Pieramovy pa adnaŭleńni pastavak pradukcyi biełaruskich pradpryjemstvaŭ u Rasiju praciahnucca 2 śniežnia
Pra heta paviedamiŭ namieśnik ministra sielskaj haspadarki i charčavańnia Biełarusi Ihar Bryło paśla pasiadžeńnia ŭ Minsielhascharčy z udziełam rasijskaha boku.
«Zaŭtra ŭ Minsk prybudzie delehacyja bolš vuzkich śpiecyjalistaŭ z Raśsielhasnahlada, ź jakimi našy śpiecyjalisty buduć adpracoŭvać usiu łabaratornuju dyjahnostyku».
Pavodle słoŭ Bryło, siońnia adbylisia pieramovy kiraŭnictva Minsielhasnahlada Biełarusi i zacikaŭlenych bakoŭ z namieśnikam kiraŭnika Raśsielhasnahlada Jaŭhienam Niepakłonavym.
«My ahavaryli ŭvieś pieralik pytańniaŭ, jakija budziem vyrašać siońnia-zaŭtra, pradstavili rasijskamu boku poŭny pakiet dakumientaŭ pa kožnym pradpryjemstvie, jakoje zakryta»,
— kanstatavaŭ jon. Pavodle słoŭ namieśnika ministra, u pradastaŭlenym pakiecie — usia infarmacyja ab isnujučych na pradpryjemstvach sistemach mieniedžmientu jakaści pradukcyi, ab łabaratornym kantroli. Pryčym majecca na ŭvazie kantrol nie tolki ŭ biełaruskich, ale i ŭ rasijskich łabaratoryjach.
«Pavodle isnujučaj na siońnia infarmacyi, u nas praktyčna pa ŭsich pradpryjemstvach niama nijakich padstaŭ, kab jany byli zakryty. My prykładziom usie namahańni, kab častka biełaruskich pradpryjemstvaŭ da kanca zaŭtrašniaha dnia była adkryta dla pastavak pradukcyi ŭ Rasiju», — padkreśliŭ Ihar Bryło.
Taksama jon kanstatavaŭ najaŭnaść šurpataściej va ŭzajemaadnosinach z rasijskimi kalehami pa pradastaŭleńni pratakołaŭ praviedzienych vyprabavańniaŭ.
«Rasijski bok nas prosta infarmuje ab nibyta znachodžańni niejkaj nieadpaviednaści našaj pradukcyi pa tych ci inšych namienkłaturnych pakazčykach. My majem prava patrabavać, kab jany prykłali da kožnaha infarmavańnia pratakoł vyprabavańniaŭ: na jakoj terytoryi ŭziaty proby, u mahazinie abo z fury prachodziŭ adbor, jakaja pradukcyja praviarałasia i h.d. Rasijanie nie pa kožnym fakcie pradstaŭlajuć pratakoły vyprabavańniaŭ. My ličym heta vielmi hrubym parušeńniem, ab čym i zajavili Jaŭhienu Niepakłonavu»,
— adznačyŭ Ihar Bryło.
Kamientary