Błohier Siaroha z Rasii pryjechaŭ na Zybickuju z kachanaj błohierkaj Aniečkaj. Vynik: źbity im biełarus u komie, a Siaroha na 5,5 hoda za kratami
Siaroha akazaŭsia majstram sportu pa boksie i z adnaho ŭdaru ledź nie zabiŭ vypadkovaha prachožaha. Jaho niaviesta ciapier abvinavačvaje svajakoŭ achviary ŭ vymahalnictvie.
Aniečka — heta rasijskaja łajfstajł-błohierka Hanna Paramonava. Na jaje instahram padpisana 346 tysiač čałaviek, na telehram-kanał — 400 tysiač, na tyktok — 1,3 miljona. Siarhiej Cimafiejeŭ, jaje chłopiec, taksama błohier. U jaho 205 tysiač padpisčykaŭ u tyktoku.
U pary taksama jość ahulny YouTube-kanał «Aniečka i Siaroha» (amal 15 tysiač padpisčykaŭ). A jašče kala 109 tysiač padpisčykaŭ na ich ahulnym akaŭncie ŭ tyktoku.
Hod tamu Siaroha zrabiŭ kachanaj prapanovu ruki i serca ŭ Anapie — adbyłosia heta padčas palotu na pavietranym šary. Para šmat raspaviadała pra padrychtoŭku da viasiella. Ale ciapier usie płany na paŭzie, bo chłopiec trapiŭ u Biełarusi za kraty.
Pačałosia ŭsio sioleta 8 sakavika. Rasijskija błohiery prylacieli ŭ Minsk, kab razam ź siabrami patusić na Zybickaj. A skončyłasia trahiedyjaj.
Voś što pra kanflikt pisali ŭ dziaržaŭnych miedyja.
Hulajučy ŭnačy pa nabiarežnaj, kampanija (Siarhiej apisany jak 21‑hadovy biespracoŭny zamiežnik) turystaŭ pabačyła dvuch maładzionaŭ, jakija byli apranuty nie pa siezonie. Pačatak sakavika, a chłopcy stajali ŭ majkach. Plus da taho, adzin ź ich navat biez krasovak.
Niechta z kampanii turystaŭ padaŭ abutak niebaraku i pažartavaŭ, što treba apranacca z ulikam siezonu. Ledź apranutyja chłopcy ŭ adkaz «paprasili pakinuć svajo mierkavańnie pry sabie».
Takaja parada daviała Siarohu da šalenstva. Pačuŭšy niepryjemnyja słovy, Siaroha (jaki miž inšym zajmaŭsia boksam) udaryŭ kułakom niavietlivaha surazmoŭcu. Adnaho ŭdaru chapiła — chłopiec upaŭ na asfalt i straciŭ prytomnaść. Za jaho pasprabavaŭ zastupicca siabar — ale taksama atrymaŭ udar u hałavu i ŭpaŭ na ziamlu.
Dalej źjaviŭsia AMAP, jaki zatrymaŭ udzielnikaŭ kanfliktu. Adnaho z paciarpiełych zabrała chutkaja dapamoha — im byŭ 29‑hadovy biełarus Andrej Ściepančuk, jaki atrymaŭ vielmi ciažkuju traŭmu hałavy i mozhu. Jon trapiŭ u komu.
Suprać Siarohi zaviali kryminalnuju spravu pa dvuch artykułach: č. 2 art. 147 KK (naŭmysnaje pryčynieńnie ciažkaha cialesnaha paškodžańnia z chulihanskich pabudžeńniaŭ) i č. 1 art. 339 KK (chulihanstva).
Vinu baksior całkam pryznaŭ.
Aniečka ž u svaim telehram-kanale kanflikt apisvaje tak.
Pa jaje słovach, 8 sakavika kampanija dobra adśviatkavała na Zybickaj. Maładyja ludzi išli da taksi, kali raptam pabačyli dvuch vidavočna pjanych chłopcaŭ bieź vierchniaha adzieńnia — tyja stajali basanož na śniezie: «Jak lubyja adekvatnyja ludzi, my nie mahli prajści mima. Padali im abutak, spytali, dzie ich kurtki, chacieli vyklikać im taksi dadomu. Na što atrymali adkaz: «Pajšli vy nach*j adsiul, vas heta ja*ać nie pavinna».
