć inšyja karystalniki, piša BG.Media.
Publikacyja chutka nabyła šyroki rozhałas. Mnohija adznačyli, što košt pracedury vyhladaje zavyšanym, a najbolš pytańniaŭ vyklikała detalizacyja rachunka, u jakim asobna byli paznačanyja materyjały i raschodnyja elemienty.
Niekatoryja karystalniki pryviali prykłady, što ŭ inšych pryvatnych klinikach padobnaja pracedura kaštuje prykładna ŭdvaja tańniej. Da abmierkavańnia dałučylisia i stamatołahi, jakija taksama vykazali ździŭleńnie asobnymi pazicyjami ŭ rachunku.
Paśla hramadskaha rezanansu administracyja kliniki razhledzieła zvarot pacyjentki i prapanavała joj indyvidualnuju źnižku. U vyniku košt pracedury byŭ źmienšany da 282 rubloŭ 10 kapiejek, što amal na 128 rubloŭ mienš za pieršapačatkovuju sumu.
Paźniej dziaŭčyna paviedamiła, što ŭ klinicy rastłumačyli vysoki košt tym, što čystka pravodziłasia na ŭsich jaje 28 zubach. Adnak jana zajaviła, što nie ličyć takoje tłumačeńnie dastatkova pierakanaŭčym. Pry hetym pacyjentka padkreśliła, što nie maje pretenzij da jakaści akazanaj pasłuhi i pracy piersanału — pytańni ŭ jaje ŭźnikli tolki nakont cenaŭtvareńnia.
Paśla hetaha pradstaŭniki kliniki paprasili dziaŭčynu vydalić apublikavanyja fatahrafii dakumientaŭ, pakolki na ich byli bačnyja piersanalnyja danyja supracoŭnikaŭ. Taksama ŭ klinicy zajavili, što dalejšaje raspaŭsiudžvańnie hetych materyjałaŭ moža nanieści škodu jaje dziełavoj reputacyi.
Ciapier čytajuć
Błohier Siaroha z Rasii pryjechaŭ na Zybickuju z kachanaj błohierkaj Aniečkaj. Vynik: źbity im biełarus u komie, a Siaroha na 5,5 hoda za kratami32
Kamientary
Na 128rubloŭ joj nielha zhadžacca.