U Viciebskaj vobłaści ŭ nasielnictva kanfiskujuć i źniščajuć śviniej
U troch vioskach Viciebskaha rajona — Lipaŭcy, Šapiečyna i Asinaŭka — u nasielnictva kanfiskavali i źniščyli śviniej, jakich trymali ŭ asabistych prysiadzibnych haspadarkach.Matyvujecca heta niejkaj epidemijaj, ale jakaja mienavita haspadaram žyvioł nie kažuć.
U Šapiečynie, pry źjaŭleńni karespandenta z kamieraj, ludzi chavajuć vočy i admaŭlajucca razmaŭlać. Atrymałasia pahutaryć tolki z maładym chłopcam —
jon paćvierdziŭ, što 19 červienia ŭ ich vioscy kanfiskavali ŭsich śviniej, pahruzili ich u pryčepy traktaroŭ i pavieźli ŭ nieviadomym kirunku. Nasielnictvu paraili asabliva nie kazać pra vypadak, kali nie chočuć niepryjemnaściej na pracy.
U Asinaŭku likvidatary dabralisia tolki siońnia, i častka haspadaroŭ paśpieła zarezać svaich śviniej. Ale ŭ tych, chto nie paśpieŭ apracavać zabitych, śvinyja tušy zabirali, kanfiskoŭvali i razrezanaje miasa, kali znachodzili ŭ domie.
Jak raspaviała adna z žycharak Asinaŭki, za niekalki dzion da hetaha padvorki abychodziŭ staršynia sielsavieta, jaki zapisvaŭ u kaho kolki śviniej.
Siońnia adbirać žyvioł pryjechali pradstaŭniki vieterynarnaj słužby ŭ supravadžeńni milicyi.Zabitych śviniej nichto nie ŭzvažvaŭ, navat miernaj stužki pry sabie ŭ likvidacyjnaj kamandy nie akazałasia — vaha žyvioły ŭ akt kanfiskacyi zapisvałasia «na voka».
Karespandentu atrymałasia pahutaryć z dezinfiektarami, jakija pryjechali apracoŭvać pabudovy, dzie ŭtrymlivalisia śvińni.
Jany skazali, što nie viedajuć, čym byli chvoryja žyvioły, prosta atrymali ŭkazańnie apracavać chlavy kaŭstyčnaj sodaj.Da hetaha, pry kanfiskacyi, pamiaškańni apyrskvali chłorkaj. Zrešty, kantaktavać z presaj hetyja ludzi vidavočna nie žadali.
U toj ža čas, jak stała viadoma «Narodnym navinam Viciebska», paśla raspaŭsiudžvańnia infarmacyi ab kanfiskacyi žyvioł, u vioscy Maškany Sieńnienskaha rajona, pobač ź jakoj raźmieščany bujny śvinakompleks, nasielnictva ŭ panicy pačało masava zabivać asabistych śviniej.
Kamientary