«Častka paciarpiełych stahnała ad bolu, niekatoryja samastojna vybralisia z mašyny». Vidavočcy — pra žudasnuju avaryju z vajskoŭcami pad Asipovičami
Mašyna raźbiłasia za čatyry kiłamietry ad vajskovaha palihona.
U piatnicu kala 08:00 na trasie kala Asipovičaŭ adbyłasia trahiedyja: pierakuliŭsia vajskovy hruzavik. Dvoje maładych mužčyn — 21‑hadovy radavy terminovaj słužby i 26‑hadovy małodšy siaržant kantraktnaj słužby, jakija byli pasažyrami, — zahinuli. Jašče 14 čałaviek byli dastaŭleny ŭ balnicu. Viadoma, što za rulom znachodziŭsia 20‑hadovy vajskoviec. Onliner.by źjeździŭ na miesca trahiedyi.
Na miescy avaryi karcina amal nie źmianiłasia: hruzavik lažaŭ pierakuleny, kabina była mocna źmiataja. Vakoł byli raskidanyja asabistyja rečy vajskoŭcaŭ — smartfon, pradukty (chleb, małako), humovyja šłapaki, biercy. Pad kuzavam rassypany piasok, lažali kavałki biarvieńnia i faniera.
Na asfalcie zastalisia ślady kryvi, jakija nie zmyŭ navat doždž. Na ŭzbočynie lažali vykarystanyja binty, špryc i reštki kropielnicy.
Adzin ź vidavočcaŭ, jaki apynuŭsia na miescy prykładna praź dziesiać chvilin paśla avaryi, raskazaŭ, što kala kuzava lažali kala dziesiaci čałaviek.
Častka paciarpiełych stahnała ad bolu, niekatoryja samastojna vybralisia z mašyny, inšych, pavodle jaho słoŭ, vybiła pry ŭdary.
Jon taksama śćviardžaje, što čatyroch-piacioch čałaviek daviałosia debłakavać supracoŭnikam MNS, bo ich mocna zacisnuła elemientami aŭtamabila. Zahinułych taksama dastali z kuzava.
— Bačyŭ, jak adnamu paciarpiełamu prosta na miescy pastavili kropielnicu, — raskazaŭ žychar susiedniaj vulicy. — Jašče adnaho chłopca chacieli pieranieści, ale niechta kryknuŭ: «Nie čapajcie, u jaho pierałom chrybietnika!»
Supracoŭniki MNS admovilisia ad aficyjnych kamientaroŭ, ale adznačyli, što vyratavalnaja apieracyja była składanaj: pryjšłosia vykarystoŭvać śpiecyjalny instrumient i dziejničać vielmi aściarožna, kab nie nanieści dadatkovych traŭmaŭ paciarpiełym.
Inšy miascovy žychar raskazaŭ, što pračnuŭsia kala 08:30, adčyniŭ akno i ŭbačyŭ vialikuju kolkaść ludziej, śpiectechniki i mašyn chutkaj dapamohi, u tym liku z Babrujska.
— Bačyŭ, jak adzin z chłopcaŭ, jaki lažaŭ na ziamli, rezka varuchnuŭsia, i da jaho adrazu padbiehli miedyki.
Na pytańnie, čamu jon nie pačuŭ sam momant avaryi, mužčyna adkazaŭ:
— Za čatyry kiłamietry adsiul znachodzicca vajskovy palihon. My ŭžo zvykli da taho, što niešta hrymić. Ja jašče čuŭ, jak adzin z vajskoŭcaŭ skazaŭ, što jany spačatku nibyta źbiralisia pavaročvać naprava, u Asipovičy.
— Siarod paciarpiełych — maładyja chłopcy? Terminovaj słužby?
— Mnie zdajecca, što tak.
— Napeŭna, u ich voś-voś pavinien byŭ być dembiel. Heta samaje niebiaśpiečnaje skryžavańnie ŭ Asipovičach! — dadaje mužčyna.
Jon taksama adznačyŭ, što heta skryžavańnie ličyć adnym z samych niebiaśpiečnych u rajonie.
Jašče adny aŭtaamatary raskazvajuć: prajazdžali miesca avaryi kala 11:00 — bačyli cieły zahinułych.
—Infarmacyja ab DTZ užo da Minska dajšła. Dačka telefanavała, pytałasia: «što tam u vas u Asipovičach adbyłosia?»
Rasśledavańnie praciahvajecca
Na miescy zdareńnia da samaha viečara pracavali supracoŭniki roznych viedamstvaŭ. Jany fiksavali ŭsie akaličnaści avaryi, rabili fotazdymki i videazapis, u tym liku z vykarystańniem kvadrakoptara.
Abmiarkoŭvałasia i pytańnie chutkaści ruchu hruzavika. Na hetym učastku darohi praz ramontnyja raboty dziejničaje časovaje abmiežavańnie chutkaści — da 50 km/h.
Znoŭ ža, adzin ź vidavočcaŭ ahučvaje: maŭlaŭ, chtości z paciarpiełych śćviardžaŭ, što mašyna jechała z chutkaściu kala 40 km/h, ale dakładnuju karcinu, zrazumieła, adnoviać tolki ekśpierty adkaznych viedamstvaŭ.
Bližej da 15:00 pakarabačany hruzavik pačali pierakulvać. Spačatku jaho pryŭźniali, kab prybrać biarviony, jakija vykarystoŭvali jak padporki. Zatym pierakulili na adzin bok. A paźniej pastavili na koły i adciahnuli z dapamohaj śpiecyjalnaha trosa i inšaj vajskovaj mašyny.
U pierapynkach hetaha pracesu inšyja vajskoŭcy rydloŭkami prybirali z trasy rassypany piasok, źbirali raskidanyja rečy.
Paśla sudekśpierty pačali vyśviatlać (dapamohu akazvali i vajskoŭcy), ci byli ŭ hruzavika niaspraŭnaści. Na našych vačach pravieryli tarmazy i ahučyli: na dadzienym etapie ni da adnaho koła pretenzij niama. Nie było pakul vyjaŭlena i inšych niaspraŭnaściaŭ. Ale klučavoje słova — «pakul». Pravierka i rasśledavańnie tolki pačynajucca.
Kiroŭca hruzavika žyvy i znachodzicca ŭ prytomnaści. Adnak u kabinie hruzavika byli ślady kryvi.
20‑hadovy šafior vajskovaha MAZa nie ŭpisaŭsia ŭ pavarot pad Asipovičami. Dva sałdaty zahinuli, jašče 14 paranienyja
Źjaviłasia videa niaščaścia ŭ Asipovickim rajonie, dzie zahinuli dvoje vajskoŭcaŭ, a 14 paranienyja
Adzin z zahinułych siońnia vajskoŭcaŭ — 26‑hadovy minčuk Kirył. Što pra jaho viadoma
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska
Kamientary