Na Mižnarodnaj kanfierencyi pracy ŭ Ženievie znoŭ razhledziać «biełaruskaje pytańnie»
Situacyja z pravami pracoŭnych u Biełarusi znoŭ budzie abmiarkoŭvacca 5 červienia ŭ miežach 104-j siesii Mižnarodnaj kanfierencyi pracy (MKP), jakaja prachodzić 1—13 červienia ŭ Ženievie.Raskład indyvidualnych krainavych słuchańniaŭ apublikavany na sajcie Mižnarodnaj arhanizacyi pracy (MAP).
U pracy kanfierencyi biare ŭdzieł aficyjnaja ŭradavaja delehacyja Biełarusi na čale ź ministram pracy i sacyjalnaj abarony Maryjanaj Ščotkinaj. U apublikavanym śpisie ŭdzielnikaŭ u składzie biełaruskaj delehacyi ličacca taksama staršynia Fiederacyi prafsajuzaŭ Biełarusi Michaił Orda, pradstaŭniki Ministerstva zamiežnych spraŭ, Biełaruskaj asacyjacyi pradpryjemstvaŭ pramysłovaści (BiełAPP), Biełaruskaha prafsajuza rabotnikaŭ chimičnaj, hornaj i naftavaj halinaŭ pramysłovaści, Biełaruskaha prafsajuza rabotnikaŭ aŭtamabilnaha i sielskahaspadarčaha mašynabudavańnia i inšych.
Lidar Biełaruskaha kanhresa demakratyčnych prafsajuzaŭ Alaksandr Jarašuk prysutničaje na MKP u jakaści vice-prezidenta Mižnarodnaj kanfiederacyi prafsajuzaŭ.
Nahadajem, «biełaruskaje pytańnie» ŭźnikła ŭ paradku dnia MAP u 2003 hodzie. Tady Administracyjny saviet MAP pačaŭ rasśledavańnie parušeńnia pravoŭ prafsajuzaŭ u Biełarusi ŭ suviazi sa skarhaj niezaležnych prafsajuzaŭ. Pa vynikach rasśledavańnia Biełaruś nieadnarazova ŭnosili ŭ śpiecparahraf MAP jak krainu, dzie hruba parušajucca pravy prafsajuzaŭ. Heta, u svaju čarhu, stała pryčynaj dla vyklučeńnia Biełarusi ŭ červieni 2007 hoda z Hienieralnaj sistemy prefierencyj Jeŭrasajuza.
Dla viartańnia prefierencyj urad Biełarusi pavinien vykanać 12 rekamiendacyj MAP, siarod jakich: pradastavić niezaležnym prafsajuzam mahčymaść rehistravać piarvičnyja arhanizacyi; dać im prava pracavać naroŭni z aficyjnymi prafsajuzami; spynić pieraśled hramadzian pa prafsajuznaj prynaležnaści; zabiaśpiečyć usim prafsajuznym abjadnańniam prava ŭdziełu ŭ vyrašeńni važnych sacyjalnych prablem krainy.
U studzieni 2014 hoda Biełaruś naviedała misija na čale z daradcam hiendyrektara MAP Kary Tapijołam. Zadačaj misii było «skłaści poŭnuju karcinu situacyi z pravami prafsajuzaŭ i dapamahčy biełaruskim uładam realizavać raniejšyja rekamiendacyi śledčaj kamisii MAP». Pradstaŭniki arhanizacyi sustrelisia z kiraŭnictvam šerahu ministerstvaŭ, dvuch bujnych prafcentraŭ — praŭładnaj Fiederacyi prafsajuzaŭ Biełarusi i niezaležnaha Biełaruskaha kanhresa demakratyčnych prafsajuzaŭ, a taksama z aktyvistami arhanizacyi svabodnaha prafsajuza pradpryjemstva «Hranit» (Mikaševičy, Łuniniecki rajon, Bresckaja vobłaść), jakija źviedali nacisk z boku administracyi pradpryjemstva.
Praz paŭhoda paśla vizitu misii, u červieni 2014 hoda na siesii Mižnarodnaj kanfierencyi pracy Biełaruś u siomy raz była ŭniesiena ŭ śpiecyjalny parahraf MAP jak kraina, dzie hruba parušajucca pravy prafsajuzaŭ.
Štohadovaja Mižnarodnaja kanfierencyja pracy źjaŭlajecca vyšejšym orhanam MAP, na joj prymajucca ŭsie akty arhanizacyi.
Kamientary