Paśla 10-hadovaha pierapynku «Zornyja vojny» viarnulisia da hledača. Heta samaja papularnaja epapieja ŭ historyi kiniematohrafa. Kali ŭ 1980 hodzie vyjšła druhaja časta «Impieryja nanosić udar u adkaz», to bolš za 2 miljony amierykancaŭ pad roznymi padstavami nie pajšli na pracu, a pajšli ŭ kinateatry. Navat tyja ludzi, jakija nikoli nie hladzieli «Zornyja vojny», niešta čuli pra Luka Skajuokiera, mahistra Jodu i Čubaku.
Kažuć, što sakret pośpiechu «Zornych vojnaŭ» — u najlepšych śpiecefiektach. Moža, i tak, ale hety film pra niešta bolšaje, čym prosta kaśmičnyja bojki i pahoni. Heta idealny śviet, dzie jość čornaje i biełaje, siły dabra i siły zła.
U dabra jość džedaj Luk Skajuokier, płejboj Chan Soła, addany Čubaka, pryncesa Leja. Zło ž, čaściej za ŭsio, navat nie maje tvaru, jano nosić maski. Adnaho šturmavika niemahčyma adroźnić ad inšaha. Zło manalitnaje, jano arhanizavanaje. Kažuć ža, što paradak bje kłas.
Farmalna bok dabra pieramahaje ŭ kožnaj z častak «Zornych vojnaŭ». Ale tatalnuju vajnu vyjhraje bok Ciomnych siłaŭ. Na praciahu siami častak možna prasačyć, jak skukožvajecca dabro z mahutnaj Hałaktyčnaj Respubliki da hrupki paŭstancaŭ-dysidentaŭ. Prastora svabody źmianšajecca z kožnym hodam. Niešta heta vielmi nahadvaje.
I ŭsio ž «Zornyja vojny» pakidajuć nadzieju, što navat małymi siłami možna rabić cudy. Što niedzie ŭ hałaktycy jość hieroj, jaki moža źmianić usio. Jaho treba tolki adšukać. Ci ŭdasca? Hladzicie ŭ kinateatrach vašaha horada.
***
Zornyja vojny: abudžeńnie siły
Režysior: Džej Džej Abrams
135 chv, ZŠA
Praz tryccać hadoŭ paśla hibieli Darta Viejdera i Impieratara hałaktyka pa-raniejšamu ŭ niebiaśpiecy. Pieršy Orden na čale z tajamničym Snoŭkam i jaho pravaj rukoj Kajli Renam idzie pa śladach Impieryi, sprabujučy zachapić usiu ŭładu. U hety nialohki čas na płaniecie Džaku los zvodzić dziaŭčynu Rej i byłoha šturmavika Pieršaha Ordena Fina z hierojami časoŭ vajny ź Impieryjaj — Chanam Soła, Čubakam i lidarkaj Paŭstancaŭ hienierałam Lejaj. Razam jany pavinny dać boj Pieršamu Ordenu, adnak stanovicca vidavočna, što tolki džedai mohuć spynić Snoŭka i Kajli Rena…
Rola Rej dastałasia maładoj brytanskaj akciorcy Dejzi Rydli. Jaje naparnikam, paŭstancam Po Demieranam, staŭ hvatemalec Oskar Ajzek, viadomy pa muzyčnaj stužcy «Unutry Ljuna Devisa» (2013) i naminavany za hałoŭnuju rolu na «Załaty hłobus».
Stvaralniki stužki imknulisia pa mahčymaści vykarystoŭvać realnyja miescy dla zdymak (u vakolicach Abu-Dabi, Łondana i na vyśpie Skielinh-Majkł u Irłandyi). Śpiecyjalna dla zdymak byŭ pabudavany kaśmičny karabiel «Tysiačahadovy sokał».
Pieršym novuju sieryju «Zornych vojnaŭ» ubačyŭ Denieł Flitvud z Techasa. Flitvudu było ŭsiaho 32 hady, ale jon pamiraŭ ad raku, i šancaŭ dažyć da vychadu filma ŭ prakat u jaho nie było. Anłajn-kampanija ŭ padtrymku chłopca pryciahnuła ŭvahu Disney. Jaje kiraŭnictva dało dazvoł pakazać jašče nie zmantavanuju viersiju «Abudžeńnia siły» ŭ jaho doma. Pierad prahladam Flitvudu patelefanavaŭ režysior Abrams. Denieł pamior 10 listapada 2015 h.
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju10
Kamientary