Pradstaŭniki vykanaŭčaj ułady Mahilova i Čženčžou — stalicy kitajskaj pravincyi Chenań — padpisali 12 červienia pahadnieńnie ab ustanaŭleńni parodnienych adnosinaŭ.
Cyrymonija padpisańnia prachodziła ŭ budynku mahiloŭskaj ratušy. Ź biełaruskaha boku pahadnieńnie padpisaŭ staršynia Mahiloŭskaha harvykankama Uładzimir Cumaraŭ, z kitajskaha — kiraŭnik delehacyi, namieśnik mera narodnaha ŭrada Čženčžou Lju Donh.
Źviartajučysia da prysutnych, kiraŭnik kitajskaj delehacyi vykazała nadzieju, što pahadnieńnie daść mahčymaść bolš ciesnaha i šyrokaha supracoŭnictva pamiž dvuma haradami.
U svaju čarhu Uładzimir Cumaraŭ nahadaŭ, što nahodaj dla ŭstanaŭleńnia supracoŭnictva z kitajskimi kalehami stała padpisańnie ŭ 2004 hodzie pahadnieńnia ab ustanaŭleńni družalubnych adnosinaŭ pamiž Mahiloŭskaj vobłaściu i pravincyjaj Chenań. Pratakoł ab supracoŭnictvie pamiž Mahiloŭskim harvykankamam i narodnym uradam horada Čženčžou byŭ padpisany 7 listapada 2007 hoda.
«Na praciahu apošnich piaci hadoŭ aficyjnaja delehacyja Mahilova nieadnarazova vyjazdžała ŭ Čženčžou na roznyja mižnarodnyja inviestycyjnyja forumy. Ale mienavita ciesnyja adnosiny ŭ śfiery kultury i adukacyi zblizili našy harady», — padkreśliŭ mahiloŭski mer. Jon nahadaŭ, što ŭ 2012 hodzie ŭ mižnarodnym plenery pa žyvapisu ŭ Mahilovie ŭziali ŭdzieł kitajskija piejzažysty, u ratušy prajšła fotavystava ŭ honar 20-hodździa ŭstanaŭleńnia dypłamatyčnych adnosinaŭ pamiž KNR i Biełaruśsiu. U svaju čarhu ŭ Kitai hastralavaŭ simfaničny arkiestr Mahiloŭskaj haradskoj kapeły.
«U miežach ekanamičnaha supracoŭnictva nieabchodna zaznačyć, što za 2013 hod źniešniehandlovy abarot Mahilova z KNR skłaŭ $48 młn dołaraŭ, što na 20,6% bolš da ŭzroŭniu 2012 hoda», — skazaŭ Cumaraŭ.
Pavodle jaho słoŭ, salda źniešniaha handlu Mahilova z Kitajem skłałasia admoŭnym u pamiery $47 młn. Asnoŭnym eksparcioram mahiloŭskaj pradukcyi ŭ Kitaj vystupaje AAT «Mahiloŭchimvałakno».
Padpisanaje pahadnieńnie zaklučana na piać hadoŭ. Kali nivodny z bakoŭ nie vykaža žadańnie jaho skasavać, to jano budzie praciahvacca aŭtamatyčna.
Paśla padpisańnia pahadnieńnia ab ustanaŭleńni parodnienych adnosinaŭ było adznačana, što zaraz u Mahilova 16 haradoŭ-pabracimaŭ i 23 harady-partniory.
Ciapier čytajuć
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami11
Kamientary