Staršynia Centralnaj kamisii pa vybarach i praviadzieńni respublikanskich refierendumaŭ Lidzija Jarmošyna i pradstaŭnik kampanii «Pravaabaroncy za svabodnyja vybary» Valancin Stefanovič 20 lipienia vystupili ŭ Vienie na kanfierencyi ABSIE, pryśviečanaj acency mižnarodnych standartaŭ i abaviazacielstvaŭ dla praviadzieńnia svabodnych, spraviadlivych i demakratyčnych vybaraŭ.
Jak paviedamiŭ Stefanovič, u svaim vystupleńni Jarmošyna spyniłasia na implemientacyi rekamiendacyj ABSIE ŭ vybarčaje zakanadaŭstva napiaredadni prezidenckich vybaraŭ 2010 hoda. «Novaj była infarmacyja pra implemientacyju rekamiendacyj pa arhanizacyi hałasavańnia słabaviduščych. Aprača taho, Jarmošyna nahadała, što 11 kastryčnika ŭ Biełarusi projduć prezidenckija vybary, na jakija ŭ jakaści naziralnikaŭ zaprošanyja pradstaŭniki mižnarodnych arhanizacyj», — zaznačyŭ pravaabaronca.
Sam Stefanovič, vystupajučy pierad prysutnymi, padkreśliŭ, što pry adsutnaści palityčnaha pluralizmu, va ŭmovach abmiežavańnia svabody asacyjacyj i schodaŭ ciažka havaryć pra demakratyčnyja vybary ŭ luboj krainie. «Rekamiendacyi ABSIE — heta dobra, ale na praktycy jany nie pracujuć. Naprykład, norma ab pradstaŭnictvie ŭ vybarčych kamisijach pradstaŭnikoŭ hramadskich arhanizacyj. Apazicyi ŭ ich jak nie było, tak i niama, pakolki miescy zajmajuć praŭradavyja BRSM, «Biełaja Ruś» i inšyja», — skazaŭ pramoŭca.
Pavodle jaho słoŭ, pravaabaroncy čakajuć ŭvasableńnia ŭ žyćcio rekamiendacyj, jakija dazvalali b zrabić prazrystymi padlik hałasoŭ.
Kanfierencyju vioŭ dyrektar Biuro pa demakratyčnych instytutach i pravach čałavieka ABSIE Michael Hieorh Link. Siarod zaprošanych byli členy centralnych vybarčych kamisij, parłamientaryi, ekśpierty ŭ śfiery vybarčaha prava i nacyjanalnyja naziralniki z krain — udzielnic Arhanizacyi pa biaśpiecy i supracoŭnictvie ŭ Jeŭropie. Adnym sa śpikieraŭ byŭ kiraŭnik CVK Rasii Uładzimir Čuraŭ, jaki, pavodle słoŭ Stefanoviča, pavodziŭ siabie ahresiŭna, u pryvatnaści, «pastajanna patrabavaŭ» praviarać krynicy finansavańnia NDA i padkreślivaŭ, što BDIPČ ABSIE nie pavinna ŭkazvać krainam, jak pravodzić vybary.
Kamientary