Rasčesvańnie — važnaja častka dohladu vałasoŭ, ale zališniaje zachapleńnie hetaj praceduraj moža prynieści bolš škody, čym karyści. Navukoŭcy i śpiecyjalisty pa dohladzie vałasoŭ raskazali BBC, jak časta varta karystacca rasčoskaj i jakich pamyłak lepš paźbiahać.
Ludzi karystalisia rasčoskami jašče ŭ dahistaryčnyja časy. Jany byli patrebnyja nie tolki dla pryhažości, ale i dla hihijeny, bo dapamahali vydalać z vałasoŭ śmiećcie, brud, parazitaŭ i rasputvać vuzły.
U XIX stahodździ, kali doŭhija vałasy ličylisia važnaj častkaj žanočaj pryhažości, dohlad za imi moh zajmać šmat času. Zvyčajna vałasy spačatku rasčesvali hrebieniem, kab rasputać, a potym rasčoskaj-ščotkaj z naturalnym ščacińniem — kab razhładzić i raźmierkavać naturalny tłušč, jaki vyłučaje skura hałavy, pa ŭsioj daŭžyni.
Paźniej źjaŭleńnie rasčosak-ščotak ź sintetyčnym ščacińniem zrabiła ich bolš tannymi i dastupnymi. Razam z hetym šyrej raspaŭsiudzilisia i parady pra dohlad vałasoŭ, ale nie ŭsie ź ich navukova abhruntavanyja.
Čamu častaje rasčesvańnie nie paskaraje rost vałasoŭ
Adna z samych ustojlivych pamyłak — mierkavańnie, što častaje rasčesvańnie moža paskoryć rost vałasoŭ. Śpiecyjalisty heta nie paćviardžajuć: vałasy rastuć z falikułaŭ, i miechaničnaje ŭździejańnie na ŭžo adrosłuju častku istotna nie ŭpłyvaje na hety praces.
Bolš za toje, praźmiernaje abo hrubaje rasčesvańnie moža paškodzić vałasy. Kali pasmy mocna zbłytvajucca, a potym ich rasputvajuć ź vialikaj siłaj, vałasy padviarhajucca značnaj nahruzcy. Z časam heta moža paškodzić ich strukturu, u vyniku čaho źjaŭlajucca pasiečanyja kancy i pavialičvajecca łomkaść.
Razam z tym daśledčyki adznačajuć, što ŭ paŭsiadzionnym žyćci škoda ad aściarožnaha rasčesvańnia dla bolšaści ludziej niaznačnaja. Značna bolš na stan vałasoŭ upłyvajuć farbavańnie, chimičnyja pracedury i ŭździejańnie vysokich tempieratur.
Schavanaja karyść rasčesvańnia
Rasčesvańnie samo pa sabie nie źjaŭlajecca prablemaj. Škodzić najčaściej nie rasčoska, a toje, jak joju karystajucca.
Rehularnaje i akuratnaje rasčesvańnie dapamahaje nie dapuskać vialikich vuzłoŭ i zbłytvańnia. Kali doŭha nie rasčesvacca, potym vałasy davodzicca rasputvać z bolšaj siłaj, a heta pavialičvaje ryzyku paškodžańnia.
Akramia taho, rasčoska dapamahaje prybrać vałasy, jakija ŭžo vypali naturalnym šlacham, čaścinki admierłaj skury i zabrudžańni sa skury hałavy. Kali ŭsio heta nazapašvajecca, moža ŭźnikać razdražnieńnie.
Jak pravilna rasčesvać vałasy
Univiersalnaha praviła dla ŭsich niama. Pramyja i chvalistyja vałasy śpiecyjalisty rajać rasčesvacca jak minimum try razy na tydzień. Pry patrebie heta možna rabić i čaściej — adzin-dva razy na dzień, ale biez rezkich ruchaŭ i mocnaha nacisku.
Pramyja i chvalistyja vałasy lepš nie rasčesvać mokrymi. Paśla myćcia jany mohuć zdavacca bolš mocnymi i ełastyčnymi, ale nasamreč stanoviacca bolš uraźlivymi. Pad uździejańniem vady struktura vołasa časova źmianiajecca: jana stanovicca bolš hnutkaj, ale mienš ustojlivaj da paškodžańniaŭ.
Ź vielmi kučaravymi vałasami praviła inšaje. Ich nie varta rasčesvać suchimi. Lepš rasputvać takija vałasy padčas myćcia abo adrazu paśla jaho, vykarystoŭvajučy srodki, jakija dapamahajuć rasčoscy lahčej prachodzić uzdoŭž pasmaŭ.
Jak adznačajuć śpiecyjalisty, kučaravyja vałasy majuć zusim inšyja fizičnyja ŭłaścivaści, jakija doŭhi čas ihnaravalisia ŭ navukovaj litaratury i industryi pryhažości: jany čaściej stračvajuć vilhać, lahčej utvarajuć vuzły i mohuć być bolš schilnyja da paškodžańnia. Tamu im asabliva patrebny aściarožny dohlad.
Jakuju rasčosku vybrać
Važna nie tolki jak časta rasčesvacca, ale i čym. Kali ŭ vas kučaravyja vałasy abo vy ŭsio ž chočacie rasčasać mokryja pramyja ci chvalistyja vałasy, lepš vykarystoŭvać rasčosku-ščotku z pruhkimi płastykavymi zubcami (wet brush). Žorstki hrebień u takoj situacyi moža, naadvarot, pavialičyć ryzyku ich paškodžańnia.
Dla suchich vałasoŭ pasujuć rasčoski-ščotki ź miakkim ščacińniem, pryjaznyja da skury hałavy. Jany dapamahajuć razhładžvać vałasy i raźmiarkoŭvać naturalny tłušč pa ich daŭžyni.
Niekatoryja sučasnyja rasčoski-ščotki spałučajuć niekalki typaŭ zubcoŭ i ščacińnia: adny raździalajuć pasmy, druhija razhładžvajuć ich, raźmiarkoŭvajuć tłušč i dadajuć abjom.
Takim čynam, adkaz na pytańnie, jak časta treba rasčesvacca, zaležyć ad typu vałasoŭ, techniki i samoj rasčoski. A kali vam časam nie chočacca staranna ŭkładvać vałasy, sučasnaja moda, zdajecca, tolki na vašym baku: naturalnaść i lohkaja niadbajnaść siońnia ŭ trendzie.
Kamientary