«A što adbyvajecca?» Čerhi na biełaruska-rasijskaj miažy ciapier nie tolki na asnoŭnym pierachodzie, a navat na hłuchoj darozie
Prablemy ź bienzinam pačynajucca za Smalenskam.
«Prastajali try hadziny»
Čarha na niekalki hadzin na biełaruska-rasijskaj miažy pa trasie M-1 — źjava davoli zvykłaja. Kab nie zachrasnuć u čarzie, mnohija kamientatary ŭ čatach raili abjazdžać asnoŭny pierachod praz Dubroŭna i punkt propusku «Lady». Maŭlaŭ, daroha horšaja i jechać krychu daŭžej pa časie, ale ŭ sumie ŭsio adno atrymajecca prajechać chutčej, čym pa M-1.
«A što adbyvajecca? Try hadziny prastajali na miažy Biełaruś — Rasija. Upieršyniu tak. I heta navat nie centralnaja, tam jašče daŭžej», — napisała žančyna ŭ sacsietkach.
Na videa, jakoje jana źniała, pierad joj staić jašče nie adzin dziasiatak aŭto. A ŭ lusterku zadniaha ahladu vidać, što i za imi čarha raściahnułasia vielmi daloka.
Žančyna, padpisanaja jak Anastasija Navumava, paličyła, što hałoŭnaja prablema ŭ tym, što jany abrali nie toj čas, kab viartacca ŭ Rasiju.
Abrali nie toj čas?
«Kali my jechali ŭ RB, vyjechali z Maskvy a 4:30 ranicy i miažu prajšli vielmi chutka. Nazad u RF my pajechali dniom, dy jašče i ŭ niadzielu — i jak vynik», — piša jana i daje paradu padarožnikam vybirać pravilny dzień, kab nie marnavać čas u čarzie na miažy.
Takich čerhaŭ žančyna nikoli nie bačyła.
«U nas taki zator byŭ upieršyniu. U Biełaruś jeździm čaściakom. Trapili, vidać, u taki čas, kali zator byŭ maksimalny. Sami ŭ šoku».
«Pryčynu nie viedaju. Mahčyma, vielmi šmat ludziej viartałasia paśla vychodnych», — hadaje Anastasija.
Pad videa sabrałasia ŭžo bolš za šeść socień kamientaroŭ. Adna z kamientatarak adpisałasia, što praviała ŭ čarzie na hetaj miažy kala dźviuch hadzin.
Paliŭny turyzm i nie tolki paliŭny
Mnohija ž ličać, što prablemy z čerhami na miažy abvastrylisia praz toje, što rasijanie ciapier jeduć u Biełaruś u tym liku pa paliva, bo ŭ ich jano ŭ deficycie.
U pamiežnych čatach adznačajuć, što prynamsi 95‑ty bienzin u Smalenskaj vobłaści ŭ bok Maskvy ŭ paniadziełak ranicaj byŭ redkaściu.
«Da Smalenska paśla miažy byŭ, potym źnik (tolki 92 i dyziel byŭ). Na Rasnafcie na stendzie visić ceńnik na 95, a na samoj zapraŭcy na šłanhach tablički zakrytyja», — adpisała adna z udzielnic pamiežnaha čata.
Pra deficyt paliva pišuć i tyja, chto jeździŭ u bok Piciera.
A čałaviek, jaki jeździŭ u Kareliju, adspravazdačyŭsia:
«Zapraŭka apošniaja pierad miažoj prykładna za km 40, potym zapraŭka tolki ŭ Vostravie była i nastupnaja ŭ Noŭharadzie. Usie astatnija nie pracavali».
Siarod inšych pryčyn, čamu šmathadzinnyja zatory ciapier nie tolki na asnoŭnaj trasie Minsk — Maskva, nazyvajuć bolš ščylnuju pravierku mašyn i pašpartoŭ rasijskimi pamiežnikami. Biełaruski bok miažu z RF nie kantraluje ni ŭ adnym z kirunkaŭ.
Daśviedčanyja padarožniki kažuć, što najaŭnaść abo adsutnaść čarhi mocna zaležyć ad dnia tydnia i času. Maŭlaŭ, kala abiedu miaža najbolš zahružanaja.
«Adzin siabra prajechaŭ miažu a 10:00 za 10 chvilin, a druhi prajazdžaŭ a 13:00 i adstajaŭ čatyry hadziny», — piša adzin z kamientataraŭ.
Inšaja pryčyna, jakuju taksama ahučvajuć u kamientarach, — heta turyzm. Maŭlaŭ, da 1 vieraśnia tak i budzie. Pavieličeńnie čerhaŭ u tym liku praz turyzm vyhladaje davoli łahičnym. Aproč taho, što papularnaść Biełarusi ŭ rasijan ciaham apošnich hadoŭ tolki raście, prablemy ź bienzinam unutry Rasii i ryzyki, źviazanyja ź biaśpiekaj, mahli padšturchnuć jašče bolš ludziej vybirać dla padarožžaŭ na aŭto pajezdki ŭ Biełaruś zamiest pajezdak pa Rasii.
Kamientary
Viartajecca ŭ Rasiju. Rasijanka.