24 sakavika — Suśvietny dzień baraćby z suchotami

Štohod u śviecie ad suchotaŭ pamiraje 3 miljony čałaviek. Ličycca, što adna tracina nasielnictva Ziamli infikavanaja pałačkaj Kocha.

U Biełarusi na ŭliku staić bolš za 13 tysiač chvorych na suchoty. Siońnia ŭ krainie pačynajecca infarmacyjnaja kampanija «Ja mahu spynić tuberkuloz».

U 2007 hodzie ŭ Biełarusi vyjaŭlenyja 4872 novyja vypadki zachvorvańnia na suchoty, što składaje 54 chvorych na 100 tysiač nasielnictva. Pakazčyk śmiarotnaści — 9,3 vypadki na 100 tysiač. Asablivuju ŭvahu varta źviarnuć na takuju ličbu: 2% zachvareŭšych na suchoty — medyčnyja rabotniki, — kaža kiraŭnik sumiesnaha prajektu Ministerstva achovy zdaroŭja i PRAAN pa baraćbie z suchotami Łarysa Saviščava.

«Na žal, heta medyčnyja rabotniki, peŭnuju častku składajuć VIČ‑infikavanyja (da taho ž, bolšaja častka infikavanych pamiraje mienavita ad suchotaŭ), heta biespracoŭnyja, ludzi, jakija vyzvalenyja z papraŭčych ŭstanovaŭ i ludzi, jakija pakutujuć na chraničny alkahalizm».

Letaś u Biełarusi była pryniataja druhaja Dziaržprahrama pa baraćbie z suchotami na 5 hadoŭ, na jakuju dziaržava vydatkoŭvaje 26 miljonaŭ dalaraŭ. I Hlabalny Fond pa baraćbie sa ŚNIDam, tuberkulozam i malaryjej dadatkova vyrašyŭ vydatkavać Biełarusi hrant na sumu 14,4 miljony dalaraŭ. Takim čynam, usiaho na pieraadoleńnie niebiaśpiečnaj chvaroby ciaham piaci hadoŭ pojdzie bolš za 40 miljonaŭ dalaraŭ. Atrymalniki dapamohi — chvoryja na suchoty, źniavolenyja, chvoryja na ŚNID, pradstaŭniki najmienš abaronienych słajoŭ nasielnictva. Srodki buduć vykarystanyja na zakupku sučasnaha dyjahnastyčnaha abstalavańnia, efektyŭnyja jakasnyja leki, navučańnia persanału, manitorynh i stvareńnie Nacyjanalnaha rehistru «Tuberkuloz». Užo ŭ bližejšyja dva hady bolš jak 7,5 tysiačy chvorych projduć lačeńnie sučasnymi supraćtuberkuloznymi preparatami.

Vielmi tryvožnaja sytuacyja ŭ papraŭčych ustanovach krainy. Raspaviadaje lekar Respublikanskaha turemnaha špitalu, kiraŭnik prajektu pa penitencyjarnaj systemie Aleh Dubovik:

«U 2007 hodzie zachvorvalnaść na suchoty ŭ kryminalna‑papraŭčaj systemie skłała 375,7 čałaviek na 100 tysiač. Heta amal ŭ 8 razoŭ vyšej čym pa systemie achovy zdaroŭja. Jość asoby, chvaroba ŭ jakich vyjaŭlajecca pry pastupleńni ŭ SIZA, to bok u ich suchoty, pryniesienyja sa svabody. Suchoty vyjaŭlajucca taksama i ŭ asobaŭ, jakija znachodziacca ŭ miescach pazbaŭleńnia voli. Letaś u samich papraŭčych ustanovach vyjaŭlena 262 čałavieki, chvoryja na suchoty».

Tamu istotnaja častka srodkaŭ i dapamohi pojdzie ŭ Departament vykanańnia pakarańniaŭ, na palapšeńnie sytuacyi ŭ turmach.

Za apošnija hady ŭ Biełarusi na dźvie traciny abnoŭleny park fluarahrafičnych aparataŭ, paviedamiŭ dyrektar Respublikanskaha navukova‑daśledčaha instytuta pulmanalohii i fizijatryi Hienadź Hurevič. Sastarełaja plonačnaja technika zamianiajecca na sučasnyja ličbavyja fluarohrafy biełaruskaj vytvorčaści. Ich pieravaha ŭ tym, što doza apramieńvańnia na paradak nižejšaja, čym davali staryja ŭstanoŭki.

Ina Studzinskaja, Radyjo Svaboda

• 0
• 0
• 0
• 0
• 0
• 0
• 0
• 0