Havorki pra toje, kab raźmiaścić rasijskuju avijabazu na terytoryi Biełarusi, nikoli nie viałosia. Pra heta zajaviŭ siońnia Alaksandr Łukašenka, adkazvajučy na pytańni padčas naviedvańnia novaha ŭčastka druhoj Minskaj kalcavoj aŭtadarohi, pieradaje karespandent BIEŁTA.
«Ja naziraju ŭ apošni čas kryki našaj apazicyi z nahody raźmiaščeńnia rasijskaj avijabazy na terytoryi Biełarusi. Ja ničoha pra heta nie viedaju. Čałaviek, jaki pavinien prymać hetaje rašeńnie, — ja pra heta ničoha nie viedaju», — adznačyŭ kiraŭnik biełaruskaj dziaržavy.
«Nam nie treba baza siońnia. Tym bolš vajskova-pavietranyja siły. Nam patrebny peŭnyja ŭzbrajeńni. Pra što ja publična taksama havaryŭ Pucinu i raniej Miadźviedzievu», — dadaŭ biełaruski lidar.
Alaksandr Łukašenka źviarnuŭ uvahu na toje, što Biełaruś znachodzicca ŭ sajuzie z Rasijskaj Fiederacyjaj. «U nas jość adkaznaść, i ŭ Rasii, i ŭ Biełarusi. My zaklučyli pahadnieńnie — jany adkazvajuć razam z nami za zachodni kirunak. Faktyčna, my nie ŭ adzinočku suprać NATA tut staim, razam z Rasijskaj Fiederacyjaj. U nas jość kankretny płan navat na vypadak vajny, jak treba dziejničać. Naturalna, my jaho nie apublikujem, heta absalutna sakretny płan, ale na hetym kirunku hałoŭnaja siła — heta biełaruskaja armija. Kali kanflikt — Rasija pačynaje nas padtrymlivać adpaviednymi ludskimi resursami, vyznačany kankretnyja armii, samaloty, viertaloty i hetak dalej. Na vypadak kanfliktu», — skazaŭ kiraŭnik biełaruskaj dziaržavy.
«Nam patrebny samaloty, a nie bazy siońnia. U nas vydatnyja lotčyki, u nas dobraja škoła lotčykaŭ vajskovych, hramadzianskich. I navošta mnie stvarać bazu? — adznačyŭ prezident. — Navošta mnie siońnia zavozić siudy samaloty i lotčykaŭ inšych dziaržaŭ? A svaje što buduć rabić?»
«Nam patrebnyja ŭzbrajeńni dla taho, kab być bolš zabiaśpiečanymi ŭ płanie abarony rubiažoŭ Biełarusi i Rasii. My nikudy nie źbirajemsia jechać vajavać, i ja pra heta kazaŭ», — dadaŭ jon.
«U mianie na hety kont ni z kim nie było razmovy. Prosta mianie ździŭlaje i navat u niejkaj stupieni aburaje i kryŭdzić, navošta heta było rasiejcam siońnia ukidvać u srodki masavaj infarmacyi? Moža, niepakojacca, što my sapraŭdy na Zachad sychodzim, kab padkinuć hetuju temu, kab Zachad pačaŭ u nas pytacca abo sumniavacca ŭ tym, što my ź imi chočam narmalizacyi adnosin?» — skazaŭ biełaruski lidar.
Jon taksama papiaredziŭ, što «buduć roznaha rodu pravakacyi, ź luboha boku». «Budźcie vielmi akuratnyja. Nie rassłablajciesia», — skazaŭ Łukašenka.
Ciapier čytajuć
Zahnuŭsia biznes člena chakiejnaj kamandy Łukašenki, jaki abiacaŭ pabudavać łyžny maniež za Viarchoŭnym sudom uzamien na łasyja ŭčastki1
Kamientary