Da kanca studzienia ŭ Biełarusi nie čakajecca vialikaha ŭzdymu zachvorvańnia na hryp, zajaviła 9 studzienia na pres-kanfierencyi ŭ Minsku kiraŭnik Nacyjanalnaha centra pa hrypie, viadučy supracoŭnik Respublikanskaha navukova-praktyčnaha centra epidemijałohii i mikrabijałohii Natalla Hrybkova.
Pavodle jaje słoŭ, niahledziačy na toje što Biełaruś znachodzicca «ŭ tak zvanym epidemičnym pieryjadzie», zachvorvańnie na hryp u krainie na nizkim uzroŭni — na heta paŭpłyvali školnyja kanikuły, a taksama siesija i nastupnyja kanikuły ŭ studentaŭ, jakija pieraškadžajuć raspaŭsiudžvańniu infiekcyi ŭ dziciačych i studenckich kalektyvach.
«Praktyčna da kanca studzienia my možam adčuvać siabie bolš-mienš spakojna adnosna hrypu», — padkreśliła Hrybkova.
Jak adznačyła śpiecyjalist, u Jeŭropie situacyja z raspaŭsiudžvańniem hrypu «taksama spakojnaja». «Uzroŭni zachvorvańnia nie pieravyšajuć parohavych značeńniaŭ, chacia pačynaje pavialičvacca častata vyjaŭleńnia virusaŭ hrypu, ale, znoŭ ža, sparadyčnych — heta adzinkavyja vypadki, nie źviazanyja adzin z adnym», — skazała jana.
Pavodle słoŭ namieśnika načalnika adździeła hihijeny, epidemijałohii i prafiłaktyki Ministerstva achovy zdaroŭja Iny Karaban, zvyčajna z kastryčnika pa maj u Biełarusi nazirajecca siezon zachvorvańnia na vostryja reśpiratornyja infiekcyi, i ŭ najbližejšy čas situacyja moža abvastrycca.
«Bolš słotnaje nadvorje, jakoje ciapier nastupaje, spryjaje tamu, što ludzi čaściej pačnuć źviartacca da ŭrača, bo virusy ŭ hety pieryjad aktyvizujucca i adbyvajecca bolš ciesny kantakt ludziej adzin z adnym. Čałaviek, jaki kašlaje, čchaje, pieradaje vakoł siabie virus na adlehłaści troch mietraŭ», — adznačyła Karaban.
Pry hetym jana vykazała nadzieju, što hetaj zimoj, jak i ŭ apošnija niekalki hadoŭ, epidemii hrypu ŭ Biełarusi nie budzie.
«Na siońnia ŭzrovień zachvorvańnia, jaki my nazirajem z 1 kastryčnika, dastatkova nizki, i sioleta ŭ nas vakcynavana amal 42% nasielnictva», — patłumačyła Karaban.
Kamientary