MZS Ukrainy adreahavała na zajavu Dziaržpahrankamiteta Biełarusi pra novyja bijamietryčnyja pašparty ŭkraincaŭ
Departamient konsulskaj słužby MZS Ukrainy viečaram 5 sakavika adreahavaŭ na zajavu Dziaržpahrankamiteta Biełarusi ab tym, što pašpart hramadzianina Ukrainy ŭ vyhladzie ID-karty (elektronnaha pašparta) pakul nie razhladajecca jak sapraŭdny dakumient dla pierasiačeńnia biełaruskaj miažy.
DKS MZS Ukrainy nahadvaje, što ŭ adnosinach pamiž dźviuma krainami dziejničaje mižuradavaje pahadnieńnie ab biaźvizavych pajezdkach hramadzian ad 12 červienia 2009 hoda. U adpaviednaści z artykułam 1 dakumienta ŭkraincy pavinny mieć pry sabie adzin z nastupnych dakumientaŭ: pašpart hramadzianina Ukrainy, pašpart hramadzianina Ukrainy dla vyjezdu za miažu, dypłamatyčny, słužbovy pašpart, prajazny dakumient dziciaci. Pahadnieńnie praduhledžvaje nieabchodnaść «nieadkładnaha infarmavańnia pa dypłamatyčnych kanałach ab uviadzieńni novych dakumientaŭ abo uniasieńni źmianieńniaŭ u dakumienty, jakija vykarystoŭvajucca dla met hetaha pahadnieńnia, i adnačasovaha nakiravańnia ich uzoraŭ».
«U suviazi z uviadzieńniem Ukrainaj afarmleńnia pašpartoŭ hramadzianina Ukrainy ŭ formie płastykavaj karty biełaruskamu boku zahadzia ŭ śniežni 2015 hoda byli nakiravanyja adpaviednaja dypłamatyčnaja nota i ŭzory elektronnych pašpartoŭ», — padkreślivajecca ŭ paviedamleńni DKS MZS Ukrainy ŭ Fejsbuku.
Pry hetym «pieraściaroh biełaruskaha boku adnosna ich vykarystańnia ŭ ramkach zhadanaha pahadnieńnia ŭ MZS nie pastupała».
DKS paviedamlaje, što pa inicyjatyvie biełaruskaha boku najbližejšym časam płanujecca praviadzieńnie kansultacyj pa pytańniach realizacyi pałažeńniaŭ mižuradavaha dakumienta.
Elektronnyja pašparty Ukraina ŭviała 1 studzienia 2016 hoda.
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju12
Kamientary