Novaje daśledavańnie śviedčyć pra toje, što navat adna kropla vady padčas pamołu kavavych zierniaŭ zdolnaja istotna paŭpłyvać na vynik. Dziakujučy hetamu vodar moža raskrycca bolš poŭna, a smak kavy stanie bolš zbałansavanym.
Jak piša niamieckaje vydańnie Focus.de, navukoŭcy vyśvietlili, što ŭsiaho adna kropla vady pierad pamołam kavavych ziarniat moža zrabić napoj bolš duchmianym i zbałansavanym na smak. Jak śćviardžajuć aŭtary, nievialikaja kolkaść vilhaci dapamahaje atrymać bolš adnastajny kavavy parašok, dziakujučy čamu padčas zavarvańnia lepš raskryvajucca aramatyčnyja rečyvy.
Sposab vielmi prosty. Dastatkova krapnuć na kavavyja ziarniaty adnu nievialikuju kroplu vady pierad tym, jak zmałoć ich. Inšy varyjant — trochi pieramiašać ziarniaty źlohku zmočanaj łyžkaj.
Paśla hetaha kavu možna małoć zvyčajnym sposabam. Daśledčyki adznačajuć, što ŭ takim vypadku mienš kavavaha parašku zastajecca ŭ kavamołcy, a sam pamoł atrymlivajecca bolš adnarodnym.
Aŭtary daśledavańnia źviazvajuć hety efiekt sa statyčnaj elektryčnaściu. Kiraŭnik daśledavańnia Džošua Miendes Charpier, jaki nasamreč śpiecyjalizujecca na vyvučeńni vułkanaŭ, źviarnuŭ uvahu na padabienstva pamiž vyviaržeńniami i pracesam pamołu kavy. Padčas vułkaničnych vyviaržeńniaŭ drobnyja čaścicy trucca adna ab adnu i nabyvajuć elektryčny zarad. Padobnaja źjava adbyvajecca i ŭ kavamołcy, tolki ŭ značna mienšym maštabie.
Nievialikaja kolkaść vilhaci źmianšaje ŭźniknieńnie elektryčna zaradžanych čaścic. U vyniku kavavy parašok stanovicca bolš adnastajnym, radziej źbivajecca ŭ kamiaki i mienš prylipaje da detalaŭ i ścienak kavamołki.
Akramia taho, daśledčyki ŭstanavili, što pry mienšaj elektryčnaj zaradžanaści ŭ hatovym pamole zachoŭvajecca bolš drobnych čaścic. Heta dazvalaje padčas zavarvańnia atrymać z kavy bolš aramatyčnych rečyvaŭ.
Najbolš prykmietny efiekt daśledčyki nazirali pry padrychtoŭcy espresa, dzie vykarystoŭvajecca vielmi drobny pamoł. U vypadku ź zierniami, da jakich dadali kroplu vady, heta pryviało da bolš raŭnamiernaj ekstrakcyi i navat da častkova vyšejšaj kancentracyi kavy.
Darečy, sam pryjom nielha nazvać novym. Mnohija barysty ŭžo daŭno vykarystoŭvajuć jaho na praktycy. U śviecie kavy hety mietad viadomy jak Ross Droplet Technique («mietad kropli Rosa»), nazvany ŭ honar Devida Rosa, jaki prapanavaŭ hety sposab jašče ŭ 2005 hodzie. Barysty vykarystoŭvajuć kampaktnyja pulvieryzatary, jakija stvarajuć nad kavavymi ziarniatami ledź prykmietnuju vadzianuju smuhu.
Ciapier čytajuć
Zahinuŭ były palitviazień Alaksiej Laŭkievič. Jaho vyzvalili try miesiacy tamu paśla vizitu Koŭła2
Zahinuŭ były palitviazień Alaksiej Laŭkievič. Jaho vyzvalili try miesiacy tamu paśla vizitu Koŭła
Pasoł Ukrainy pa pytańniach Biełarusi adkazaŭ na dyskusiju Viačorki i krytykaŭ Cichanoŭskaj: Vaša ŭzajemnaja nieprymalnaść adyhryvaje vielmi niekanstruktyŭnuju rolu3939
Kamientary