Kijeŭ atakavali rasijskija «Banderoli». Što heta za dron-rakieta i ci stanuć ataki masavymi?

Dzie vyrablajuć «Banderoli»

Pa danych ukrainskaj raźviedki, raspracoŭščyk rakiety — padsankcyjnaje pradpryjemstva «Kranštat». Asnoŭnym jaje nośbitam źjaŭlajecca bieśpiłotnik «Aryjon» vytvorčaści toj ža kampanii. Taksama robicca adaptacyja vyrabu dla prymianieńnia z udarnych viertalotaŭ Mi-28N.

Charaktarystyki

Asablivaściu rakiety źjaŭlajecca jaje zdolnaść vykonvać pavaroty ź mienšym radyusam, čym u typovych kryłatych rakiet rasijskaj vytvorčaści (Ch-101, 3M-14, 9M727, Ch-69), zachoŭvajučy pry hetym charakternuju trajektoryju palotu kryłataj rakiety.

«Banderol» zabiaśpiečanaja bajavoj častkaj masaj da 150 kh; jana zdolnaja pieraadolvać adlehłaść da 500 km z chutkaściu 500 km/h. U jakaści paliva vykarystoŭvajecca avijacyjnaja haza.

Z čaho składajecca dron

Ekśpierty HUR zafiksavali vykarystańnie zamiežnych kampanientaŭ, reaktyŭny ruchavik Swiwin SW800Pro kitajskaj vytvorčaści, akumulatarnyja batarei Murata (Japonija), siervapryvady Dynamixel MX-64AR kampanii Robotis z Paŭdniovaj Karei, a taksama amal dva dziasiatki mikračypaŭ amierykanskich, kitajskich, šviejcarskich, japonskich i paŭdniovakarejskich vytvorcaŭ.

U čym klučavaja pieravaha «Banderoli» nad «Šachiedami»

Avijacyjny ekśpiert Kanstancin Kryvałap u kamientary «RBK-Ukraina» adznačyŭ, što da klučavych pieravah «Banderolaŭ» možna adnieści prykmietna bolšuju chutkaść u paraŭnańni z dronami, što moža dapamahčy bojeprypasu miescami prarvać ukrainskuju SPA.

Jon moža być efiektyŭnym dla taho, kab źniščać niejkija adzinkavyja celi, ale masavym jon nie stanie praz adnosna vysoki košt u paraŭnańni z dronami.

Ci mohuć «Banderoli» stać surjoznaj pahrozaj dla Kijeva?

«Hety vid uzbrajeńnia maje davoli abmiežavanaje prymianieńnie. Jaho možna zapuskać albo ź viertalota, albo z dronaŭ typu «Arłan». Dla hetaha viertalot ci BpŁA treba padniać u pavietra, tamu heta nie zusim zručnaja reč», — havoryć Kanstancin Kryvałap.

Akramia taho, pavodle jaho słoŭ, «Banderol» prykładna ŭtraja daražejšaja za «Šachied», tamu nie moža stać masavaj, bo siońnia asnoŭny trend — heta «šmat i tanna». Pry hetym hety bojeprypas maje navat nie ŭdvaja bolšuju vybuchovuju častku, da taho ž z-za vialikich habarytaŭ źjaŭlajecca zručnaj cellu dla reaktyŭnaj avijacyi i kompleksaŭ SPA.

Unočy 15 červienia Rasija naniesła masavany kambinavany ŭdar pa Kijevie — dronami, balistyčnymi i kryłatymi rakietami.

U vyniku ataki paškodžańni zafiksavali ŭ 10‑ci rajonach ukrainskaj stalicy, zahinuli piać čałaviek, jašče bolš za 30 atrymali ranieńni.

Padčas ataki Rasija prymianiła suprać Ukrainy bolš za 680 srodkaŭ źniščeńnia — siarod ich «Cyrkony», balistyka «Iskander», kryłatyja rakiety i sotni bieśpiłotnikaŭ roznych typaŭ. SPA źniščyła abo padaviła 632 pavietranyja celi.

• 1
• 0
• 0
• 0
• 0
• 0
• 13
• 0