Minfin: Niapraŭda, što Biełaruś nie viarnuła Rasii 1,5 młrd. rasijskich rubloŭ pa sajuznaj linii

Ministerstva finansaŭ abviarhaje infarmacyju ab tym, što nibyta «Biełaruś nie viarnuła Rasii 1,5 młrd. rasijskich rubloŭ, vydadzienych pa sajuznaj linii».

Jak rastłumačyli ŭ pres-słužbie Minfina, «Biełaruś jak suvierenny pazyčalnik nikoli nie atrymlivała kredyty ź biudžetu Sajuznaj dziaržavy». U 2009 hodzie sa srodkaŭ biudžetu Sajuznaj dziaržavy było vydzielena 1,5 młrd. rasijskich rubloŭ na finansavańnie prahram pa raździele biudžetu «pravaachoŭnaja dziejnaść i arhanizacyja biaśpieki Sajuznaj dziaržavy». U 2010 hodzie asvajeńnie srodkaŭ pa hetych prahramach skłała, pavodle apieratyŭnych źviestak, 93,3%, adznačyli ŭ pres-słužbie.

Jak paviedamlałasia raniej, Padlikovaja pałata Rasii i Kamitet dziaržkantrolu Biełarusi zaklikali ŭrad Sajuznaj dziaržavy zabiaśpiečyć viartańnie biudžetnych kredytaŭ na 1,5 młrd. rasijskich rubloŭ. Pavodle infarmacyi RIA Novosti, pra heta paviedamiŭ žurnalistam u Maskvie 7 lutaha kiraŭnik Padlikovaj pałaty RF Siarhiej Ściapašyn pa vynikach sumiesnaha pasiadžeńnia kalehij kantrolnych viedamstvaŭ dźviuch krain.

«Isnuje prablema niaviernutaha kredytu na paŭtara miljarda rubloŭ. I my pastavili pytańnie pierad uradam Sajuznaj dziaržavy, z tym kab hetaje pytańnie było adrehulavana», — skazaŭ Ściapašyn. Jon rastłumačyŭ, što kredyty vydzialalisia na realizacyju čatyroch bujnych prahram Sajuznaj dziaržavy. Hetyja prahramy nie byli da kanca realizavany, a srodki dahetul nie viernuty.

Kiraŭnik Padlikovaj pałaty RF paviedamiŭ, što, zhodna z zaklučeńniem kantrolnych viedamstvaŭ dźviuch krain, biudžet Sajuznaj dziaržavy ŭ 2009 hodzie byŭ asvojeny nie poŭnaściu, adnak u 2010 hodzie situacyja palepšyłasia — biudžet byŭ asvojeny na 95%.

Kamientary da artykuła