Łukašenka padtrymaŭ prapanovu ab uzbujnieńni Drybinskaha rajona
«U svoj čas staviłasia padobnaje pytańnie, i ja na jaho adkazaŭ hadoŭ 25 tamu: Drybinskamu rajonu być». Alaksandr Łukašenka padtrymaŭ prapanovu ab uzbujnieńni Drybinskaha rajona. Ab hetym pa vynikach narady ŭ kiraŭnika dziaržavy zajaviŭ žurnalistam staršynia Mahiloŭskaha abłvykankama Anatol Isačenka.
Adnoj z tem narady pa pytańniach raźvićcia Mahiloŭskaj vobłaści stali prapanovy pa ŭzbujnieńni Drybinskaha rajona za košt uklučeńnia ŭ jaho skład ziemlaŭ sielhasarhanizacyj Mahiloŭskaha, Horackaha i Čavuskaha rajonaŭ.
«U svoj čas staviłasia padobnaje pytańnie, i ja na jaho adkazaŭ hadoŭ 25 tamu: Drybinskamu rajonu być. Ale treba padumać, jakim jon pavinien być. Jon pavinien adpaviadać siarednim pamieram rajonaŭ našaj krainy — z hetaha zychodzili, — skazaŭ Łukašenka. — Uradu, hubiernataru, upaŭnavažanamu pa Mahiloŭskaj vobłaści z zacikaŭlenymi asobami było daručana surjozna padumać i ŭnieści prapanovy na hety kont. Toje, što hety rajon treba ŭzbujniać i pa-sapraŭdnamu zahružać staršyniu rajvykankama i jaho kaleh, — heta fakt».
Łukašenka adznačyŭ, što ŭžo staviŭ zadaču stvaryć u Drybinskim rajonie nieabchodnuju infrastrukturu i zrabić jaje nie horšaj, čym u inšych rajcentrach.
«Jana stvorana. Infrastruktura ŭ rajonnym centry nie horšaja, čym u inšych. Kaniečnie, heta nie Horacki rajon, dzie akademija (havorka pra Biełaruskuju dziaržaŭnuju sielskahaspadarčuju akademiju. — NN.) stvaraje peŭnuju pryhažość, ale vielmi narmalny i siaredni rajon. A pa pamierach — nijaki», — dadaŭ jon.
Łukašenka skazaŭ, što jamu važnaje mierkavańnie ludziej na hety kont, ale nie ciapier.
«Što na hety kont dumajuć va ŭsich pieraličanych rajonach? Mierkavańnie ludziej vielmi važnaje, ale paśla taho, jak my im raskažam, čaho my chočam. Ci prapracavanyja mahčymyja nastupstvy i dalejšyja dziejańni? Kolki heta budzie kaštavać dla biudžetu i hramadzian? Ja ličyŭ, što heta ničoha nie budzie kaštavać. Ale kali treba padtrymać niejkija haspadarki — padtrymajem. I samaje hałoŭnaje: ci budzie stanoŭčy sacyjalny i ekanamičny efiekt?» — pacikaviŭsia jon.
Sens takich pieramien pakul niezrazumieły.
Kamientary