Inicyjatyŭnaja hrupa pa zbory podpisaŭ u padtrymku vyłučeńnia kandydatam u prezidenty staršyni Biełaruskaj partyi levych «Spraviadlivy śviet» Siarhieja Kalakina za tydzień sabrała amal 20 tys. podpisaŭ, paviedamiŭ kiraŭnik jaho inicyjatyŭnaj hrupy Valeryj Uchnaloŭ.
«Taki temp zboru podpisaŭ nielha nazvać dobrym. Ale rezierv jość.
Strohaja spravazdačnaść pa sabranych podpisach tyčycca členaŭ partyi, jaje struktur. Ale ŭ inicyjatyŭnaj hrupie jość ludzi, jakija nie źjaŭlajucca členami partyi, jany jaje prychilniki, jany taksama sabrali niejkuju kolkaść podpisaŭ. Treba ŭličvać, što heta pieršy tydzień zboru podpisaŭ, nie ŭsie adrazu jaho pačali, nie adrazu prystasavalisia da hetaj pracedury», — skazaŭ Uchnaloŭ.
Pavodle jaho słoŭ, inicyjatyŭnaja hrupa Kalakina pry zbory podpisaŭ robić akcent na praviadzieńni pikietaŭ. «Prablem pry ich praviadzieńni pakul niama, tolki nievialikija nieŭrazumieńni. U cełym prykładaŭ, što ciapier ułada pieraškadžaje praviadzieńniu pikietaŭ, u nas niama», — adznačyŭ palityk.
U inicyjatyŭnuju hrupu Kalakina ŭvachodzić kala 1.450 čałaviek.
Kamientary