Vyzvaleńnie biełaruskich źniavolenych i mahčymy vizit Alaksandra Łukašenki ŭ Vatykan — nie źviazanyja pamiž saboj rečy, zajaviŭ BiełaPAN apostalski nuncyj Kłaŭdya Hudžeroci.
«Vyzvaleńnie biełaruskich źniavolenych i mahčymy vizit Alaksandra Łukašenki da papy nie źviazanyja pamiž saboj. Papa asabista ŭdzielničaŭ u hetym pracesie. My hetym hanarymsia, bo heta spryjała palapšeńniu mižnarodnych adnosin, a taksama ŭmacavańniu miru i harmonii ŭ krainie. Ja rady, što biełaruskaje hramadstva acaniła hetyja dziejańni papy», — adznačyŭ pradstaŭnik Śviatoha trona.
Nakont mahčymaha vizitu Łukašenki da papy rymskaha ŭ vieraśni 2015 hoda apostalski nuncyj rastłumačyŭ: «U praktycy Śviatoha prastoła nie pryniatyja aŭdyjencyi ŭ papy palityčnych lidaraŭ napiaredadni nadychodu ŭ ich krainie vybaraŭ. U suviazi z hetym prezident Alaksandr Łukašenka nie źviartaŭsia z prośbaj ab takoj aŭdyjencyi najbližejšym časam, kab nikoha nie stavić u niajomkaje stanovišča».
U pačatku lipienia były ministr zamiežnych spraŭ Słavakii palityčny analityk Pavieł Dziemieš paviedamiŭ u intervju «Radyjo Svaboda» pra mahčymy vizit Łukašenki ŭ Vatykan. Jon taksama prahnazavaŭ, što pierad hetaj pajezdkaj Łukašenka moža vyzvalić Mikałaja Statkieviča. «Ja schilny dumać, što Łukašenka vypuścić jaho pierad svajoj pajezdkaj da papy rymskaha ŭ vieraśni hetaha hoda ci adrazu paśla jaje», — zajaviŭ tady eks-dypłamat.
Pra hatoŭnaść Vatykana pryniać Łukašenku zajaŭlaŭ kardynał Pjetra Parolin padčas pryjezdu ŭ Minsk u sakaviku hetaha hoda. Pavodle jaho słoŭ, mahčymaść arhanizacyi takoha vizitu abmiarkoŭvałasia padčas jaho sustreč z pradstaŭnikami biełaruskich dziaržorhanaŭ.
Kamientary