Zialenski ŭ Ankary: Vy sapraŭdy ličycie pravilnym, kab kraina z takim dośviedam zastavałasia pa-za NATA?
Prezident Ukrainy Uładzimir Zialenski padčas vystupu na Forumie abaronnych industryj NATA, jaki prachodzić u Ankary, zajaviŭ, što Ukraina maje ŭnikalny dośvied sučasnaj vajny, a jaje abaronnyja i biaśpiekavyja mahčymaści istotna ŭmacujuć NATA ŭ vypadku, kali jana stanie siabram Aljansu.
«U mianie jość da vas pytańnie: vy sapraŭdy ličycie pravilnym, kab kraina i narod z takim uzroŭniem abaronnych mahčymaściaŭ zastavalisia pa-za NATA? Kali my ŭžo majem takija zdolnaści, kali ŭkraincy ŭžo navučylisia tak vajavać, to całkam łahična, kab hetyja mahčymaści stali častkaj kalektyŭnaj abarony Aljansu. Heta zrobić macniejšymi ŭsich nas», — skazaŭ Zialenski.
Jon adznačyŭ, što Ukraina i NATA ŭžo bačać adno adnaho jak nadziejnych partnioraŭ.
«I całkam naturalna było b stać častkaj adzinaj supolnaści biaśpieki. Uličvajučy toje, što my jašče doŭha budziem zastavacca pobač z krynicaj pahrozy — Rasijaj, Ukraina ŭ NATA budzie aznačać źjaŭleńnie vyklučna mocnaj abaronnaj zdolnaści», — padkreśliŭ prezident Ukrainy.
Na paćviardžeńnie svaich słoŭ Zialenski nahadaŭ, što Siły abarony Ukrainy štomiesiac źniščajuć kala 30 tysiač rasijskich sałdat.
«Tolki ŭ červieni było likvidavana amal 28 tysiač rasijskich vajskoŭcaŭ. I my majem videapaćviardžeńnie kožnaha takoha vypadku. Pieravažnuju bolšaść ź ich parazili dronami. I, ščyra kažučy, my zusim nie hanarymsia hetym. Ja kažu pra heta tolki dla taho, kab pakazać, jaki vyhlad maje sučasnaja vajna. Heta vajna, jakuju my nie pačynali, ale jakuju vymušanyja vieści, kab abaranić svaju krainu, svaich ludziej i svaich dziaciej», — patłumačyŭ kiraŭnik ukrainskaj dziaržavy.
Pavodle jaho słoŭ, ukrainskija Siły abarony pavysili ŭzrovień pierachopu rasijskich dronaŭ typu «šachied» da bolš čym 90%.
«Heta aznačaje, što štotydzień my źbivajem tysiačy rasijskich udarnych bieśpiłotnikaŭ. I pry ŭsioj pavazie, nivodnaja inšaja kraina nie mieła dośviedu abarony ad atak dronaŭ u takich maštabach. Realnaść hetaj vajny vymusiła nas stvaryć takija mahčymaści. Siońnia my abaraniajemsia ad sotniaŭ udarnych dronaŭ štodnia i štonoč, a taksama ad tysiač štotydzień i štomiesiac. Abaronny siektar Ukrainy raźviŭ hetyja mahčymaści padčas poŭnamaštabnaj vajny», — adznačyŭ Zialenski.
Jon taksama zhadaŭ pra kampaniju pa harantavańni biaśpieki Čornaha mora z dapamohaj marskich bieśpiłotnikaŭ.
«Heta ŭžo nie prosta ŭdarnyja drony, pryznačanyja dla źniščeńnia rasijskich vajskovych karabloŭ u mory. Našy marskija drony ŭžo pieratvarylisia ŭ šmatfunkcyjanalnyja płatformy, zdolnyja nanosić udary z mora pa roznych celach jak na sušy, tak i ŭ pavietry», — zaŭvažyŭ Zialenski.
Pavodle jaho słoŭ, adnačasova Ukraina vajuje ŭ niebie na dvuch klučavych kirunkach: abaraniaje ludziej ad rasijskich atak i ažyćciaŭlaje dalnabojnyja ŭdary pa Rasii jak adkaz na hetuju vajnu, a taksama paražaje abjekty pa ŭsioj hłybini časova akupavanych terytoryj Ukrainy.
Z usim hetym dośviedam, jak adznačyŭ Zialenski, Ukraina istotna ŭmacuje NATA, kali stanie jaho častkaj.
Zialenski: Łukašenka zajšoŭ u kazino nie ŭ toj dzień
Zialenski i Tramp sustrenucca na hetym tydni
«Jość realnaja pierśpiektyva zaviaršyć vajnu». Zialenski zrabiŭ aptymistyčnuju zajavu paśla razmovy z Trampam
Zialenski prapanavaŭ Pucinu sustrecca ŭ Kanstancinaŭcy, «raz jana ciapier pad kantrolem Rasii»
Ukraina nanosić udary pa rasijskich centrach kaśmičnaj suviazi. Što heta daje?
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam25
Kamientary