Asablivaści sočynskich trasaŭ, abo Troje na adnaho
Vizyt Łukašenki ŭ Rasieju kamentuje ŭ svaim błohu Alaksandar Kłaskoŭski.
Čutki spraŭdzilisia: Łukašenka i Pucin sustrelisia ŭ Sočy. Kali bolej dakładna, to raskład byŭ "troje na adnaho".
Pavodle presavaj słužby biełaruskaha kiraŭnika, sustreča 3 lutaha jość "lahičnym praciaham kantaktaŭ u miežach damoŭlenaściaŭ, dasiahnutych u śniežni 2007 hodu ŭ Miensku". Pikantnaść ža ŭ tym, što analityki dasiul hadajuć, pra što dva prezydenty nasamreč damovilisia tady. I čamu Pucin u vyniku vyhladaŭ ščodrym, jak śviaty Mikałaj (kredyt na paŭtara miljardy dalaraŭ na lhotnych umovach, haz pa 119 dalaraŭ na pieršy kvartał sioleta i h.d.).
Što moh paabiacać u śniežni biełaruski bok? Vejer versyjaŭ — ad zialonaj vulicy rasiejskamu kapitału (i jon užo pre, asabliva ŭ bankaŭskuju sferu) da abjadnalnaha referendumu.
Aŭtar hetych radkoŭ daloki ad dumki, što ajčynnaje načalstva nu prosta śpić dy bačyć, jak sprytniej "zdać krainu". Ale samaje prykraje toje, što nivodzin varyjant raźvićcia padziej, uklučna z samym niezajzdrosnym dla losu niezaležnaści, nia moža być vyklučany. Niama prazrystaści ŭ stasunkach z Kramlom (rytualnym zaklinańniam daŭno nichto nie daje viery), niama harantyjaŭ našaha suverenitetu (dumajecie, kali što, Zachad kaśćmi laža?), niama mechanizmu hramadzkaha kantrolu nad dziejańniami kiroŭnaje viarchoŭki (palityčnaje pole ŭ krainie prosta vypalenaje).
Miž tym Biełaruś pa-raniejšamu tryvała siadzić na jhołcy naftahazavaj zaležnaści (menzurka "čornaha zołata" z daliny Arynoka moža razhladacca chiba što jak muzejnaja kaštoŭnaść). Kali zamovu na AES addaduć "Atambudekspartu", to enerhietyčnaja (a značyć i palityčnaja) zaležnaść ad Maskvy tolki ŭzmocnicca. I tady nastupnik Pucina Miadźviedzieŭ elementarna dabje "biełaruskaje pytańnie" pavodle daŭno napisanaha ŭ Kramli scenaru.
Darečy, hetym razam u Sočy Łukašenka mieŭ hutarku ź Miadźviedzievym až dvojčy. Spačatku, nibyta miž inšym sutyknuŭšysia ŭ harnałyžnym centry, jany abmierkavali, jak prahučała pa NTV, "asablivaści sočynskich trasaŭ". A potym hetak sama "miž inšym" budučy haspadar Kramla zazirnuŭ na ahieńčyk u "Bačaraŭ ručaj", dzie viali hutarku dva dziejnyja prezydenty. Zvyš taho, zavitaŭ i premjer Zubkoŭ. Jak daścipna zaznačyŭ ahladalnik Alaksandar Zajcaŭ, "troje na adnaho, kaniešnie, niesumlenna, ale, možna mierkavać, vielmi efektyŭna".
Na dumku rasiejskaha palitolaha Andreja Suzdalcava, "pierad Łukašenkam było pastaŭlena pytańnie – ź kim jon? Albo jon dalej raźvivaje intehracyjny prajekt, albo jon zajmajecca svajoj dziaržavaj i nijakich adnosinaŭ da Rasiei nia maje. Sytuacyja pavinna być vyrašanaja, tym bolš napiaredadni prychodu da ŭłady novaj elity".
Dla presy ž Pucin na toj sustrečy hučna paradavaŭsia niabačanamu dvuchbakovamu tavarazvarotu — 25 miljardaŭ dalaraŭ (kali bolej dakładna, to navat 26 z hakam). Nam ža tut chutčej płakać varta, bo mienavita ŭ handli z Rasiejaj majem katastrafičnaje admoŭnaje salda — až 8,3 miljardu! Łukašenka ŭ hetym kantekście strymana zaznačyŭ, što nam jašče "trochi pašenciła, ceny na charčavańnie padskočyli". Maŭlaŭ, našy sielhasvytvorcy na hetym padzarabili. Znoŭ ža nieviadoma, radavacca ci płakać, bo rodny ŭrad pad markaj vyraŭnoŭvańnia praduktovych cenaŭ z susiedzkimi borździeńka ŭzdymaje košt charčoŭ u našych kramach.
Jašče z kankretyki: biełaruski kiraŭnik ścipła paprasiŭ, kab našym admysłoŭcam dali mahčymaść pabudavać u tych miaścinach choć adzin z 70 alimpijskich abjektaŭ. Maŭlaŭ, stvorym tut vam "kutok Biełarusi".
Što ž, zarabić na vyhadnaj budoŭli nie zaškodzić. Adno što točyć tryvoha: kab da toj Alimpijady z samoj Biełarusi nie zrabili "kutok Rasiei".
Kamientary