Miljony vybarščykaŭ vybirajuć u piatnicu novaha prezidenta Irana. Ciapierašni prezident Machmud Achmadziniežad nie moža ŭdzielničać u vybarach.
Jaho vaśmihadovaje kiraŭnictva zapomnicca ekanamičnym kryzisam u krainie i sankcyjami z boku krain Zachadu ŭ adkaz na niežadańnie Tehierana admovicca ad svajoj jadziernaj prahramy.
Vybarčyja ŭčastki buduć pracavać da 16:30 pavodle minskaha času. Kala 50 młn čałaviek majuć prava hołasu.
Na minułym tydni raskład siłaŭ na vybarach, vynik jakich zdavaŭsia ŭžo pieradvyznačanym, źmianiŭsia.
Niahledziačy na toje, što ŭsie šeść kandydataŭ ličacca kansiervatarami, adnamu ź ich — bahasłovu Chasanu Raŭchani — atrymałasia ŭ apošnija dni zavajavać davier prychilnikaŭ reformaŭ.
Raŭchani pačaŭ pryciahvać da siabie pavyšanuju ŭvahu paśla zajavaŭ ab nieabchodnaści narmalizavać adnosiny z Zachadam.
Pavieličeńnie kolkaści žadajučych prahałasavać za bahasłova źviazvajuć z tym, što ŭ aŭtorak ad udziełu ŭ prezidenckich vybarach admoviŭsia kandydat ad ruchu refarmistaŭ Machamied Reza Aref.
Pavodle jaho słoŭ, jon źniaŭ svaju kandydaturu paśla taho, jak jaho pra heta paprasiŭ adzin ź lidaraŭ refarmistaŭ, były prezident Irana Machamad Chatami.
Chatami i jašče adzin były prezident Irana Ali Akbar Chašemi Rafsandžani, jaki byŭ nie dapuščany da ŭdziełu ŭ vybarach, padtrymali Raŭchani.
Adnak jamu supraćstajać surjoznyja
sapierniki-kansiervatary , u tym liku pradstaŭnik krainy na pieramovach pa jadziernaj prahramie Irana Said Džalili, a taksama mer Tehierana Machamad Bahier Halibaf.
Astatnija kandydaty ličacca kansiervatarami, jakija blizkija pa svaich pohladach da iranskaha duchoŭnaha lidara ajatały Ali Chamieniei.
Kamientary