Miljanier Aviarjanaŭ zajaviŭ ab rejdarskim zachopie svaich kampanij
Biełaruski aliharch, jaki pakinuŭ krainu, zajaviŭ ab prafiesijna raspracavanaj prahramie rejdarskaha zachopu svaich kampanij.
Juryj Aviarjanaŭ — adzin ź pieršych biełaruskich biznesoŭcaŭ i dalaravych miljanieraŭ. Jaho asnoŭnymi aktyvami źjaŭlajucca kampanii «Rostem» i «Handlovy śviet — «Kalco», pišuć naviny.by.
Struktura «Rostem» uklučaje ŭ siabie Centralny rynak budaŭničych materyjałaŭ u staličnym mikrarajonie Uručča, park zabaŭ Dreamland i filijał «Ahrafirma «Illa». «Handlovy śviet — «Kalco» abjadnoŭvaje aŭtamabilny i budaŭničyja rynki i handlovy centr u staličnym mikrarajonie Malinaŭka.
Trochi bolš za dva tydni tamu Ekanamičny sud Mienska pryniaŭ zajavu ab pryznańni bankrutam ZAT «Rostem» i pryznačyŭ achoŭny pieryjad da siaredziny červienia 2016 hoda
Akramia taho, u Ekanamičnym sudzie Mienskaj vobłaści na razhladzie znachodzicca zajava ab pryznańni bankrutam ZAT «Handlovy śviet — «Kalco».
I ZAT «Handlovy śviet — «Kalco», i ZAT «Rostem» majuć vialikija pazyki pierad bankami. Havorka idzie ab niekalkich dziasiatkach miljonaŭ dalaraŭ.
Zapazyčanaści źjavilisia praź niaŭdałuju realizacyju bujnych inviestycyjnych prajektaŭ.
«Jon zajmaŭsia vialikimi inviestycyjnymi prajektami. Byli ŭziatyja vialikija kredytnyja resursy, jakija stali niepadjomnymi», - raspaviadaje hanarovy staršynia praŭleńnia Biźnies-sajuza pradprymalnikaŭ i najmalnikaŭ im. Kuniaŭskaha Hieorhij Badziej, jaki kansultavaŭ kampanii Juryja Avierjanava.
Da prykładu, u 2010 hodzie ZAT «Handlovy śviet — «Kalco» padpisała ź Mienskim abłvykankamam inviestycyjnuju damovu na dabudovu rynka ŭ Malinaŭcy. Siarod kredytoraŭ prajekta značacca «Biełahraprambank» i «BPS-Śbierbank».
Pavodle damovy, kampanija brała na siabie abaviazańni ŭkłaści ŭ prajekt blizu 150 młrd rubloŭ, ale na spravie vydatkavała ŭdvaja bolš srodkaŭ i tak i nie zmahła zaviaršyć budaŭnictva.
«U 2011 hodzie adbyłasia devalvacyja biełaruskaha rubla. Košty na budaŭniča-mantažnyja pracy i hetak dalej pavialičylisia. Heta značyć, jon ŭkłaŭ udvaja bolš srodkaŭ, čym praduhledžana damovaj, a abjekty nie ŭvioŭ, tamu što prosta nie stała srodkaŭ. Mienabłvykankam pryniaŭ pastanovu jaho aštrafavać. I štrafnyja sankcyi na paradak pieravyšali ŭsie tyja inviestycyi, jakija byli ŭkładzienyja ŭ prajekt. Akramia taho, Mienabłvykankam prypyniŭ dazvoł na budaŭnictva, pakul jon nie apłacić štraf. Heta byŭ pačatak», — kaža Hieorhij Badziej.
Jašče adnym vialikim prajektam, jaki akazaŭ niehatyŭny ŭpłyŭ na biznes Juryja Aviarjanava, było pašyreńnie parku zabaŭ Dreamland. Na jaho terytoryi biznesmen budavaŭ akvapark. Abjekt budavaŭsia za ŭłasnyja resursy, a taksama kredyt «BPS-Śbierbanka». Zapusk akvaparku supaŭ z kryzisam, jaki nie dazvoliŭ biznesoŭcu zarablać dastatkova srodkaŭ. «Zamiest taho kab zarablać, jamu treba było raspłačvacca za kredyty», — padkreślivaje Hieorhij Badziej. Jak pišuć biełaruskija ŚMI, paśla taho, jak biznesam Juryja Avierjanava zacikavilisia pravaachoŭnyja orhany, uładalnik «Rostem» i «Handlovy śviet — «Kalco» pakinuŭ krainu.
U 2002 hodzie jon užo źjazdžaŭ ź Biełarusi, kali suprać jaho i top-menedžaraŭ aŭtarynka ŭ Malinaŭcy raspačali kryminalnuju spravu. Ich abvinavačvali ŭ vymahalnictvie hrošaj z pradprymalnikaŭ za prava handlavać na rynku. Šaściora supracoŭnikaŭ rynku atrymali tady roznyja terminy, a Juryj Aviarjanaŭ byŭ abvieščany ŭ vyšuk. Praz dva hady jon viarnuŭsia ŭ krainu, kali padčas rasśledavańnia spravy nie znajšli jaho viny.
Naviny.by źviarnulisia pa kamientar da samoha Juryja Avierjanava, napisaŭšy jamu na elektronnuju poštu.
«Pačytajcie našu pierapisku z «BPS-Bankam» ad pačatku kredytavańnia i da zaraz, i ŭsio zrazumiejecie. Taksama i z «Biełahraprambanku». Tam usio jasna. Ale heta vialikaja praca. Vam, ja dumaju, nie zachočacca ŭnikać. Choć ja budavaŭ usio dla svajoj krainy tolki na karyść», — adkazaŭ biznesoviec.
Na prośbu dać pierapisku z bankami jon nie adreahavaŭ.
Paźniej, paśla znajomstva z kamientarom Hieorhija Badzieja ab pryčynach uźniknieńnia zapazyčanaści jaho kampanij, Juryj Aviarjanaŭ napisaŭ nastupnaje: «Heta adzin bok miedala. Ale jość i inšy. Prafiesijna raspracavanaja prahrama pa rejdarskim zachopie maich kampanij. Heta vielmi zajmalnaja historyja».
Juryj Aviarjanaŭ nazvaŭ imia čałavieka, jakoha ličyć inicyjataram rejdarskaha zachopu, ale na prośbu raskazać hetuju «zajmalnuju historyju» nie adreahavaŭ. U struktury, dzie zajmaje vysokuju pasadu čałaviek, jakoha Aviarjanaŭ abvinavačvaje ŭ rejdarstvie, pakul taksama nie kamientujuć situacyju.
Kamientary