Tramp paćvierdziŭ, što asabista prasiŭ kiraŭnika FIFA nie dyskvalifikoŭvać forvarda zbornaj ZŠA pierad 1/8 finału

Prezident ZŠA Donald Tramp paćvierdziŭ, što asabista paprasiŭ prezidenta FIFA Džani Infancina pierahledzieć aŭtamatyčnuju dyskvalifikacyju forvarda zbornaj ZŠA Fałaryna Bałahuna na nastupny matč čempijanatu śvietu, piša Bi-bi-si.

Raniej ŚMI pisali, što rašeńnie viarnuć Bałahuna ŭ skład było pryniata paśla taho, jak u čaćvier prezident ZŠA Donald Tramp patelefanavaŭ kiraŭniku FIFA Džani Infancina i abmierkavaŭ ź im hetuju situacyju.

Adnak spačatku aficyjnaha paćviardžeńnia hetaj infarmacyi nie było. Pavodle słoŭ Trampa, futbolnyja ŭłady «pryniali pravilnaje rašeńnie», admianiŭšy pakarańnie. Jon dadaŭ, što ŭ advarotnym vypadku turnir byŭ by «zaplamleny».

25‑hadovaha Bałahuna, jaki źjaŭlajecca najlepšym bambardziram zbornaj ZŠA na ciapierašnim čempijanacie śvietu, pavinny byli aŭtamatyčna dyskvalifikavać na matč 1/8 finału suprać Bielhii paśla vydaleńnia ŭ sustrečy z Bośnijaj i Hiercahavinaj (ZŠA zhulali siońnia nočču ź Bielhijaj u Sietle).

Adnak u niadzielu ŭviečary FIFA prypyniła dziejańnie dyskvalifikacyi, zrabiŭšy jaje ŭmoŭnaj i pryznačyŭšy Bałahunu vyprabavalny termin praciahłaściu 12 miesiacaŭ, što dazvolić amierykanskamu forvardu trapić u zajaŭku na matč.

Vystupajučy ŭ paniadziełak u Biełym domie, Tramp zajaviŭ, što paprasiŭ FIFA pierahledzieć pakarańnie, pakolki, na jaho dumku, parušeńnia praviłaŭ nie było.

«Ja liču, što heta byli dva vydatnyja spartsmieny, jakija sutyknulisia i prosta zabłytalisia adzin u adnym, — skazaŭ Tramp. — Dumaju, hetaja dyskvalifikacyja stała b vialikaj plamaj na turniry. Ja nie mahu ŭkazvać FIFA, što rabić. I, nakolki ja razumieju, rašeńnie prymała nie kiraŭnictva arhanizacyi, a dyscyplinarnaja kamisija. I heta było pravilnaje rašeńnie», — dadaŭ prezident.

Jašče ŭ niadzielu jon padziakavaŭ FIFA za «vypraŭleńnie aburalnaj niespraviadlivaści».

Karaleŭskaja bielhijskaja futbolnaja asacyjacyja (RBFA) zajaviła, što ŭzrušanaja rašeńniem nie dyskvalifikavać amierykanskaha napadnika.

Ministr zamiežnych spraŭ Bielhii Maksim Prevo ŭ paniadziełak skazaŭ: «Kali pryčynaj hetaha niezrazumiełaha rašeńnia sapraŭdy staŭ telefonny zvanok, to heta budzie aburalnym parušeńniem samych fundamientalnych pryncypaŭ futboła i sportu».

Były prezident FIFA Zep Błater, jaki pakinuŭ svaju pasadu ŭ 2016 hodzie paśla karupcyjnaha skandału, napisaŭ u X: «Futboł nikoli nie pavinien stanavicca placoŭkaj dla palityčnaj ułady».

UEFA rezka raskrytykavaŭ niečakanaje rašeńnie FIFA nie prymianiać aŭtamatyčnuju dyskvalifikacyju da napadnika zbornaj ZŠA Fałaryna Bałahuna, nazvaŭšy jaho «biesprecedentnym i ničym nie apraŭdanym».

U UEFA zajavili, što padobnaja manipulacyja praviłami prosta padčas turniru rasceńvajecca jeŭrapiejskim futbolnym sajuzam jak «pierasiačeńnie čyrvonaj linii».

Za ŭsiu historyju čempijanataŭ śvietu było pakazana 188 čyrvonych kartak, i tolki adzin futbalist raniej paźbieh nastupnaj dyskvalifikacyi.

Heta byŭ brazilec Harynča na čempijanacie śvietu 1962 hoda — jašče da ŭviadzieńnia aŭtamatyčnych adchileńniaŭ.

Tady rašeńnie pakinuć jaho na poli supravadžałasia abvinavačvańniami ŭ palityčnym umiašańni.

Va UEFA padkreślili, što aŭtamatyčnaja dyskvalifikacyja na adzin matč — «heta nie pytańnie mierkavańnia», a «fundamientalny pryncyp, zamacavany ŭ rehłamiencie».

«Kali vykanańnie praviłaŭ bolš nie harantujecca tymi, chto abaviazany ich abaraniać, pad pahrozaj akazvajecca cełasnaść hulni, a davier da turniru padryvajecca», — havorycca ŭ zajavie arhanizacyi.

Va UEFA taksama papiaredzili, što takoje rašeńnie stvaraje niebiaśpiečny precedent: ciapier anałahičnyja vypadki na ciapierašnim čempijanacie śvietu pavinny buduć razhladacca takim ža čynam, što naniasie škodu spartyŭnamu pryncypu spabornictvaŭ.

Adnosiny pamiž UEFA i FIFA ŭ apošnija miesiacy zastajucca napružanymi praz šerah sprečnych rašeńniaŭ.

U pryvatnaści, paśla taho jak samalijskamu arbitru Amaru Artanu admovili va ŭjeździe ŭ ZŠA dla pracy na čempijanacie śvietu, UEFA zaprasiŭ jaho sudzić matč za Supierkubak Jeŭropy pamiž «PSŽ» i «Astan Viłaj», jaki adbudziecca 12 žniŭnia.

Zhodna z praviłami FIFA, Bałahun nie pavinien byŭ vychodzić na pole ŭ nastupnym matčy.

Adnak u arhanizacyi adznačyli, što artykuł 27 dyscyplinarnaha rehłamientu dazvalaje «całkam abo častkova prypynić prymianieńnie dyscyplinarnych mier». Mienavita hetym artykułam FIFA skarystałasia, zamianiŭšy faktyčnuju dyskvalifikacyju Bałahuna na ŭmoŭnuju.

Heta pieršy vypadak, kali artykuł 27 byŭ užyty padčas čempijanatu śvietu. U zajavie UEFA, apublikavanaj na sajcie arhanizacyi, skazana, što «praviły časam mohuć interpretavacca», ale «hetaha vypadku heta nie datyčycca».

Siońnia nočču Bielhija vybiła ZŠA z čempijanatu śvietu. Bałahun vyjšaŭ u startavym składzie i pravioŭ na poli 92 chviliny, pakul nie byŭ zamienieny.

• 1
• 0
• 0
• 1
• 1
• 0
• 0
• 0