Na miažy z Ukrainaj zatrymali pasažyrski aŭtobus ź jadachimikatami

U rejsavym aŭtobusie «Kijeŭ — Vilnia» pry pierasiačeńni ŭkrainska-biełaruskaj miažy mytniki sumiesna z pamiežnikami znajšli tajnik ź jadachimikatami na 57 młn. rubloŭ.

Jak paviedamlaje pres-hrupa Homielskaj mytni, u noč na 4 listapada ŭ punkt propusku «Novaja Huta» prybyŭ rejsavy aŭtobus marki «Nieapłan», jaki nakiroŭvaŭsia z Kijeva ŭ Vilniu z 23 pasažyrami i jakim kiravaŭ hramadzianin Ukrainy. Ni kiroŭcy, ni supravadžalnaja, ni pasažyry ŭ chodzie vusnaha apytańnia nie zajavili ab najaŭnaści tavaraŭ, abmiežavanych abo zabaronienych da pieramiaščeńnia cieraz mytnuju miažu Mytnaha sajuza, jakija padlahajuć dekłaravańniu abo abkładańniu mytnymi płaciažami.

U chodzie praviadzieńnia mytnaha nadhladu byŭ znojdzieny tajnik, u jakim znachodziłasia siem kardonnych karobak z hierbicydami (69 blašanak), abmiežavanych da pieramiaščeńnia cieraz mytnuju miažu Mytnaha sajuza.

Nielehalny tavar i aŭtobus «Nieapłan» kanfiskavanyja, pačaty administracyjny praces. Suma kanfiskavanaha tavaru skłała kala 57,5 młn. rubloŭ, aŭtobus acenieny ŭ 270 miljonaŭ rubloŭ. Pasažyry aŭtobusa noč praviali na mytni i da ranicy na inšym aŭtobusie nakiravalisia ŭ Biełaruś.

Kamientary da artykuła