Ślesar z Oršy biehaŭ ad vojska na radzimie, kab paśla pamierci za Pucina. Pierad adpraŭkaj na zaboj dla jaho zakacili dyskateku z afrykancami
Stała viadoma pra mierkavanuju śmierć jašče adnaho džentlmiena ŭdačy ź Biełarusi, jaki pajechaŭ zarabić hrošaj, zabivajučy ŭkraincaŭ. 35‑hadovy navabraniec Kantemiraŭskaj dyvizii Vasil Malinoŭski pratrymaŭsia na froncie jak i ŭsie — zusim niadoŭha.
Vasil Malinoŭski naradziŭsia ŭ 1990 hodzie ŭ Oršy. Pra rańniaje žyćcio skazać asabliva niama čaho: dobrym vučniem u škole Malinoŭski nikoli nie byŭ. Pastupiŭ u miascovuju chabzu. Potym pajšoŭ pracavać ślesaram u aŭtobusny park kala doma.
Kali hrošaj stała nie chapać, kinuŭ rabotu i staŭ sprabavać ščaścia na chałturach u Rasii. Adnačasova z hetym chavaŭsia ad biełaruskaha vajenkamata, za što trapiŭ u vyšuk i zarabiŭ sabie, pa dadzienych Belpol, kryminałku.
Lohka možna ŭjavić, što Malinoŭski zavierbavaŭsia na front dziela hrošaj.
Aršanca raźmierkavali ŭ Kantemiraŭskuju dyviziju, jakaja byccam by elitnaja častka rasijskaha vojska, ale pa fakcie jaje ŭžo niekalki razoŭ z 2022‑ha razhramili, tamu sałdacki i aficerski skład całkam abnavilisia.
Voś i Malinoŭski trapiŭ u rotu ź piarestaj publikaj: najomniki z usiaho śvietu, u tym liku ciemnaskuryja, biez mahčymaści navat havaryć pamiž saboj.
Pierad vychadam na bajavoje zadańnie Malinoŭski skinuŭ svajakam fota z dyskateki ŭ pryfrantavoj zonie: ababity fanieraj hłyboki akop, na ścienach — savieckija ściahi, samatužnaja śvietłavaja muzyka. Viasiołyja i jaŭna zachmialełyja najomniki ŭ kampanii žančyn.
Nieŭzabavie paśla viečarynki — dla mnohich apošniaj u žyćci — najomnikaŭ adpravili šturmavać ukrainskija pazicyi. Z kanca červienia aršaniec Vasil na suviaź sa svajakami ŭ Biełarusi nie vychodziŭ.
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ16
Kamientary
Hetyja žurnalisckija štampy!(
Za hrašyma jany tudu jeduć, a nie za Pucina!