Parłamient pryniaŭ u pieršym čytańni zakonaprajekt «Ab baraćbie z karupcyjaj»

Deputaty Pałaty pradstaŭnikoŭ Nacyjanalnaha schodu pryniali siońnia ŭ pieršym čytańni prajekt zakona «Ab baraćbie z karupcyjaj».

Zakon skiravany na ŭdaskanaleńnie pravavoha rehulavańnia ŭ śfiery baraćby z karupcyjaj z metaj pavyšeńnia procidziejańnia joj, zajaviŭ hienieralny prakuror Biełarusi Alaksandr Kaniuk.Prajekt zakona ŭstanaŭlivaje zabaronu na paŭtorny pryjom na dziaržaŭnuju słužbu asob, jakija raniej byli zvolnienyja sa słužby pa dyskredytujučych akaličnaściach. 

Zakonaprajekt taksama ŭdaskanalvaje paradak dekłaravańnia dachodaŭ i majomaści asobnych katehoryj dziaržaŭnych słužbovych asob z metaj maksimalna poŭnaha ŭstanaŭleńnia ich realnaha majomasnaha stanovišča. «Pa hetych pałažeńniach zakonaprajekta byli prapanovy «na hrani», — raskazaŭ hienprakuror. — Prapanavałasia ledź nie zazirać u kišeń čynoŭnika. Napeŭna, heta nie zusim pravilna było b z punktu hledžańnia marali i etyki. Takija nie zusim adekvatnyja prapanovy my adrazu admiali. Jość inšyja miechanizmy, jakija dazvalajuć vyrašać zadačy, pastaŭlenyja prezidentam». 

Prajekt zakona ŭtrymlivaje abmiežavańni, jakija ŭstanaŭlivajucca dla dziaržaŭnych słužbovych i pryraŭnavanych da ich asob. Takija asoby, u pryvatnaści, nie majuć prava: 

- zajmacca pradprymalnickaj dziejnaściu asabista ci praź inšych asob; 

- akazvać sadziejničańnie mužu (žoncy), blizkim svajakam ci rodnym u ažyćciaŭleńni pradprymalnickaj dziejnaści, vykarystoŭvajučy słužbovaje stanovišča; 

- mieć rachunki ŭ zamiežnych bankach, za vyklučeńniem vypadkaŭ vykanańnia dziaržaŭnych funkcyj u zamiežnych dziaržavach i inšych vypadkaŭ, ustanoŭlenych zakanadaŭčymi aktami; 

- prymać majomaść (padarunki) u suviazi z vykanańniem słužbovych abaviazkaŭ, za vyklučeńniem suvieniraŭ, uručanych pry praviadzieńni pratakolnych i inšych aficyjnych mierapryjemstvaŭ; 

- vykarystoŭvać z pazasłužbovymi (niepracoŭnymi) metami srodki materyjalna-techničnaha, finansavaha i infarmacyjnaha zabieśpiačeńnia, inšuju majomaść dziaržaŭnaha orhana, arhanizacyi i słužbovuju tajnu. 

Praduhledžana piersanifikacyja adkaznaści za mahčymyja niehatyŭnyja nastupstvy, jakija nastupili ŭ vyniku realizacyi pracedur dziaržaŭnych zakupak. 

Zakonaprajekt taksama ŭvodzić miechanizm abarotu ŭ dachod dziaržavy «niezakonnaha ŭzbahačeńnia, atrymanaha dziaržaŭnaj słužbovaj asobaj». Jak rastłumačyŭ Kaniuk, heta datyčycca tych asob, u jakich zafiksavana jaŭnaja nieadpaviednaść najaŭnaj majomaści i hrašovych srodkaŭ z realnymi dachodami, atrymanymi z zakonnych krynic. Takaja asoba zmoža dobraachvotna vypłacić roźnicu, a kali hetaha nie adbudziecca, na jaje možna padavać u sud. 

U adpaviednaści z zakonaprajektam jaŭnym pieravyšeńniem koštu majomaści i inšych raschodaŭ nad dachodami, atrymanymi z zakonnych krynic, pryznajecca pieravyšeńnie, jakoje składaje nie mienš jak 25% ad dachodaŭ, atrymanych z zakonnych krynic.

• 0
• 0
• 0
• 0
• 0
• 0
• 0
• 0