«Ja nie chadžu ŭ sud, mianie nosiać u kajdankach». List Alesia Puškina da Valancina Stefanoviča z-za krataŭ 

Padčas utrymańnia ŭ byłym minskim SIZA №1 na Vaładarcy pravaabaronca «Viasny» Valancin Stefanovič atrymaŭ viasnoj 2022 hoda turemnuju «malavu» ad mastaka i palitviaźnia Alesia Puškina, jaki zahinuŭ u hrodzienskaj turmie № 1 u 2023 hodzie, piša «Viasna».

Aleś Puškin i Valancin Stefanovič viedali adzin adnaho šmat hadoŭ. Pravaabaronca zhadvaje, što ich stasunki pačalisia jašče ŭ kancy 90‑ch hadoŭ:

«Ja byŭ znajomy asabista sa spadarom Puškinym, i my vielmi dobra adzin adnaho viedali. Navat pamiataju, što naprykancy 90‑ch ja abaraniaŭ jaho ŭ sudzie paśla jaho čarhovaha pierformansa. Byŭ jaho pradstaŭnikom u administratyŭnym pracesie — tady jašče možna było być pradstaŭnikom hramadskaści ŭ takich pracesach. Dzieści z taho času ŭ nas takija daŭnija stasunki».

Pieradać viestku ŭ turmie składana, ale viaźni ŭsio roŭna znachodziać takija mahčymaści. List Valancinu pieradali inšyja źniavolenyja, ź jakimi Aleś pierasiakaŭsia ŭ tak zvanych «adstojnikach» — kamierach, dzie čakajuć kanvoju:

«Hety list pieradali mnie chłopcy z majoj kamiery №53, jakija jeździli na sudy. Puškin taksama ŭ hety ž pieryjad jeździŭ na pasiadžeńni. Jany pierasiakalisia ŭ tak zvanych «adstojnikach» — pamiaškańniach, dzie asoby pad vartaj čakajuć kanvoju ŭ sud ci raźmierkavańnia pa kamierach paśla sudoŭ. Tam možna pravieści peŭny čas razam ź ludźmi ź inšych kamier. Takim čynam Aleś pieradaŭ hety list praz maich sukamiernikaŭ».

U svaim liście mastak apisvaje surovyja realii svajho źniavoleńnia. Jon paviedamlaje, što znachodzicca ŭ karcary №2, dzie jamu dali 13 sutak.

Taksama mastak u liście turbujecca za inšych palitviaźniaŭ. Zaŭvažyŭšy, što nasuprać jaho karcara znachodziacca žanočyja kamiery, jon spadziavaŭsia padčas špacyru daviedacca, ci nie tam trymajuć kaardynatarku vałanciorskaj słužby «Viasny» Marfu Rabkovu.

Akramia taho, Aleś paviedamlaje pra svaju situacyju na sudzie: jaho advakatku Juliju Jurhilevič pazbavili licenzii, a ad pryznačanaha abaroncy jon admoviŭsia sam, tamu zastaŭsia zusim biez pravavoj dapamohi. Niahledziačy na heta, mastak aktyŭna rychtavaŭsia da vyraku — jon napisaŭ svajo apošniaje słova na 23 staronkach i płanavaŭ paźniej pieradać jaho žurnalistam.

Zakančvajecca list vielmi ciopłymi słovami da Valancina: «Ja vielmi rady, što ŭdałosia z taboj skantaktavacca, ja ciabie vielmi lublu! Alinu [Alinu Stefanovič, žonku Valancina — NN] taksama, pieradavaj joj pryvitańnie! Krepki!».

Dla Valancina Stefanoviča hetaja «malava» nabyła asablivy sens paśla žudasnych navinaŭ, jakija dajšli da jaho praź niejki čas. 11 lipienia 2023 hoda Aleś Puškin pamior praź niesvoječasova akazanuju miedycynskuju dapamohu pry prabadnoj jaźvie ŭ reanimacyi hrodzienskaj balnicy. Tudy mastaka pryvieźli z hrodzienskaj turmy № 1. 

«Zaraz hety list usprymajecca mnoj jak taki, u niejkim sensie, užo raźvitalny list ad Alesia Puškina. Tamu što kali ja ŭžo byŭ u kałonii, ja ad mamy — kali chadziŭ zvanić joj — daviedaŭsia, što jon pamior».

Pavialičyć

Alesia Puškina zatrymali 30 sakavika 2021 hoda pa spravie ab nibyta reabilitacyi nacyzmu: na vystavie ŭ Hrodnie byŭ partret antysavieckaha partyzana Aŭhiena Žychara. Na momant zaviadzieńnia spravy mastak byŭ u Kijevie, ale śpiecyjalna viarnuŭsia ŭ Biełaruś, kali spravu zaviali. Puškina abvinavacili pavodle č. 3 art. 130 KK (reabilitacyja nacyzmu), a taksama pavodle art. 370 KK (ździek ź dziaržaŭnych simvałaŭ).

30 sakavika 2022 hoda Alesia Puškina asudzili da piaci hadoŭ źniavoleńnia ŭ kałonii strohaha režymu. Viasnoj 2023 hoda jaho pieraviali ŭ hrodzienskuju turmu. Tam u jaho turmie ŭ Puškina raźviŭsia pierytanit, pierad śmierciu byŭ sieptyčny stan i paliorhannaja niedastatkovaść. Paviedamlałasia, što śmierć nastupiła praź nieakazańnie miedycynskaj dapamohi ŭ turmie, šancaŭ na vyžyvańnie ŭ špitali ŭžo amal nie było.

Alesiu Puškinu było 57 hadoŭ.

• 0
• 0
• 0
• 0
• 0
• 7
• 0
• 1