Śledčy kamitet Biełarusi zaviaršyŭ rasśledavańnie kryminalnaj spravy ŭ dačynieńni da ŭdzielnikaŭ mižnarodnaj złačynnaj hrupy, jakija na praciahu 2005—2009 hadoŭ, znachodziačysia ŭ Minsku i Prazie, učyniali kradziažy tavaraŭ ź internet-mahazinaŭ ZŠA i Jeŭropy.
Ustanoŭlena, što kradziažy ŭčynialisia šlacham padavańnia ŭ internet-mahaziny rekvizitaŭ čužych bankaŭskich płastykavych kartak, trymalnikami jakich źjaŭlalisia hałoŭnym čynam hramadzianie ZŠA. Abvinavačanyja telefanavali ŭ bankaŭskija ŭstanovy i internet-mahaziny, nazyvali siabie zakonnymi trymalnikami płastykavych kartak i paćviardžali machlarskija apieracyi pa nabyćci tych ci inšych tavaraŭ. Paśla ź internet-mahazinaŭ hetyja tavary nakiroŭvalisia na padstaŭnych asob, jakija žyvuć u ZŠA, i ŭ dalejšym pieranakiroŭvalisia padstaŭnym asobam u Litvie i Rasii.
Padčas rasśledavańnia taksama ŭstanoŭlena, što niekatoryja z abvinavačanych rekłamavali i raspaŭsiudžvali ŭ internecie parnahrafičnyja materyjały,uchilalisia ad vypłaty padatkaŭ, zajmalisia niezakonnaj pradprymalnickaj dziejnaściu, dapamahali ŭ zbycie śpiecyjalnych prahramnych i aparatnych srodkaŭ, jakija dazvalajuć ažyćciaŭlać niesankcyjanavany dostup da kampjutarnaj sietki i niepravamiernaje zavałodańnie kampjutarnaj infarmacyjaj, učynili źniščeńnie majomaści šlacham padpału.
Ahulny ŭron ad złačynnaj dziejnaści abvinavačanych skłaŭ bolš jak 250 tysiač dalaraŭ ZŠA.
Pavodle vynikaŭ rasśledavańnia ŭdzielnikam złačynnaj hrupy vystaŭleny abvinavačańni na padstavie šerahu artykułaŭ Kryminalnaha kodeksa, jakija praduhledžvajuć adkaznaść za ŭčynieńnie złačynstvaŭ suprać ułasnaści i paradku ažyćciaŭleńnia ekanamičnaj dziejnaści, hramadskaha paradku i hramadskaj marali, infarmacyjnaj biaśpieki.
U SK asobna adznačyli, što raskryćcio złačynstvaŭ i rasśledavańnie hetaj kryminalnaj spravy stała mahčymym dziakujučy zładžanym dziejańniam Śledčaha kamiteta i MUS Biełarusi z pravaachoŭnymi orhanami zamiežnych dziaržaŭ — FBR, prakuraturaj i Departamientam justycyi ZŠA, Biuro kryminalnaj palicyi i Hienieralnaj prakuraturaj Litvy, MUS Rasii, MUS i Hienieralnaj prakuraturaj Ukrainy, Hienieralnaj prakuraturaj Hruzii.
Zaraz troje abvinavačvanych utrymlivajucca pad vartaj. Kryminalnaja sprava pieradadziena ŭ Hienieralnuju prakuraturu dla nakiravańnia ŭ sud.
Ciapier čytajuć
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami14
Kamientary