Błohierka pierakonvaje: nieznajomcy pieršyja pačali šturchacca, a taho momantu, kali jaje kachany adnym udaram ledź nie zabiŭ čałavieka, jana nie bačyła. Maŭlaŭ, tolki potym na videa z kamier nazirańnia.
Aniečka zapeŭnivaje: Siaroha ŭžo kinuŭsia dapamahać Andreju i sam chacieŭ vyklikać chutkuju — ale pieraškodziŭ AMAP.
Dziaŭčyna abvinavačvaje rodnych chłopca, jaki i pa siońnia znachodzicca ŭ komie, u vymahalnictvie: «Ja i svajaki Siarožy nieadnarazova latali ŭ Minsk, damaŭlalisia ab sustrečach, tracili vielmi šmat hrošaj na pieraloty, kab paśla prylotu nam skazali: «Nam niama pra što z vami razmaŭlać, kuplajcie trochpakajovuju kvateru — i tady ŭsio budzie dobra». My ž prapanoŭvali lačeńnie ŭ najlepšych klinikach Jeŭropy. Siamja chłopca zajaviła, što im patrebnaja kvatera. Kaniečnie, takich hrošaj u mianie nie akazałasia».
Błohierka śćviardžaje, što apłaciła pieršuju apieracyju Andreju (pryblizna $19500), prapanoŭvała apłacić druhuju (u dva razy daražejšuju) u maskoŭskaj klinicy, ale rodnyja byccam by admovilisia vieźci tudy chłopca. Taksama Aniečka dadaje, što apłačvała najlepšaha advakata dla achviary, jaki pracavaŭ faktyčna suprać jaje žanicha. A jašče, što vypłaciła svajakam paciarpiełaha bolš za $39 tysiač.
Dziaŭčyna piša, byccam u sudzie baćki Andreja patrabavali ad jaje miljon dalaraŭ. «Pry hetym štodnia na praciahu čatyroch miesiacaŭ mnie žadajuć śmierci. Paśla apošniaha pasiadžeńnia da mianie padyšła advakat paciarpiełaha i z uchmyłkaj skazała: «Dziaŭčynka, ja viedaju, što ŭ ciabie jość hrošy. Płaci, ty viedaješ, što treba zrabić». Ja dapamahała i apłačvała ŭsio, što ŭ častcy apieracyj i dapamohi chłopcu. Ale zapyty źvialisia zusim da inšaha».
Tym časam znajomyja Andreja ŭ sacsietkach raspaŭsiudžvajuć abviestku ź infarmacyjaj pra zbor hrošaj na lačeńnie i reabilitacyju chłopca — tam paznačana, što nieabchodna bolš za 322 tysiačy jeŭra.
Miarkujučy pa sacyjalnych sietkach Andreja, jon skončyŭ Biełaruskuju dziaržaŭnuju akademiju suviazi, a jašče lubiŭ naviedvać načnyja kłuby.
U hadavinu zaručyn pary błohieraŭ, 12 lipienia, Siarohu prysudzili 5,5 hoda źniavoleńnia.
Aniečka ž apraŭdvajecca pierad padpisčykami za seksualnyja fotazdymki dy viasiołyja videa, jakija vykładvała padčas asabistaj dramy: «Moj błoh — heta ŭsio majo žyćcio, jakoje my budavali razam ź Siarožam. I heta moj zarobak. Kali b ja syšła, ja b nie zmahła apłačvać rachunki, apieracyi, nie mahła b akazvać materyjalnuju dapamohu».
Ciapier čytajuć
Zahnuŭsia biznes člena chakiejnaj kamandy Łukašenki, jaki abiacaŭ pabudavać łyžny maniež za Viarchoŭnym sudom uzamien na łasyja ŭčastki2
Kamientary