U sieradu Litoŭskaja kamisija pa radyjo i televiaščańni (ŁKRTV) spyniła na try miesiacy retranślacyi prahram usiaho rasijskaha kanała «RTR-Płanieta».
Na dumku kamisii, telekampanija ŭ svaich prahramach padbuchtorvała da vajny i raspalvała nianaviść, a taksama paŭtorna parušyła zakon ab infarmavańni hramadstva. Kamisija śćviardžaje, što paviedamiła ab parušeńniach i zapłanavanych mierach Jeŭrakamisii.
«Padčas kansultacyj ź dziaržavaj, jakaja i tranśluje teleprahramy, i Jeŭrakamisijaj nie ŭdałosia pryjści da ŭzajemnaj damovy na praciahu 15 dzion ad papiaredžańnia, i parušeńni praciahvajucca», — adznačyła kamisija.
Rašeńnie členy Kamisii pryniali ŭ suviazi ź pieradačaj Uładzimira Sałaŭjova «Niadzielny viečar», jakaja ŭ efir vyjšła 12 sakavika. Pa słovach kiraŭnika kamisii E. Vajciekunasa, u pieradačy ŭ asnoŭnym kazaŭ vice-staršynia Dziaržaŭnaj Duma Rasii Uładzimir Žyrynoŭski. U joj «farmavałasia mierkavańnie pra ŭkraincaŭ, jak vorahaŭ, ihnaravałasia i prynižałasia terytaryjalnaja cełasnaść Ukrainy», hučali taksama zakliki raspravicca z ukraincami.
Vajciekunas padkreśliŭ, što byli zafiksavanyja kankretnyja parušeńni — raspalvańnie vajny i nianaviści, niahledziačy na toje, što raspravicca z Ukrainaj i Jeŭrapiejskim Sajuzam zaklikaŭ adzin čałaviek — namieśnik staršyni rasijskaha parłamienta Uładzimir Žyrynoŭski.
«Adzin čałaviek ci nie adzin, słužbovaja asoba abo nie, ustanoŭlena: była nianaviść, padbuchtorvańnie da vajny. Tym bolš, što vysnovy padrychtavaŭ kampietentny orhan — Departamient stratehičnaj kamunikacyi Uzbrojenych sił Litvy, śpiecyjalisty jakoha majuć vielmi šmat viedaŭ mienavita ŭ hetaj halinie», — paviedamiŭ žurnalistam Vajciekunas.
Rašeńnie ŭstupaje ŭ siłu 13 krasavika, dla hetaha nie spatrebiacca sankcyi sudu, adznačyli pradstaŭniki kamisii ŭ intervju BNS.
Jak paćvierdziŭ BNS staršynia kamisii Edmundas Vajciekunas, takaja pracedura ŭžyvajecca ŭ Jeŭrasajuzie ŭpieršyniu.
Kamientary